Yehova kalwezele Samuele ngwenyi: ‘Yako ku zuwo lia Yese. Umwe wa kuli ana jenyi mwe mapwa mwanangana mwaha mu Izalele.’ Samuele yaya ku zuwo lia Yese. Muze amwene mwana mutangu, iye yanyonga ngwenyi: ‘Yono mukweze mwe watamba kupwa mwanangana.’ Alioze Yehova yalweza Samuele ngwenyi, mwana wacho te hi iye ko. Yehova yamba ngwenyi: ‘Yami nakutala ku mbunge ya mutu, chishi kutala ha chize mutu apwa haze.’

Yese yaneha ana jenyi asambano kuli Samuele. Alioze Samuele yamba ngwenyi: ‘Yehova kasakwile nyi umwe hakachi ka wano. Shina uli nawa ni ana akwo? Yese yamba ngwenyi: ‘Nguli nawa ni mwana wakasulasongo jina lienyi Ndawichi. Iye kanangufungila mapanga.’ Muze Ndawichi ejile, Yehova yalweza Samuele ngwenyi: ‘Yono mwe nasakula!’ Samuele yazujila maji ha mutwe wa Ndawichi, yamuwayisa hanga apwe mwanangana yoze mahatako mu Izalele.

Kulutwe, A-Izalele yaya ni kwasa jita ni A-Filistea, waze apwile ni ka-jita watakama yoze te avuluka ngwo Ngoliate, iye mwe te wakwatetekela kulutwe. Tangwa ha tangwa, Ngoliate te kakulenya A-Izalele. Aye yakololoka ngwenyi: ‘Tumenu umwe mutu yoze malilamba ni yami. Nyi mangukumba, mutupwa ngamba jenu. Alioze nyi ngumukumba, yenu munupwa ngamba jetu.’

Ndawichi yaya ku chilombo cha maswalale A-Izalele ni kutwalila ayayo kulia, waze te maswalale. Iye yevwa maliji a Ngoliate, chocho, yamba ngwenyi: ‘Yami munguya ni kwasa nenyi jita!’ Mwanangana Saulu yamulweza ngwenyi:  ‘Yena uchili kanuke.’ Ndawichi yamukumbulula ngwenyi: ‘Yehova mangukwasa.’

Saulu yafupa kuhana yikwata yenyi ya jita kuli Ndawichi, alioze Ndawichi yamba ngwenyi ‘Ami chichi kuhasa kwasa jita ni yikwata yino.’ Ndawichi yanda ndundu yenyi yaya ku lwiji. Iye yatongona mawe atano yaasa mu tuku yenyi. Mba hi Ndawichi yaya ndo kuze apwile Ngoliate. Chitakame wacho yakololoka ngwenyi: ‘Tweya kuno kanuke. Mungukufwenya ni kukupwisa kulia cha tujila a mwilu ni tushitu amu yambu.’ Ndawichi kakapwile ni woma. Neye yakololoka ngwenyi: ‘Yena kuuneza ni katana ni kunga, alioze yami nguneza mu jina lia Yehova. Yena kuushi kwasa jita ni yetu, alioze kuunase jita ni Zambi yetu. Atu eswe hano mamona ngwo Yehova kali mukwa-ndundo kuhiana katana mweswawo hanji kunga. Iye manuhana nulieswe mu moko jetu.’

Ndawichi yasa liwe mu ndundu yenyi yalijingisa ni tachi jeswe. Ni ukwaso wa Yehova liwe liacho yilituhuka yilinjila ha huma lia Ngoliate. Chitakame wacho yalimbuka hashi. Hachino, A-Filistea yachina hanga alamwine mwono wo. Shina wakufuliela muli Yehova ngwe Ndawichi?