Yehova kahanyine akwa-kuyula kuli A-Izalele hanga aasongwele, alioze ayo yazanga kupwa ni mwanangana. Ayo yalweza Samuele ngwo: ‘Mavungu eswe tunanyingika kali ni mianangana jo. Ni yetu tunazange kupwa ni mwanangana.’ Samuele yachipihilila, chocho yalemba kuli Yehova hamukunda wa chikuma chacho. Yehova yamwamba ngwenyi: ‘Atu kalitunyine yena. Alioze yami analitunu. Alweze ngwe mahasa kupwa ni mwanangana, alioze mwanangana wacho makaeta kumulingila milimo ku tachi.’ Chipwe chocho, ayo yamba ngwo: ‘Etu kutwafupile kupanjika yize unambe. Alioze tunafupu wika kupwa ni mwanangana!’

Yehova yalweza Samuele ngwenyi, lunga yoze avuluka ngwo Saulu mwe mapwa mwanangana mutangu. Muze Saulu ayile ni kumeneka Samuele ku Rama, Samuele yawayisa Saulu ngwe mwanangana ha kumusa maji ha mutwe.

Kusulaho, Samuele yasanyika A-Izalele ni kwaakungulula hamuwika hanga aasolwele mwanangana wo mwaha. Alioze kakahashile kuwana Saulu. Yena unanyingika mumu liaka? Mumu iye kaswamine mukachi ka yikashi. Muze ayo awanyine Saulu, yamuneha haze nikumusolola hakachi ka mbunga. Saulu kapwile musuku chinji kuhiana eswe, nawa mupema. Samuele yamba ngwenyi: ‘Talenu yoze Yehova asakula.’ Atu yakololoka ngwo: ‘Mwanangana akatwame ni mwono miaka yinji!’

Mwanangana mutangu Saulu te kakupanjika Samuele ni kwononokena Yehova. Alioze kulutwe iye yalumuka. Chakutalilaho, mwanangana kakapwile ni chiteli cha kuhana milambu. Ha limwe tangwa, Samuele yalweza Saulu hanga amushimbwile ndo muze meza, alioze Samuele yashimbulako ndambu. Chocho, Saulu yakwata chiyulo cha kuhana milambu. Yika Samuele alingile? Iye yamulweza ngwenyi: ‘Yena kuwatambile kwehuka Yehova.’ Shina Saulu kalilongesele yimwe ha upi wenyi?

Kulutwe, muze Saulu ayile ni kwasa jita ni Amalekita, Samuele yalweza Saulu hanga aashihe eswe. Alioze Saulu yalituna  kushiha Mwanangana Agage. Yehova yalweza Samuele ngwenyi: ‘Saulu kangwehuka, kasolo kungupanjika.’ Samuele yevwa chinyengo, chocho yalweza Saulu ngwenyi: ‘Amu hiwecha kupanjika Yehova, iye kumakasakula mwanangana mweka.’ Muze Samuele te anahiluka ku zuwo, Saulu yamukwata ku hina ni kumutachika, chocho yilisuwika.’ Hachino, Samuele yalweza Saulu ngwenyi: ‘Yehova kumakuchiza wanangana.’ Iye makahana wanangana kuli mutu yoze mamuzanga ni kumwononokena.