Muze Saulu afwile, Ndawichi yapwa mwanangana. Iye kapwile ni miaka 30. Muze te halinga yimwe miaka ha wanangana, ha umwe ufuku iye te kali ha fulumba ya zuwo lienyi lia wanangana, yamona umwe pwo mupema chinji. Ndawichi yanyingika ngwenyi, pwo wacho te Bate-Shipa, pwo lia swalale wenyi yoze te avuluka ngwo Uriya. Ndawichi yatuma kumunehena Bate-Shipa ku zuwo lienyi lia wanangana. Chocho, yalinga nenyi utanji, pwo wacho yapwa kafumba. Ndawichi yafupa kusweka yuma yize alingile. Iye yalweza mwata wa tujita twenyi hanga ase Uriya kulutwe lia jita, alioze tujita akwo masala kunyima. Muze Uriya amushihile ku jita, Ndawichi yalimbata ni Bate-Shipa.

Alioze yuma yeswe yipi yize yalingiwileko Yehova kayimwene. Yika te iye malinga? Yehova yatuma profeta Natane kuli Ndawichi. Natane yamba ngwenyi: ‘Kwapwile umwe lunga pichi yoze wapwile ni mapanga anji, ni umwe chiswale yoze wapwile ni mwana-panga umuwika, yoze te akuzanga chinji. Lunga yoze pichi yatambula mwana-panga wa yoze chiswale.’ Ndawichi yevwa uli unji, yamba ngwenyi: ‘Yono pichi ni chenyi kufwa!’ Natane yalweza Ndawichi ngwenyi: ‘Pichi wacho yena!’ Ndawichi yevwa yikola ku mbunge, chocho yatayiza upi wenyi ha kulweza Natane ngwenyi: ‘Navulumuna kuli Yehova.’ Shili yacho yanehene lamba linji kuli Ndawichi ni kuli asoko jenyi. Yehova yazangamisa Ndawichi, alioze yamwecha hanga anunge ni mwono mumu te kashishika ni kulikehesa.

Ndawichi kazangile kutunga tembele ya Yehova, alioze Yehova yatongola mwana wa Ndawichi, Solomone hanga ayitunge. Ndawichi  yaputuka kululiekela Solomone yuma ni kwamba ngwenyi: ‘Tembele ya Yehova yatamba kupwa yipema chinji. Solomone uchili mukweze, alioze mungumukwasa kululieka yuma.’ Ndawichi yahana mbongo jenyi jinji hanga atungilenajo tembele. Yafupa atu waze te anyingika kanawa mulimo. Yahana oru ni prata, nawa yatuma kuneha mitondo ya cedru ku Teru ni ku Sendone. Ku songo lia mwono wenyi, Ndawichi yalweza Solomone chize te matunga tembele. Yamba ngwenyi: ‘Yehova mwe wangutuma kusoneka yuma yino ni kuyihana kuli yena. Yehova makakukwasa. Kanda wivwa woma. Takama, yako ulinge mulimo.’