Zambi wamwenemwene mwe watangile yuma yeswe. Iye keshi uputukilo chipwe songo. (Masamu 90:2) Sango Jipema tunawane mu Mbimbiliya jili ja Zambi. (1 Timoteu 1:11) Chatutela kuwayila Zambi, mumu iye mwe watwehele mwono.​—Tanga Usolwelo 4:11.

Niumwe mutu hanamono Zambi wakwihi, mumu iye Spiritu, chinalumbunuka ngwo mujimba wenyi hi wamusunyako, ngwe wa atu ha hano hashi. (Yoano 1:18; 4:24) Alioze, mutuhasa kunyingika utu wa Zambi ha yuma ize atangile. Ngwe chino, mihuko ni mitondo yinji yipema yinatusolwela zango ni mana ja Zambi. Unene wa malilu ni hashi unatusolwela ndundo jenyi.—Tanga A-Roma 1:20.

Mutuhasa kunyingika nawa utu wa Zambi ha kutanga Mbimbiliya. Yinatulweze yika Zambi akuzanga ni ize keshi kuzanga, ni chize iye akufunga atu, ni chize akwivwa ha yuma yeswayo.​—Tanga Masamu 103:7-10.

Yesu yamba ngwenyi: “Tata yetu nuli mu malilu, jina lienu lipwe lisandu.” (Mateu 6:9) Zambi kali ni yisanyiko yinji, alioze jina limuwika akwete. Mu malimi anji jina liacho kanalivuluka ni kulita ni malimi jo. Mu Chokwe kanalivuluka ngwo “Yehova.”​—Tanga Masamu 83:18.

Mbimbiliya jinji jina lia Zambi hanalichizamo, hanasalakanyisamo yisanyiko ngwe, Mwene, hanji Zambi. Alioze muze asonekene Mbimbiliya jina lia Zambi te mulili mu unji wa 7.000. Yesu kanakanyingikisa jina lia Zambi muze apwile ni kulongesa atu.​—Tanga Yoano 17:26.

Tala chinema Shina Zambi Jina Akwete?

Lamba lieswe tunamono linalumbunuka ngwo Yehova kali ngwe umwe Zambi yoze keshi kutunyonga nyi? Atu anji muze mamona lamba kakwamba ngwo Zambi mwe unatweseka, alioze yino yili ya mahuza.​—Tanga Tiangu 1:13.

Zambi hanase muli mutu nyonga lia kusakula ize malinga. Kashika tuchi kuwahilila ha nyonga lietu lia kusakula hanga tulingile Zambi nyi? (Yoshua 24:15) Alioze atu anji kanasakula kulinga yuma yipi hali akwo, ni kwamwesa lamba linji. Yehova kakwivwa chinyengo ha kumona uhenge wacho.​—Tanga Uputukilo 6:5, 6.

Yehova kali Zambi yoze wakutufunga. Iye kanazange hanga tuwahilile ku mwono wetu. Kwasala hakehe iye ahwise lamba lieswe ni waze akulineha. Kashika iye kali ni chitela cha kwecha lamba ha mashimbu akehe. Ha Longeso lia muchi 8, mutukalilongesa chitela chacho.​—Tanga 2 Petulu 2:9; 3:7, 13.

Yehova kanatusanyika hanga tukundame kuli iye, nawa mutuhasa kuhanjika nenyi ha kulemba chetu. Iye kakunyonga atu eswe. (Masamu 65:2; 145:18) Iye kakutukonekena. Yehova kakumona tachi jetu jize tunase hanga tumuwahilile, chipwe hanji mutwehuka. Chipwe tuli akwa shili, mutuhasa kwivwa chiseke ha kulikata ni Zambi.​−Tanga Masamu 103:12-14; Tiangu 4:8.

Yehova hanatwehe mwono, kashika tupwenu ni zango linji kuli iye kuhianyisa lize tulinalio kuli mweswao. (Marku 12:30) Kusolola zango lie kuli Zambi ndo ulilongese Mbimbiliya, hanga ulinge ize iye anazange kuli yena, mba uhase kukundama kuli iye.​—Tanga 1 Timoteu 2:4; 1 Yoano 5:3.