Muze Ndawichi ashihile Ngoliate, Mwanangana Saulu yamusa mwata wa maswalele jenyi. Ndawichi kakumbile jita ha yisuho yinji, chocho yapwa ni lufuma. Muze Ndawichi te akufuna ku jita, mapwo te kakwimba miaso ni kuhangana ni kwamba ngwo: ‘Saulu kashiha tununu, alioze Ndawichi kulakaji a tununu!’ Chocho Saulu yaputuka kwivwila Ndawichi ukwa nawa yafupa kumushiha.

Ndawichi te kakwimba kanawa kalialia. Limwe tangwa muze Ndawichi te anembila Saulu kalialia, mwanangana yamwasa kunga. Ndawichi yahetama, kunga yilinjila ku chikalakala. Kulutwe lia yino, Saulu yafupa kushiha Ndawichi ha yisuho yinji. Hachino, Ndawichi yachinyina mu puya.

Saulu yanda maswalele jenyi 3,000, chocho yakaula Ndawichi. Iye yanjila mu chivwenge muze te anaswame Ndawichi ni atu jenyi. Malunga waze apwile ni Ndawichi yamba ngwo:  ‘Lino lie tangwa lize mushiha Saulu.’ Ndawichi yaya ndo kuze apwile Saulu yamuteta hina lienyi. Saulu kakevwileko. Kulutwe lia yino, Ndawichi yevwa chinyengo, mumu kahonene vumbi mwanangana yoze Yehova te hanawayisa. Iye kakechele atu jenyi hanga ashihe Saulu. Muze te anayi, iye yasanyika Saulu ngwenyi, kachi kamushihile, muze apwile ni uhashi wakuchilinga. Shina Saulu kalumwine manyonga jenyi hali Ndawichi?

Ka. Saulu yanunga ni kwendejela Ndawichi. Ha umwe ufuku Ndawichi ni muhwa-wenyi Abishai yanjila ni kuliumba mu chilombo cha Saulu. Chipwe Abnere, kafunga wa Saulu, neye te kanapombo. Abishai yamba ngwenyi: ‘Musono twayuka! Ngweche hanga ngumushihe.’ Ndawichi yamukumbulula ngwenyi: ‘Yehova mwe makafweta Saulu ha yitanga yenyi. Twande wika kunga ni mulondo wenyi wa meya, hanga tuye kwetu.’

Ndawichi yaya ha mulundu uze wapwile hakamwihi hanga ahase kumona chilombo cha Saulu. Iye yakololoka ngwenyi: ‘Abnere mumu liaka kuwafungile mwanangana we? Mulondo wa meya ni kunga ya Saulu kulihi yili? Saulu yanyingika ngwenyi, te liji lia Ndawichi, yamwamba ngwenyi: ‘Kuma kachi wangushiha alioze kuwachilingile. Ngunanyingika ngwami, mukapwa mwanangana masulaho mu Izalele.’ Saulu yahiluka ku zuwo lienyi lia wanangana. Alioze hi ko ngwo asoko eswe a Saulu kapwile ni kwivwila Ndawichi kole.