Hakupalika cha amwe matangwa, muze A-Izalel te ali mu puya, Kora, Ndatane, Apirame, ni malunga akwo 250 yalimika ni Mose. Ayo yamba ngwo: ‘Hikwahwa ni yenu! Mumu liaka yena watamba kupwa kasongo ketu nawa Arone kupwa Sasendote? Yehova kali hamwe ni yetweswe, hi kuli yena ni Arone wika ko.’ Yehova yachipihilila chinji. Mumu ayo te kanalimika ni iye!

Mose yalweza Kora ni eswe waze apwile sali lienyi ngwenyi: ‘Hamene nukeza ku tabernakulu, nukanda yikwachilo ya kahia nukasamo insensu. Yehova makasolola waze iye hanasakula.’

Mukwachako, Kora ni malunga 250 yaya ni kuliwana ni Mose ku tabernakulu. Koko, ayo yocha insensu, ngwe te no asasendote. Yehova yalweza Mose ni Arone ngwenyi: ‘Lihandununenu kuli Kora ni atu jenyi.’

Muze Kora ayile kuli Mose ku tabernakulu, Ndatane, Apirame ni asoko jo kalitunyine kuyako. Yehova yamba kuli A-Izalele hanga akatuke ku mbalaka ya Kora, Ndatane, ni Apirame. Hohene, A-Izalele yakatukako. Ndatane, Apirame ni asoko jo  kapwile haze lia mambalaka jo. Susumuku, mavu yazuluka ni kwaanjisa kushi lia mavu! Ku tabernakulu, kahia yikakatuka mwilu ni kwocha Kora ni atu jenyi 250.

Chocho, Yehova yalweza Mose ngwenyi: ‘Tambula mukombo wa hita kasongo wa minyachi, nawa ha mukombo weswe sonekaho jina lia mwenyawo. Alioze mukombo wa munyachi wa A-Levi sonekaho jina lia Arone. Ukayisa mu tabernakulu, nawa mukombo wa lunga yoze hingunatongola kumukasoka yitemo.’

Mukwachako, Mose yatuhwisa mikombo jacho ni kuyisolola kuli hita kasongo. Alioze mukombo wa Arone yiusoka yitemo ni chisunge cha katapi. Hachino, Yehova yasolola pundu ngwo katongwele Arone hanga apwe sasendote wa lutwe.