Upi waputukile muze Satana ahanjikile mahuza atangu. Satana chitangu kapwile mungelo mungunu, alioze “iye kamanyine mu umwenemwene.” (Yoano 8:44) Iye yapwa ni nyonga lia kutambula uwayilo uze watela wika kuli Zambi. Satana yonga pwo mutangu, Eva, hanga amwononokene, ehuke kuli Zambi. Alama neye yembulula Eva ha kuhona kwononoka kuli Zambi. Yitanga yacho Alama anakalinga yinakamukokela lamba ni ufwe.​—Tanga Uputukilo 3:1-6, 19.

Muze Satana anakonga Eva hanga eche kwononokena kuli Zambi, hazehene iye yaputuka kulimika ni wata wa Zambi Mwe Chitunda. Atu anji kanehuka Wata wa Zambi, ha kulichinga ni Satana. Kashika Satana kali “mwata wa hano hashi.”​—Tanga Yoano 14:30; 1 Yoano 5:19

Milimo yeswe ya Zambi yili yingunu. Zambi kanakatanga atu ni angelo hanga ahase kumwononokena ni ungunu weswe. (Shimbi Yamuchiali 32:4, 5) Yehova kanakatutanga ni manyonga akusakula kulinga chipi hanji chipema. Manyonga akusakula kakutwaha uhashi wa kusolola zango lietu kuli Zambi.​—Tanga Tiangu 1:13-15; 1 Yoano 5:3.

Yehova kaneche uhulia wacho ha mashimbu akehe. Mumu liaka? Hanga asolole ngwo kushi ni umwe wanangana wa hashi muuhasa kuyula atu kanawa, mumu keshi ni chiyulo cha Zambi. (Chilumbununyi 7:29; 8:9) 6,000 a miaka ize yapalika mu yishima ya atu  yinasolola ngwo yino yili ya umwenemwene. Mianangana ja atu keshi kuhasa kuhwisa jita, ungulungulu, uhenge, ni yikola.​—Tanga Jeremia 10:23; A-Roma 9:17.

Kuyula cha Zambi chinalituchika ni cha atu, mumu yoze matayiza kuyula cha Zambi mayuka. (Izaia 48:17, 18) Kwasala hakehe Yehova achize Mawanangana a hashi heswe. Atu waze akusakula Wanangana wa Zambi e makatwama hano hashi.​—Izaia 11:9.​—Tanga Daniele 2:44.

Tala chinema Mumu Liaka Zambi Akwecha Kupwe Lamba?

Satana hanambe ngwenyi, kushi niumwe mutu malingila Zambi ni zango lienyi lieswe. Yena muhasa kuhangulula wano mahuza? Mba yena muhasa! Uhomboloji wa Zambi hali yetwe unatwehe uhashi wakusakula wanangana uze mutuzeyela ni wa Zambi nyi hanji wa atu. Kusakula chetu chinasoloka ha yitanga ize tulinayo.​—Tanga Yombi 1:8-12; Yishima 27:11.

Yetwe mutuhasa kusakula Zambi ngwe Mwata wetu ha kulilongesa Uwayilo wa umwenemwene mu Liji lia Zambi, Mbimbiliya. (Yoano 4:23) Yetwe mutuhasa kulituna Satana ngwe mwata wetu ha kwecha yiyulo ya mafwefe ni jita, ngwe chizechene Yesu alingile.—Tanga Yoano 17:14.

Satana kanase tachi jinji ha kwokesa yitanga ya luchisa ni upi. Muze yetwe mutwecha yitanga yacho, amwe masepa ni asoko jetu mahasa kutukekuna hanji kulimika ni yetwe. (1 Petulu 4:3, 4) Kashika yetwe ndo tusakule. Shina yetwe mutulikata ni atu waze a zanga Zambi? Shina yetwe mutwononokena ku shimbi jenyi ja mana ni zango? Nyi yetwe mutulinga chocho, mutusolola ngwo Satana mukwa mahuza muze ambile ngwo niumwe mutu mahasa kulingila Zambi.—Tanga 1 A-Korindu 6:9, 10; 15:33.

Zambi ha zango lienyi hali atu kanalakenya ngwo upi ni lamba mulikahwa. Waze akusolola ufulielo wo kuli Zambi, makawahilila ni mwono wa mutolo hano hashi.—Tanga Yoano 3:16.