Asoko ja Yakomba mu Engitu te kaavuluka ngwo A-Izalele. Muze Yakomba ni Yosefwe te hafwa kulu, umwe Falau mwaha yaputuka kuyula. Iye kapwile ni kwivwa woma ngwenyi, A-Izalele te mapwa ni ndundo jinji kuhiana A-Engitu. Hachino, Falau yacho yapwisa A-Izalele ndungo. Iye yaaha mulimo ukalu wakulinga tijolu ni kulima minda. Chipwe ngwe A-Engitu kapwile ni kwaalingisa milimo yikalu, nihindu A-Izalele te kakwoka chinji. Falau yatuma kushiha ana eswe a malunga waze te masemuka kuli A-Izalele, mumu te keshi kuwahilila ha kumona kwoka cho. Kunyonga lie, kuchi A-Izalele evwile ha chikuma chino?

Pwo Ka-Izalele yoze te avuluka ngwo Yokepete yasema mwana wa lunga mupema chinji. Mba amufunge, aye yamusa mu mutonga nawa yasweka mutonga wacho ha yambu mu Lwiji Nilu. Pangi wa mwana wacho, Miriame, yaswama hakamwihi hanga atale yize te muyilingiwako.

Mwana wa pwo wa Falau yeza ku lwiji ni kusana meya, chocho yamona mutonga  wacho. Muze awazulwile yawanamo mwana-kemba unalila, aye yamwivwila keke jinji. Miriame yamuhula ngwenyi: ‘Shina munguhasa kuya hanga ngukufupile pwo yoze mahasa kukwamwishinayo?’ Muze mwana wa Falau atayijile, Miriame yaya ni kusanyika naye, Yokepete. Mwana wa Falau yamulweza ngwenyi: ‘Yako ni mwana au hanga ungwamwishineyo, mungukufweta.’

Muze mwana wacho akolele, Yokepete yamutwala kuli mwana wa Falau, iye yamuluka jina lia Mose ni kumulela ngwe mwanenyi. Mose kakolele ngwe mwana wa mwanangana, nawa te mahasa kupwa ni chuma cheswacho mazanga. Alioze Mose kakavulamine Yehova. Kanyingikine ngwenyi, kapwile Ka-Izalele, hi Ka-Engitu ko. Kashika asakwile kuwayila Yehova.

Muze te hakumbanyisa miaka 40, Mose yakwata chiyulo chakukwasa atu jenyi. Muze Mose amwene Ka-Engitu kanalambe umwe ndungo Ka-Izalele, Mose yalamba Ka-Engitu wacho ni kumushiha. Mose yavumbika mufu wacho mu mavu. Muze Falau achinyingikine, yafupa kushiha Mose. Alioze Mose yachinyina ku chifuchi cha A-Midiane. Koko Yehova yamufunga.