Yesu kanalise ni atu eswe, iye te katwama mu malilu ni mujimba wa spiritu, muze te kanda achisemuka hano hashi. (Yoano 8:23) Iye kali chitanga chitangu cha Zambi, nawa iye kanakakwasa ha kutanga cha yuma yeswe. Iye mwe atangile kuli Yehova ukawenyi, kashika anamuvuluka ngwo Mwana “wa wika” wa Zambi. (Yoano 1:14) Yesu kanakapwa mukeji wa Zambi, kashika anamuvuluka nawa ngwo “Liji.”—Tanga Yishima 8:22, 23, 30; A-Kolosu 1:15, 16.

Zambi yatuma Mwanenyi hano hashi ha kumusa mu jimo lia umwe mwanapwo Ka-Yunda yoze anavuluka ngwo Maria te kanda achilimona ni lunga. Kashika Yesu kakapwile ni tato wa musunya. (Luka 1:30-35) Yesu kanakeza hano hashi (1) hanga atulongese umwenemwene wa Zambi, (2) hanga atuhichikile chilweza, chize mutuhasa kulinga upale wa Zambi chipwe ha matangwa a kapinda (3) hanga ahane mwono wenyi ungunu ngwe “ukuule.”—Tanga Mateu 20:28.

Ukuule uli ngwe ndando ize akufuta hanga atusule umwe mutu ku ufwe. (Kutuhuka 21:29, 30) Kufwa ni ushinakaji te hi upale ko wa Zambi kuli atu. Kuchi tunachinyingika? Zambi kanakamba kuli mutu mutangu Alama, ngwenyi, nyi iye malinga ize Mbimbiliya yinavuluka ngwo “shili,” iye  mafwa. Alama nyi te kakavulumwine kachi iye kakafwile. (Uputukilo 2:16, 17; 5:5) Mbimbiliya yinatulweze ngwo kufwa “chanjilile” hano hashi hamukunda wa Alama. Kashika Alama yapalikisa shili kuli atu eswe, kashika twakufwa. Yetwe tunafupu ukuule hanga ututusule ku kufwa chize tunakahinga kuli Alama.—Tanga A-Roma 5:12; 6:23.

Iya mahasa kufweta ukuule hanga atutusule ku kufwa? Ufwe ye fweto ya shili yetu. Kushi niumwe mutu mukwa shili mahasa kukuula akwo ku shili.​—Tanga Masamu 49:7-9.

Yesu kanalise ni yetwe mumu iye te mungunu. Kashika iye kakafwile ha shili yenyi​—iye kakavulumwine ni limwe tangwa. Alioze Yesu kafwile ha shili ya atu. Zambi yasolola zango lienyi linene kuli atu hakuhana Mwanenyi hanga afwe ha shili yetu. Yesu nawa kasolwele zango lienyi hali yetwe ha kwononoka kuli Tato, ni kuhana mwono wenyi ku shili yetu.​—Tanga Yoano 3:16; A-Roma 5:18, 19.

Tala chinema Mumu Liaka Yesu Afwile?

Muze apwile hano hashi, Yesu yawuka mieji, yahindwisa afwu, ni kulamwina atu ku upi wo. Kashika yuma yeswe ai yinasolola ize Yesu makalinga kulutwe lia matangwa, kuli atu waze akwononoka. (Mateu 15:30, 31; Yoano 5:28) Mba muze Yesu yafwa, Zambi yamuhindwisa ni mwono wa spiritu. (1 Petulu 3:18) Nawa Yesu yatwaminyina ku kwoko lia chindume lia Zambi, ndo haze Yehova yamwaha ndundo ja Mwanangana wa hashi heswe. (A-Hepreu 10:12, 13) Ha matangwa wano Yesu kanakalakala ngwe Mwanangana mu malilu, ni tumbaji jenyi noo kanambujola sango jipema hashi heswe.​—Tanga Daniele 7:13, 14; Mateu 24:14.

Kwasala hakehe, ni ndundo jenyi ngwe Mwanangana Yesu mamanyisa lamba lieswe ni waze akulineha. Eswoo ali ni ufulielo muli Yesu ni kumwononokena makatambula mwono wa mutolo mu paraisu hano hashi.​—Tanga Masamu 37:9-11.