A-Izalele katwamine mu puya ha miaka 40. Ayo katambwile mambonge anji akolo. Haliapwila, ayo yasa chilombo cho mu chana cha Moape ku chivumbuko cha Lwiji Yordau, wano kapwile mashimbu waze ayo te manjila mu Chifuchi cha Chilakenyo. Mbalake, mwanangana wa Moape, yevwa woma wa kutokesa chifuchi chenyi ku moko ja A-Izalele. Hachino, iye yasanyika lunga yoze te avuluka ngwo Mbalau hanga aye ku Moape ni kushinga A-Izalele.

Alioze Yehova yalweza Mbalau ngwenyi: ‘Yena kuwatambile kushinga A-Izalele.’ Hachino, Mbalau yalituna kuya. Mwanangana Mbalake yamusanyika nawa kamuchiali ni kumulakenya kumwaha chuma cheswacho mazanga. Chipwe chocho, Mbalau yalituna. Alioze Zambi yamwamba ngwenyi: ‘Muhasa kuya, chipwe chocho ukahanjika wika yize mungukulweza.’

Mbalau yanyina ha chimbulu wenyi ni kuya kusango lia chifuchi cha Moape. Yapwa ni nyonga lia kushinga A-Izalele, chuma chize amulwezele kuli Yehova ngwo kanda achilinga. Hachino, mungelo wa Yehova yasoloka mu jila ha yisuho yitatu. Mbalau te keshi kumona mungelo wacho, alioze chimbulu te kanamumono. Chitangu, chimbulu yakondoloka mu tapalo ni kuya mu yambu. Kusulaho, chimbulu yaya kuchikalakala cha mawe, koko yapalakenya kulu lia Mbalau. Hi kusongo, chimbulu yautama mukachi ka tapalo. Ha yisuho yeswayi, Mbalau te kanalambe chimbulu ni lukanda.

Ha chisuho chamuchitatu, Yehova yahanjikisa chimbulu. Hachino, chimbulu yahula Mbalau ngwenyi: ‘Yika unangulambila kama? Mbalau yakumbulula ngwenyi: ‘Mumu ena hi wanguhepwisa. Nyi te nguli ni katana kachi te nakushiha kulu.’ Chimbulu yamba ngwenyi: ‘Yami nakwenda ne ha miaka yinji. Shina hingunakulinga kama chuma chamutapu au?

 Hohene, Yehova yalawisa meso a Mbalau, yamona mungelo. Mungelo yamba ngwenyi: ‘Yehova kakulwezanga ngwo kanda ushinga A-Izalele.’ Mbalau yamba ngwenyi: ‘Hinavulumuna. Ngunahiluka ku zuwo.’ Alioze mungelo yamwamba ngwenyi: ‘Muhasa kuya ku Moape, chipwe chocho, watamba kuhanjika wika yize Yehova makutuma kuhanjika.’

Shina Mbalau kalilongesele kama hachino? Ka. Kulutwe, Mbalau yeseka kushinga A-Izalele ha yisuho yitatu, alioze yisuho yeswe yitatu, Yehova yamulingisa hanga aawahise. Hi kusongo, A-Izalele yakatukila A-Moape, chocho yashiha Mbalau. Kachi chapwile chipema nyi Mbalau kapanjikile Yehova chize kuuputukilo, nyi ngwami?