Josia kapwile mwanangana wa Yunda muze te ali ni miaka nake. Ha matangwa jacho, atu te kakupanda wanga ni kuwayila mahamba. Mba muze Josia hakumbanyisa miaka 16, yanyingika mutapu walita wa kuwayila Yehova. Muze akumbanyishine miaka 20, yaputuka kupuzula tuponya ni yilumbilo mu chifuchi cheswe. Nawa muze te hapwa ni miaka 26, yakwasa kululieke tembele ya Yehova.

Mu tembele yacho, sasendote wa lutwe Hilekia, yawanamo chivungo cha Shimbi ya Yehova—kota chivungo chacho kachisonekene kuli Mose. Shafane, mukwa-kusoneka wa mwanangana yatwala chivungo chacho kuli Josia nawa yaputuka kutanga Shimbi ni liji mwilu. Muze Josia evwile chino, yanyingika ngwenyi, atu kehukile Yehova ha miaka yinji. Mwanangana Josia yalweza Hilekia ngwenyi: ‘Yehova kanatuvwila uli unji. Yako hanga uhanjike nenyi. Yehova matulweza yize twatamba kulinga.’ Yehova yakumbulula kupalikila muli profeta wa pwo Hulenda ngwenyi: ‘Atu aku Yunda hanangwehuka. Ayo makamona lamba, alioze hi mu wanangana wa Josia ko, mumu iye kali mukwa-kulikehesa.’

Muze Mwanangana Josia evwile lusango wacho, yaya ku tembele nawa yakungulula A-Yunda hamuwika. Mba hi yatangila vungu lieswe Shimbi ya Yehova ni liji mwilu. Josia hamwe ni atu eswe yalakenya kwononokena Yehova ni mbunge yo yeswe.

 A-Yunda te keshi kulinga Chizomboka ha miaka yinji. Alioze, muze Josia atangile mu Shimbi ngwo Chizomboka te katamba kuchilinga hita mwaka, iye yalweza vungu lieswe ngwenyi: ‘Mutulingila Yehova Chizomboka.’ Hachino, Josia yalilulieka hanga akahane yitapo yinji ni kululieka chizavu cha akwa-kwimba mu tembele. Chocho, vungu yililinga Chizomboka, kusulaho Chiwanyino cha Mbolo kuyishi Ufutunwiso, yino yalingile matangwa shimbiali. Chiwanyino chacho te kanda chichilingiwa kama kukatuka ha mashimbu a Samuele. Pundu lume Josia te kakuzanga chinji Shimbi ya Zambi. Shina wakuzanga kulilongesa hakutwala kuli Yehova?