Yesu kanakalongesa tumbaji twenyi chikungulwila chimuwika, cha umwenemwene. Chinapu ngwe jila ya kusongwela ku mwono wa miaka yeswe. Yesu yamba ngwenyi, jila yacho: “Waze akuyiwana akehe” (Mateu 7:14) Zambi kakutayiza uwayilo uze unalita ni Liji lienyi lia mu Mbimbiliya. Uwayilo weswe wa umwenemwene kanaunungu mu ufulielo umuwika.—Tanga Yoano 4:23, 24; 14:6; A-Efwesu 4:4, 5.

Tala chinema Shina Zambi Kakutayiza Uwayilo Weswe?

Yesu kanakatoweza hakutwala kuli maprofeto a mahuza waze akupiangula Akwa Kristu. Ayo kumeso kakusoloka ngwe akwa uwayilo wa umwenemwene. Mu mangeleja jo kakwamba ngwo kali Akwa Kristu. Alioze yena muhasa kunyingika atu jacho chize apwa ha yitanga yo. Kuchi? Uwayilo umuwika wa umwenemwene wakuneha Ukristu upema ni kusolola mihuko ni ndako jipema.—Tanga Mateu 7:13-23.

Tala yilweza yino yitano:

• Akwa uwayilo wa umwenemwene kakuvumbika Mbimbiliya mumu lie Liji lia Zambi. Ayo kakusa tachi hanga atwame nyikulita ni shimbi ja mu Mbimbiliya. Chikungulwila cha umwenemwene chinalituchika ni mangeleja  waze akulongesa manyonga ja atu. (Mateu 15:7-9) Akwa Uwayilo wa umwenemwene kakulinga ize akulongesa.—Tanga Yoano 17:17; 2 Timoteu 3:16, 17.

• Tumbaji a umwenemwene ja Yesu kakulemesa jina lia Zambi, Yehova. Yesu kanakalemesa jina lia Zambi ha kulinyingikisa. Iye kanakakwasa atu hanga anyingike Zambi ni kwalongesa kulemba hanga jina lia Zambi lipwe lisandu. (Mateu 6:9) Kuze yena watwama chikungulwila chika chakunyingikisa jina lia Zambi?—Tanga Yoano 17:26; A-Roma 10:13, 14.

• Akwa Kristu a umwenemwene kakwambujola Wanangana wa Zambi. Zambi kanakatuma Yesu hanga ambujole Sango Jipema ja Wanangana. Wanangana wa Zambi we ushimbwishilo wika wa atu. Yesu kanungine ni kwambujola Sango Jipema Ja Wananga ndo ha kufwa chenyi. (Luka 4:43; 8:1; 23:42, 43) Iye kanakamba ngwo tumbaji twenyi noo ndo ambujole sango jino. Nyi mweswao meza kuli yena hanga ahanjike hakutwala ku Wanangana wa Zambi, muhule ngwo chikungulwila chenyi chika?—Tanga Mateu 24:14.

• Tumbaji ja Yesu keshi kulichinga mu ungulungulu wa hano hashi. Yena muhasa kwanyingika ha ndako jo mumu ayo keshi kulichinga mu yiyulo ya mafwefe, hanji mu mbenga. (Yoano 17:16; 18:36) Nawa ayo keshi kwimbulula yitanga ni ndako jipi ja hano hashi.—Tiangu 4:4.

• Akwa Kristu a umwenemwene kali ni zango hali umwe ni mukwo. Mu Liji lia Zambi ayo kakulilongesa kuvumbika minyachi yeswe. Alioze Yikungulwila ya mahuza ha mashimbu akwo yakukwasa jita ya yifuchi, akwa uwayilo wa umwenemwene keshi kuchilinga. (Mika 4:1-3) Nawa Akwa Kristu a umwenemwene keshi kulizanga ayo ene wika, alioze kakusa tachi ni mashimbu ni upite wo hanga akwase ni kukolesa akwo.—Tanga Yoano 13:34, 35; 1 Yoano 4:20.

Chikungulwila chika malongeso jo kaneza mu Liji lia Zambi? Nawa chakulemesa jina lia Zambi? Ni kwambujola ngwo Wanangana wa Zambi che kutalatala wika chipema cha atu? Chizavu chika chili ni zango, nawa chishi kuya mu jita? Yika yena wanyongo?—Tanga 1 Yoano 3:10-12.