Mose katwamine mu Chifuchi cha A-Mindiane ha miaka 40. Aye yambata, nawa yapwa ni ana. Limwe tangwa muze te analisa mapanga jenyi hakamwihi ni Mulundu wa Sinai, yamona chimwe chuma chize chamukomwesene chinji. Chimwe chiputa te chinalekumuka mulengi wa kahia, alioze te kuchishi ni kuwema! Muze Mose akundamineko hanga amone mumu liaka chinakwate kahia, iye yevwa limwe liji mukachi ka chiputa, ngwo: ‘Mose! Kanda ukundama chinji kuno. Zula sapato je, mumu homa unamane, hali ha asandu.’ Yehova mwe te unahanjika kupalikila muli mungelo.

Mose yalifuka ku meso, mumu te kanevu woma unji. Liji yiliamba ngwo: ‘Hinamona lamba lia A-Izalele. Mungwapulwila ku moko ja A-Engitu ni kwatwala mu chifuchi chipema. Yena mwe mukasongwela atu jami ni kwaatuhwisa mu Engitu.’ Kuchi wanyonga, shina chino chakomwesene Mose?

Mose yahula ngwenyi: ‘Yika mungukamba nyi atu manguhula yoze wangutuma? Zambi yamukumbulula ngwenyi: ‘Alweze ngwo, Yehova, Zambi wa Apalahama, wa Izake, nawa wa Yakomba mwe wangutuma.’ Chocho, Mose yamba ngwenyi: ‘Mba nyi atu kangupanjikile?’ Yehova yahana chilayi kuli Mose chize chasolwele ngwo Iye te mamukwasa. Yehova yalweza Mose hanga ambile hashi lukanda yoze apwile nenyi. Hachino, lukanda wacho yalumuka kapela! Muze Mose akwachile ku muchila wa kapela wacho, yalumuka nawa lukanda. Yehova yamba ngwenyi: ‘Muze mukalinga chikomokeso chino, muchikasolola ngwo yami nakutuma.’

Mose yamba ngwenyi: ‘Yami chishi kuhanjika kanawa.’ Yehova yamulakenya ngwenyi: ‘Mungukakulweza yize mukahanjika, nawa mungukutumina yayenu Arone hanga akakukwase.’ Muze hanyingika ngwenyi Yehova kali hamwe nenyi, Mose yanda mukwo-pwo ni ana jenyi yaya ku Engitu.