Ha kapenda wa zuwo lienyi lia wanangana mu Yezerele, Mwanangana Ahabe te kakuhasa kumona munda wa vinyu wa lunga yoze te avuluka ngwo Nabote. Ahabe yazanga chinji munda wacho, iye yafupa kuulanda kuli Nabote. Alioze Nabote yalituna kumulanjisawo, mumu nyi te malanjisa munda wacho wa chihinga, chino te muchilimika ni Shimbi ya Yehova. Shina Ahabe kavumbikile Nabote ha kulinga chuma chino chipema? Ka. Ahabe yevwa uli unji. Mumu lia ufwatulo wacho, iye yalituna kutuhuka mu chipatulo chenyi cha kupomba ni kulituna kulia.

Mukwo-pwo mupi Mwazovu Jezebele, yamba ngwenyi: ‘Ena uli mwanangana wa mu Izalele. Muhasa kupwa ni chuma cheswacho muzanga. Mungukutambwila munda wacho.’ Iye yasonekena makulwana amu mbonge mikanda, hakwaaleza hanga alamikize Nabote ngwo katuka Zambi, ni kumushiha ni mawe. Makulwana jacho yalinga yize aalwezele kuli Jezebele, mba hi Jezebele yalweza Ahabe ngwenyi: ‘Nabote hafwa kulu. Haliapwila munda wa vinyu wapwa wa yena.’

Hi Nabote wika ko ashihile kuli Jezebele chakuhona mulonga. Iye kashihile atu anji waze te akuzanga Yehova. Iye te kakuwayila mahamba ni yuma yikwo yipi. Yuma yeswe yipi apwile ni kulinga Jezebele, Yehova te kakuyimona. Mba yika te Yehova malinga hali iye?

Muze Ahabe afwile, mwanenyi Jehorame yapwa mwanangana. Yehova yatuma lunga yoze te avuluka ngwo Jehu hanga ashihe Jezebele ni usoko wenyi.

Jehu yanyina mu temba lienyi ni kuya ku Yezerele kuze te kwatwama Jezebele. Jehorame neye yanda temba lienyi yaya nikulitakana ni Jehu, ni kumuhula ngwenyi: ‘Shina tuli ni sambukila hakachi ketu?’ Jehu yakumbulula ngwenyi: ‘Kukuchi kupwa sambukila, mumu noko  Jezebele, machilinga yuma yipi.’ Jehorame yafupa kuteulula temba lienyi hanga achine. Alioze Jehu yamwasa mwivi ni kumushiha.

Hachino, Jehu yaya ndo ku zuwo lia wanangana lia Jezebele. Muze Jezebele evwile ngwo Jehu kaneza, aye yalilulieka kanawa, chocho yamushimbwila ku kapenda wa mu chipatulo cha kwilu. Muze Jehu aheteleko, yamumeneka ni uli weswe. Jehu yalweza tuvumbi twa Jezebele waze apwile hamwe nenyi ngwenyi: ‘Mukwatenu hanga numunyase hashi!’ Ayo yaholola Jezebele haze lia kapenda, chocho yafwa.

Kulutwe lia yino, Jehu yashiha ana ja Ahabe 70, nawa yalulieka chifuchi hakuhwisamo uwayilo weswe wa Mbale. Shina wamona ngwe, Yehova kakumona yuma yeswe nawa ha shimbu lize lialita iye makanongesa waze eswe akulinga yuma yipi?