Sango jipema jinambe ngwo, atu makapwa ni mwono wa mutolo hano hashi jili mu Mbimbiliya. (Masamu 37:29) Mbimbiliya yili ni 66 ya mikanda yikehe yikehe. Zambi kanakatuma 40 ja atu a ufulielo hanga asoneke Mbimbiliya. Mose kasonekene mikanda yitangu yitano, hikwapalika 3,500 a miaka. Mukanda wakusongo wa mu Mbimbiliya apostolo Yoano wausonekene, hiwalinga 1,900 ja miaka. Atu asonekene Mbimbiliya manyonga jaya anakasolola? Spiritu musandu ya Zambi ye yinakakwasa atu waze asonekene Mbimbiliya. (2 Samuele 23:2) Ayo kanakasoneka manyonga ja Zambi hi ja atu ko. Kashika Mbimbiliya Mwenyayo Yehova.​—Tanga 2 Timoteu 3:16; 2 Petulu 1:20, 21.

Tala chinema Mwenya Mbimbiliya Iya?

Tunanyingika ngwo Mbimbiliya yili Liji lia Zambi, mumu hiyinambe ni ushishiko weswe yuma yeswe ize muyiza kulutwe. Kushi niumwe mutu mahasa kuyamba. (Yoshua 23:14) Zambi Wika Mukwa Ndundo mwe mahasa kunyingika ni ushishiko weswe chize atu makapwa kulutwe lia matangwa.​—Tanga Izaia 42:9; 46:10.

Mutuhasa kutwaminina umwe mukanda umuwika wa Zambi, mukanda wacho ye Mbimbiliya. Mbimbiliya jinji kanajihana mu unji wa kama ja malimi. Mbimbiliya chipwe ngwe yili mukanda ukulu alioze yinalite ni yinyingi ya atu akwa mana (ciência). Nawa 40 ja atu waze anakasoneka Mbimbiliya kakalituchikile ha ize anakasoneka umwe ni mukwo. * Nawa Mbimbiliya yili umwe mukanda uze unalise  ni yikwo, mumu unasolola utu wa zango lia Zambi, kashika uli ni tachi ja kwalumuna mwono wa atu hanga atwame kanawa. Ha yikuma yino atu kanatayiza ngwo Mbimbiliya yili Liji lia Zambi.​—Tanga 1 A-Tesalonika 2:13.

Tala chinema Kuchi Mutuhasa Kupwa ni Ushindakenyo Ngwetu Mbimbiliya Yili Yamwenemwene?

Upale wa zango lia Zambi kuli atu che chikuma chilemu cha sango jipema ja mu Mbimbiliya. Mbimbiliya yinalumbununa chize atu anakatokesa ku uputukilo kutwama cho chipema mu paraisu hano hashi, ni chize paraisu mayisalakanyisa.​—Tanga Usolwelo 21:4, 5.

Mu Liji lia Zambi nawa muli shimbi, ni yiyulo. Mu Mbimbiliya muli nawa yitanga ize Zambi apwile nayo kuli atu​—yitanga yacho yinatulongesa utu wa Zambi. Mbimbiliya muyihasa kukukwasa hanga unyingike Zambi. Yinalumbununa chize yena muhasa kupwa sepa lia Zambi.​−Tanga Masamu 19:7, 11; Tiangu 2:23; 4:8.

Kamukanda kano mukakukwasa kunyingika Mbimbiliya ha kulinga chizechene Yesu alingile. Iye te kakutongola yimwe yihanda ya mu Mbimbiliya nikuhana ulumbunwiso “hanga anyingike ye Yisoneko.”​—Tanga Luka 24:27, 45.

Yuma ize tunamono ngwe yipema yishikuhiana sango jipema ja Zambi. Alioze amwe atu keshi kujizanga, akwo kakujivwila kupiha. Yena kanda wakaula. Kutalatala che cha mwono wa mutolo chili hali yena mwene nyi wanyingika Zambi.​—Tanga Yoano 17:3.