Zambi kanasanyika atu akumavungu eswe hanga akundame kuli iye ha kulemba cho. (Masamu 65:2) Mba alioze, iye keshi kwivwa hanji kutayiza kulemba cheswe. Ngwe chino, lunga yoze wakumwesa mukwo pwo lamba yilemba yenyi muyilinjiwa. (1 Petulu 3:7) Nawa muze A-Izalele apwile ni kulinga uhuka, Zambi te keshi kwivwa yilemba yo. Chamwenemwene kulemba chili chiwape chipema. Kashika, Zambi kakutayiza yilemba ya yivulumunyi, nyi malikonyekena ku shili yo.—Tanga Izaia 1:15; 55:7.

Tala chinema Shina Zambi Kakwivwa Yilemba Yeswe?

Kulemba chili chihanda cha uwayilo wetu, kashika yetwe chatutamba kulemba wika kuli Tangi yetu, Yehova. (Mateu 4:10; 6:9) Nawa yetwe tuli akwa shili, kashika chatutamba kulemba mu jina lia Yesu mumu iye kanakafwila ha shili yetu. (Yoano 14:6) Yehova keshi kuzanga ngwo tufunyine yilemba yoyene hanji ize yakusoneka. Iye kakuzanga yilemba ize yineza ku mbunge yetu.— Tanga Mateu 6:7; A-Fwilipu 4:6, 7.

Tangi yetu mahasa kwivwa chipwe yilemba ize yamwishi. (1 Samuele 1:12, 13) Mutuhasa kulemba kuli Yehova ha mashimbu eswoo, hanji ha kuputuka ni kutoka cha tangwa, hanji hakulia chipwe ngwe hanji tunapinji ni milonga.—Tanga Masamu 55:22; Mateu 15:36.

Kukundama kuli Zambi hichashiko mumu yetwe twatwama mukachi ka atu waze keshi ni ufulielo kuli Zambi nawa  kakukekuna chilakenyo chenyi cha kuneha sambukila hano hashi. (2 Timoteu 3:1, 4; 2 Petulu 3:3, 13) Chatutamba kulikata ni mandumbu jetu a ufulielo hanga tulitakamise.​—Tanga A-Hepreu 10:24, 25.

Kulikungulula ni atu waze ali ni zango kuli Zambi muchitukwasa kukundama kuli Zambi. Yikungululo ya Yela ja Yehova yili mashimbu apema akuliyukisa ku ufulielo wa umwe ni mukwo.​—Tanga A-Roma 1:11, 12.

Yena muhasa kukundama kuli Yehova ha kunyonga ha ize unalilongesa mu Liji lia Zambi. Zewula hakutwala ku yitanga, ni yiyulo ni yilakenyo yenyi. Kulemba ni kunyonga chakutukwasa kunyingika zango ni mana ja Zambi.​—Tanga Yoshua 1:8; Masamu 1:1-3.

Yetwe mutuhasa kukundama kuli Zambi nyi twajikijila wika kuli iye, nawa nyi twamufuliela. Alioze ufulielo uli ngwe kulia chize twakufupa hanga tupwe ni mwono. Nyi unazange kukolesa ufulielo we ndo ununge kweuluka ha ize unatayiza.​—Tanga Mateu 4:4; A-Hepreu 11:1, 6.

Yehova kakufunga waze akumuzanga. Iye kakwaafunga ha ize yeswe muyihasa kupinjisa ufulielo wo ni kutalatala cho cha mwono wa mutolo. (Masamu 91:1, 2, 7-10) Iye kakutukanjisa hakutwala ku yitanga ize yakupinjisa mwono ni uwahililo wetu. Yehova kakutulongesa jila yipema ya mwono.​—Tanga Masamu 73:27, 28; Tiangu 4:4, 8.