Sakatanga wetu kali ni mana anji, kuhiana yetwe. Ngwe Tata wa zango, iye kakutufunga. Nawa iye keshi kuzanga hanga tulisongwele yetwene. (Jeremia 10:23) Chizechene ngwe ana kemba chatamba kwasongwela kuli yisemi jo, ni yetwe nawa chatamba kutusongwela kuli Zambi. (Izaia 48:17, 18) Shimbi ja maliji a mu Mbimbiliya jinaneha usongwelo mumu jili chawana cha kuli Zambi.—Tanga 2 Timoteu 3:16.

Shimbi ja Yehova jinatulongesa ndako jipema ja mwono haliapwila, jinasolola nawa chize yetwe mutuhasa kupwa ni mwono wa mutolo kulutwe lia matangwa. Zambi mwe Tangi yetu, kashika kukaula shimbi jenyi chili chipema hanga tusolole zango lietu ha usongwelo wenyi.—Tanga Masamu 19:7, 11; Usolwelo 4:11.

Shimbi ja maliji a mu Mbimbiliya jili ja umwenemwene. Ha matangwa akwo shimbi ja kutukwasa. (Shimbi Yamuchiali 22:8) Yetwe chatutamba kunyonga kanawa hanga tunyingike chize mutusa shimbi ja maliji ku mwono wetu ha ize tunapinji nayo. (Yishima 2:10-12) Ngwe chino, Mbimbiliya yinalongesa ngwo mwono uli chawana cha Zambi. Shimbi yino muyihasa kutusongwela ku milimo ni ku mazuwo jetu, hanji ha mashimbu a wenyi. Muyitusongwela hanga tufunge mwono wetu ku yuma yipi.—Tanga Yilinga 17:28.

Yesu kanakamba hakutwala ku shimbi jaali ja maliji alemu. Shimbi yitangu yinasolola upale wa mwono wa atu—kunyingika Zambi, kumuzanga, ni kumulingila ni ushishiko. Shimbi yino yitangu chatamba kuyinyonga ha yiyulo yetu yeswe. (Yishima 3:6) Waze akukaula shimbi yino mu mwono wo kakupwa masepa ja Zambi, ni uwahililo wa umwenemwene nawa makapwa ni mwono wa mutolo.—Tanga Mateu 22:36-38.

Shimbi yamuchiali muyihasa kutusongwela hanga tupwe ni sambukila ni usepa upema hali akwetu. (1 A-Korindu 13:4-7) Kukaula shimbi yino yamuchiali chinalumbunuka kwimbulula yitanga yipema ize Zambi alinayo hali atu.—Tanga Mateu 7:12; 22:39, 40.

Shimbi ja mu Mbimbiliya jinalongesa asoko chize malinunga mu zango. (A-Kolosu 3:12-14) Liji lia Zambi nawa liakufunga asoko ha kwalongesa shimbi yikwo ya usongwelo—ize yakukolesa umbachiso.—Tanga Uputukilo 2:24.

Ha kukaula malongeso a mu Mbimbiliya yetwe mutuhasa kupwa ni manyonga apema, ni kufunga kanawa upite wetu. Kashika, enya milimo kakuzanga akwa kukalakala waze atwama nikulita ni shimbi ja mu Mbimbiliya, ali ni mbunge yipema, nawa hi yileya ko. (Yishima 10:4, 26; Hepreu 13:18) Liji lia Zambi nawa linatulongesa hanga tuwahilile ha ize tulinayo ni kulemesa usepa wetu kuli Zambi kuhianyisa upite weswao.—Tanga Mateu 6:24, 25, 33; 1 Timoteu 6:8-10.

Kukaula shimbi ja mu Mbimbiliya muchihasa kukwasa mwono wetu upwe kanawa. (Yishima 14:30; 22:24, 25) Kashika kuvumbika shimbi ja Zambi hakutwala ku uzengi jakutufunga ku misongo ya ufwe ni utoji. (Yishima 23:20) Yehova kakwecha hanga tunwe walwa usasu mba alioze ndo nikulita. (Masamu 104:15; 1 A-Korindu 6:10) Shimbi ja Zambi jinatuyukisa ha kutulongesa kufunga yitanga yetu ni manyonga jetu. (Masamu 119:97-100) Akwa Kristu a umwenemwene keshi kuvumbika wika shimbi ja Zambi hanga aliyukise. Alioze ayo kakulemesa Yehova.—Tanga Mateu 5:14-16.