Yehova wahanyine hashi kuli atu. Hashi che chihela chetu. Kashika atu atangu lunga ni pwo, Alama ni Eva, ayo kakatangile hanga atwame mu malilu—alioze Zambi te hanatange angelo hanga atwame mu malilu. (Yombi 38:4, 7) Zambi yasa mutu mutangu muchihela chize anakamusakwila ye paraisu yipema anavuluka ngwo munda wa Endene. (Uputukilo 2:15-17) Yehova yahana mwono wa miaka yeswe kuli Alama ni Eva, ni ana aze te masema hanga akawahilile hano hashi.​—Tanga Masamu 37:29; 115:16.

Munda wa Endene te paraisu. Atu atangu Alama ni Eva ayo te mazalisa hashi heswe ni ana. Hakupalika cha matangwa ayo te mayula hashi heswe hanga apwiseho paraisu. (Uputukilo 1:28) Hashi kechi kanongesoho. Atu manunga ni kutwamaho ndo ku miaka yeswe.​—Tanga Masamu 104:5.

Tala chinema Mumu Liaka Zambi Atangile Hashi?

Alama ni Eva alioze kononokene kuli Zambi, kashika Yehova yaachiza mu munda wa Endene. Kashika paraisu yinakatoka, kushi niumwe mutu yoze mahasa kuyihilwisa. Mbimbiliya yinambe ngwo: “Hakunjika hashi mu chiyulo cha yingulungulu.”—Yombi 9:24.​—Tanga Uputukilo 3:23, 24.

Shina Yehova hanavulama upale wenyi utangu hali atu nyi? Ka! Iye mukwa ndundo jeswe. Iye keshi kwehuka. (Izaia 45:18) Zambi makapwisa atu ni mwono upema ngwe chize iye azangile.​—Tanga Masamu 37:11, 34.

Paraisu makayifunyisa ha mashimbu waze Yesu mayula hano hashi ngwe Mwanangana wa Zambi. Yesu makeza ni  angelo ja Zambi hanga akenyeke atu eswe waze akulimika ni Zambi, mujita ize anavuluka ngwo Armagedone. Yesu makakasa Satana ha 1,000 ka miaka. Atu ja Zambi makaalamwina mumu Yesu mwe makasongwela ni kwafunga. Ayo makawahilila ni mwono wa mutolo mu Paraisu hano hashi.​—Tanga Usolwelo 20:1-3; 21:3, 4.

Tangwa lika Zambi machiza upi hano hashi? Yesu kanakahana chimwe “chilayi” cha chize songo muliza. Yuma yeswe yipi, yinapinjisa ulamwino wa atu, yinasola ngwo tuli ha “kumanunuka cha miaka.”​—Tanga Mateu 24:3, 7-14, 21, 22.

Ha mashimbu ja 1,000 wa miaka, Yesu mumalilu makayula hashi, iye makahwisa lamba lieswe hano hashi. (Izaia 9:6, 7; 11:9) Nawa ngwe Mwanangana, Yesu makakalakala ngwe Sasendote wa Lutwe ni kuhwisa shili ya waze analingila Zambi ni zango. Nawa muli Yesu, Zambi makahwisa yikola, ni ushinakaji, ni ufwe.​—Tanga Izaia 25:8; 33:24.

Atu waze akwononoka kuli Zambi makatwama mu Paraisu. (1 Yoano 2:17) Yesu kanakatuma tumbaji twenyi hanga afupe atu ni kwalongesa chize Zambi maatayiza. Musono uno, Yehova kanalulieka tununu ja atu hanga akapwe ni mwono wa mutolo mu Paraisu hano hashi. (Zefania 2:3) Mu Zuwo lia Wanangana lia Yela ja Yehova, atu kakulilongesa kupwa malunga ni mapwo apema, nawa atata ni amama apema. Atata ni amama ni ana kakulemba hamuwika, ni kulilongesa chize mahasa kuyuka ku sango lipema.​—Tanga Mika 4:1-4.