Sango Jipema jineza kuli Yehova, Zambi wa uwahililo yoze unazange hanga asoko awahilile. (1 Timoteu 1:11) Iye mwe unakalinga umbachiso. Umbachiso wakusonekesa kuli akwa kuyula uli ni ulemu mumu wakuneha uwahililo ni ufunge upema kuli asoko, hanga afumbe kanawa ana.

Nyonga lika Zambi alinalio ha umbachiso? Iye kanazange ngwo umbachiso wa lunga ni pwo ununge ndo ha matangwa eswe. Akwa Kristu chatamba kuvumbika shimbi ja mu chifuchi cho hakutwala ku umbachiso. (Luka 2:1, 4, 5) Yehova kanazange malunga ni mapwo apwe akwa kushishika kuli umwe ni mukwo. (Hepreu 13:4) Iye kulakula cha mupihila. (Malakia 2:16) Yehova kakwecha kulakula ni umbachiso weka kuli Akwa Kristu, nyi mukwo malinga utanji.​—Tanga Mateu 19:3-6, 9.

Yehova kanakatanga lunga ni pwo hanga ayo alinge chize chaatela mu umbachiso. (Uputukilo 2:18) Ngwe mwata wa usoko, lunga chatamba kusongwela ni kukwasa asoko jenyi, ni kwalongesa hakutwala kuli Zambi. Lunga ndo apwe ni zango muli mukwo pwo. Lunga ni pwo chaatamba kulizanga ni kulivumbika umwe ni mukwo. Lunga ni pwo kali akwa shili, kashika chaatamba kulikonekena mumu ye fungula ya uwahililo mu umbachiso.​—Tanga A-Efwesu 4:31, 32; 5:22-25, 33; 1Petulu 3:7.

Nyi yitanga yenu yinapinjisa umbachiso wenu, chanutamba kusa tachi hanga nulizange umwe ni mukwo. (1 A-Korindu 13:4, 5) Liji lia Zambi lishi kulongesa ngwo kulihandununa ye jila yakuhwisa milonga ize yakupwa mu umbachiso.​—Tanga 1 A-Korindu 7:10-13.

Yehova kanazange hanga nupwe ni uwahililo. Iye kananwehe chiyulo chipema hanga nuwahilile mu ukweze wenu. Iye kanazange nuyuke ku mana ni yitanga ya yisemi jenu. (A-Kolosu 3:20) Yehova nawa kanazange hanga nupwe ni yitanga ya chiseke, ni kulinga yuma ize muyiwahilila iye ni Mwanenyi.​—Tanga Chilumbununyi 11:9–12:1; Mateu 19:13-15; 21:15, 16.

Yenwe chanutamba kukalakala chinji hanga nuhane kulia, ni zuwo, ni mazalo kuli ana jenu. (1 Timoteu 5:8) Mba ana jenu awane uwahililo, yenu nawa ndo kwalongesa kuzanga Zambi ni kumunyingika. (A-Efwesu 6:4) Chilweza chenu cha kusolola zango kuli Zambi muchihasa kukwasa chinji mbunge ja ana jenu. Nyi malongeso jenu kaneza mu Liji lia Zambi, maahasa kukwasa manyonga ja ana jenu hanga ende mu jila yipema.​—Tanga Shimbi Yamuchiali 6:4-7; Yishima 22:6.

Ana jenu mayuka nyi nwalembejeka ni kwachichimieka. Ayo nawa chaatela kwalongesa ni kwafumba. Longeso liacho muliafunga ku yitanga ize te muyipinjisa uwahililo wo. (Yishima 22:15) Fumbo liacho kanda lipwa lia uswi hanji lia ukalu.​—Tanga A-Kolosu 3:21.

Yela ja Yehova kakufambwisa, mikanda yipema ize muyihasa kukwasa yisemi ni ana jo. Mikanda yacho kakuyisoneka nikulita ni Mbimbiliya.​−Tanga Masamu 19:7, 11.