Mu chifuchi cha Uze, te mwatwama lunga yoze te wakuwayila Yehova. Jina lienyi te Yombi. Iye kapwile pichi, nawa kapwile ni asoko anji. Kapwile ni mbunge yipema, te kakukwasa yiswale, tuliwa ni ana-shiwa. Shina Yombi te kechi kuhasa kumona lamba, mumu te kakulinga yuma yipema?

Yombi kakachinyingikine, alioze Satana Ndiapu te kakumwendejela. Yehova yahula Satana ngwenyi: ‘Hiwamona kavumbi kami Yombi?’ Kukushi ni umwe uli ngwe iye hashi lia mavu. Kakungwononokena ni kulinga yuma yipema.’ Satana yakumbulula ngwenyi: ‘Shina Yombi kakukwononokena chamwononokena? Yena wakumufunga ni kumuwahisa. Hi unamwehe chihela chipema ni yimuna anji. Mutambule yuma yeswe alinayo, nyi kechi kwecha kukuwayila.’ Yehova yamba ngwenyi: ‘Muhasa kweseka Yombi. Alioze kanda umushiha.’ Mumu liaka Yehova echele Satana eseke Yombi? Iye kapwile ni ushindakenyo ngwenyi Yombi kechi kumwehuka.

Satana yaputuka kweseka Yombi ni luyinda munji. Chitangu, iye yatuma atu waze te avuluka ngwo A-Sabeu, hanga eye yimuna ni yimbulu a Yombi. Kahia yikashiha nawa mapanga a Yombi eswe. Atu akwo waze avuluka ngwo A-Kaletea yeya tumelu twenyi. Tuvumbi waze apwile ni kufunga yimuna yacho yaashiha. Kusulaho, yamunehena lusango mupi chinji. Ana a Yombi eswe kafwile muze zuwo lize apwile liauzukile. Mbunge ya Yombi yamakukine, chipwe chocho, kakechele kuwayila Yehova.

Satana kazangile hanga Yombi amone lamba linji, kashika amutuhwishile mahute mu mujimba  weswe. Yombi kamwene lamba linji. Aye kakanyingikine mumu liaka yuma yeswayi yapwile ni kulingiwa kuli iye. Chipwe chocho, Yombi yanunga ni kuwayila Yehova. Zambi kamwene yuma yeswayi, chocho yawahilila chinji ni Yombi.

Hachino, Satana yatuma malunga atatu hanga eseke Yombi. Ayo yamulweza ngwo: ‘Yena unakavulumuna nawa te unasweke. Kashika Zambi anakumwesa lamba.’ Yombi yamba ngwenyi: ‘Yami kuchavulumwine.’ Chocho, Yombi yaputuka kunyonga ngwenyi, Yehova mwe te unamumwesa lamba liacho. Iye yamba ngwenyi Zambi kakapwile ni kumusolwela ululi.

Mukweze yoze te avuluka ngwo Elihu yapanjika kanawa lusango wacho. Chocho, yamba ngwenyi: ‘Yuma yeswe nwamba yili ya mahuza. Yehova kali munene kuhiana yuma yeswe yize mutuhasa kunyingika. Iye kechi keza kulinga chuma chipi. Iye kakumona yuma yeswe nawa kakukwasa atu ha lamba lio.’

Chocho, Yehova yahanjika ni Yombi. Iye yamuhula ngwenyi: ‘Kuli wapwile muze natangile malilu ni hashi? Mumu liaka unambe ngwe, chishi mukwa-ululi? Unahanjika, alioze kuwanyingikine mumu liaka yuma yacho yinalingiwa.’ Yombi yatayiza upi wenyi ni kwamba ngwenyi: ‘Nalinga upi. Ami te nakwivwa wika hakutwala kuli yena, alioze haliapwila mba hinakunyingika kanawa. Kukushi nichimwe chuma chikalu kuli yena. Ngukonekenu ha yize nahanjika.’

Muze yeseko yeswe yahwile, Yehova yawuka mujimba wa Yombi ni kumwaha yuma yinji kuhiana yize apwile nayo chitangu. Yombi yapwa ni mwono upeme nawa yatwama miaka yinji. Yehova kawahishile Yombi ha kumwononokena, chipwe muze chapwile chikalu kuchilinga. Shina mupwa ngwe Yombi ha kununga ni kuwayila Yehova, chipwe ngwe mukulingiwa chuma cheswacho?