Wanangana Wa Zambi uli wata wa mumalilu. Muukasalakana manguvulu eswe a hashi, hanga upale wa Zambi ulingiwe hano hashi chizechene ngwe mumalilu. Jino je sango jipema ja Wanangana wa Zambi. Kwasala hakehe Wanangana wa Zambi uyukise atu waze anafupu nguvulu mupema. Nawa muukachinga atu eswe waze makatwama hano hashi.—Tanga Daniele 2:44; Mateu 6:9, 10; 24:14.

Wanangana weswe ukwete Mwata. Yehova hanasakula Mwanenyi, Yesu Kristu apwe Mwanangana mu Wanangana wenyi.​−Tanga Usolwelo 11:15.

Tala chinema Wanangana wa Zambi Yika?

Mwana wa Zambi kali Mwanangana mupema mumu iye kali chimbovu, nawa kali mukwa ululi. (Yoano 1:14) Iye nawa kali ni ndundo ja kukwasa najo atu. Mumu iye mu malilu makayula hashi heswe. Muze amuhindwishile mu ufwe, iye yaya mu malilu yatwaminyina ku kwoko lia chindume lia Yehova. (A-Hepreu 10:12, 13) Mba Zambi yamwaha wata hanga ayule.​—Tanga Daniele 7:13, 14.

Chimwe chizavu anavuluka ngwo “atu asandu” makayula chimuwika ni Yesu mumalilu. (Daniele 7:27) Asandu atangu waze Yesu asakwile kali apostolo ashishika. Ni halapwila Yehova kanasakula malunga ni mapwo asandu waze  ashishika. Ngwe chizechene Yesu anakahinduka, ni ayo kakwahindwisa ni mujimba wa spiritu.—Tanga Yoano 14:1-3; 1 A-Korindu 15:42-44.

Atu angahi waze maya mumalilu? Yesu kanakavuluka ngwo “mbunga yikepe ya mapanga.” (Luka 12:32) Ayo makapwa mu unji wa 144,000. Ayo makayula chimuwika ni Yesu hashi heswe.​—Tanga Usolwelo 14:1.

Wanangana wa Zambi unakaputuka kuyula mu mwaka wa 1914. * Mulimo utangu wa Yesu ngwe Mwanangana wapwile kumbila Satana ni andemoniu jenyi hano hashi. Satana kali ni ufwatulo wunji kashika anapinjisa atu hashi heswe. (Usolwelo 12:7-10, 12) Kashika nawa lamba lia atu hilioka chinji. Jita, zala, yikola, ni minyiko yeswe yili ‘yilayi’ ize Wanangana wa Zambi kwasala hakehe hanga ayihwise hano hashi.​—Tanga Luka 21:7, 10, 11, 31.

Ha mulimo wa kwambujola Sango lipema, Wanangana wa Zambi unachinga mbunga yinene ya atu a ku mavungu eswe. Tununu twa yimbovu ja atu kanazeyela kuli Yesu. Wanangana wa Zambi mukafunga atu jacho, muze makanongesa yuma yipi hano hashi. Mweswao unazange kuyuka ku Wanangana wa Zambi ndo alilongese chize mahasa kwononoka ni kuzeyela kuli Yesu.​—Tanga Usolwelo 7:9, 14, 16, 17.

Ha mashimbu a 1,000 a miaka, Wanangana wa Zambi muukatakanyisa upale utangu wa Zambi hali atu. Hashi heswe muhakapwa paraisu. Mba kulutwe Yesu makakunjika Wanangana kuli Tato. (1 A-Korindu 15:24-26) Yena unanyingika umwe yoze muhasa kuhanjika nenyi hakutwala ku Wanangana wa Zambi?​—Tanga Masamu 37:10, 11, 29.