Muze Mose apwile ha Mulundu Sinai, Yehova yamulweza hanga atunge yimwe mbalaka yilemu, yize te avuluka ngwo Tabernakulu, muno mwe te A-Izalele mahasa kuwayila Zambi. Kweswako maya, ayo te mahasa kututuluka ni Tabernakulu yacho.

Yehova yamba ngwenyi: ‘Lweza atu eswe ahane cheswacho ali nacho hanga akwase kutunga tabernakulu.’ A-Izalele yahana oru, prata, unengu, mawe a ndando ni yingeliengelie. Ayo nawa yahana mahina eka ni eka, malambu a tushitu ni yuma yikwo nawa yinji. Ayo kapwile yihanyi, hachino Mose yaamba ngwenyi: ‘Kwahwa yuma yakumbana! Kanda nuneha nawa.’

Malunga ni mapwo anji waze te akwete utotombo yakwasa kutunga tabernakulu. Yehova yaaha mana akulinga mulimo wacho. Amwe kapwile ni kulinga wanda ni kuunuka mahina. Akwo kapwile ni kululieka mawe, oru, hanji kusonga mapaya.

Atu yatunga tabernakulu kulita ni chize Yehova atumine. Ayo yasa hina lipema lize liapwile ni kuhandununa tarbenakulu mu yihanda yaali, Muma Musandu ni Muma Musandu Mwahiana. Muma Musandu Mwahiana mwe mwapwile mushete wa usendo wakulinga ni mapaya a mukesha ni oru. Muma Musandu mwapwile ndeya ya oru, mesa ni chilumbilo cha kwochela insensu. Ha muchima hapwile lumbashia lwa unengu ni chilumbilo chinene. Mushete wa usendo wapwile ni kwiwulula A-Izalele chilakenyo cho cha kwononokena  Yehova. Shina unanyingika ulumbunwiso wa usendo wacho? Uli chimwe chilakenyo chilemu chinji.

Yehova yasakula Arone ni ana jenyi hanga akalakale mu tarbernakulu ngwe asasendote. Ayo te katamba kuyifunga, ni kuhana yitapo kuli Yehova. Alioze Arone mwe te wika Sasendote wa lutwe, aye mwe te wakunjila Muma Musandu Mwahiana. Iye te kakulinga chino kamuwika ha mwaka, hanga ahane mulambu wa shili yenyi, shili ya asoko jenyi, ni shili ya vungu lieswe lia Izalele.

A-Izalele kahwishile kutunga tabernakulu, hakupalika cha mwaka umuwika muze te hatuhuka mu Engitu. Chocho, ayo yapwa ni chihela cha kuwayila Yehova.

Yehova yazalisa tabernakulu ni uhenya wenyi nawa helu liayo te hakusoloka lelwa. Muze lelwa te liakusoloka helu lia tabernakulu, A-Izalele te kakununga ni kutwama mu chihela chize ali. Alioze muze lelwa te liakukatuka, ayo te kakunyingika ngwo shimbu lia kuya hiliaheta. Ayo te kakuchiza tabernakulu ni kuya muze munayi lelwa.