Chochene, kuhengwola cha malongesa wano a mu Mbimbiliya chakolesa zango lie kuli Yehova. Zango liacho ndo kulikolesa matangwa eswe. (1 Petulu 2:2) Kutalatala che cha mwono wa mutolo chili hali yena mwene nyi unanungu kukundama kuli Zambi ha kulilongesa Liji lienyi.—Tanga Yoano 17:3; Yundase 21.

Nyi yinyingi ye kuli Zambi yoka, ufulielo we muukola. Ufulielo we muukukwasa kupemena kuli Zambi. (A-Hepreu 11:1, 6) Ufulielo we muukukwasa hanga ulikonyekene mba uyuke ha kwalumuna ndako ja mwono we.—Tanga Yilinga 3:19.

Yena muhasa kuhanjika ni akwenu ha ize unalilongesa—yetwe eswe twakwivwa chiseke ha kwambujola Sango Jipema. Ha kununga ni longeso lie lia Mbimbiliya, yena munyingika chize muhasa kukalakala ni Mbimbiliya hanga ulumbunune sango jipema ni ufulielo we.—Tanga A-Roma 10:13-15.

Atu anji kakuputuka kwambujola sango jipema kuli masepa hanji kuli asoko. Ndo uhanjike ni mana. Kanda waamba ngwo mangeleja jo kali amahuza, alioze alweze hakutwala ku chilakenyo cha Zambi. Nawa, euluka ngwo atu kanapinji ni milonga yeka ni yeka, yenayo yena muhanjika no.—Tanga 2 Timoteu 2:24, 25.

Kulilongesa Liji lia Zambi mulikukwasa kukolesa ufulielo we. Yena nawa mupwa sepa mupema wa Yehova.  Chamwenemwene yena muhasa kupwa mutu wenyi, nawa kupwa umwe wa ku usoko wenyi.—Tanga 2 A-Korindu 6:18.

Yena muhasa kukola mu ufulielo ha kununga ni longeso lie lia Liji lia Zambi. (A-Hepreu 5:13, 14) Hula umwe Chela cha Yehova hanga ulonge nenyi Mbimbiliya mu mukanda Yika Mbimbiliya Muyihasa Kulongesa? Yuma yinji ize mulilongesa mu Liji lia Zambi, muyiwahisa mwono we.—Tanga Masamu 1:1-3; 73:27, 28.

Sango jipema jineza kuli Yehova, Zambi wa uwahililo. Yena muhasa kukundama kuli iye nyi wakundama kuli atu jenyi. (A-Hepreu 10:24, 25) Ha kununga kusa tachi je hanga upemene kuli Yehova, yena mupwa ni mwono wa umwenemwene—we mwono wa mutolo. Kukundama kuli Zambi chili chuma chipema yena mulinga.—Tanga 1 Timoteu 1:11; 6:19.