Muze Yehova asele ululikiso wa usoko, iye yahana kuli yisemi mulimo wa kufunga ana. (A-Kolosu 3:20) Yisemi, nuli ni mulimo wakufumba anenu hanga azange Yehova ni kukola kanawa. (2 Timoteu 1:5; 3:15) Nwatamba kunyingika yize yili mu mbunge ja anenu. Nawa, chili chilemu kwaasolwela chilweza chipema. Munuhasa kwaalongesa kanawa Liji lia Yehova, nyi chitangu yenu nwalisa mu mbunge yenu.—Masamu 40:8.

YIZE MBIMBILIYA YINAMBE: “Mutu ni mutu alipupwise kwivwa, alioze apwe makoke kuhanjika.” (Tiangu 1:19) Ana jenu ndo evwe ngwo ayo mahasa kuhanjika kanawa ni yenu. Katamba kunyingika ngwo munuhasa kwaapanjika muze mafupa kunulweza chimwe chuma. Sololenu sambukila hanga chipwe chashi kuli ayo kuhanjika yize yili ku mbunge jo. (Tiangu 3:18) Nyi mamona ngwo nuli atu akalu chinji, ayo kechi kupwa ni kunulweza yipikalo yo. Pwenu yihumikiji kuli ana jenu, ni kwalweza ngwenu nwaazanga chinji.—Mateu 3:17; 1 A-Korindu 8:1.

YIZE MUHASA KULINGA:

• Pwako hamwe ni ana je muze ayo mafupa kuhanjika

• Pwako ni kuhanjieka ni ana je matangwa eswe, hi muze wika ko ali ni yipikalo

YIZE MBIMBILIYA YINAMBE: “Yoze mapanjika ku liji mawana yipema.”—Yishima 16:20. Ha mashimbu amwe, muze ana jenu manuhanjikisa, nwatamba kunyingika kanawa yize ali ni kunyonga mu mbunge. Kanji-kanji, ana kakulumba yuma, hanji kwamba yize kuyishi shindakenyo. “Yoze makumbulula shimbu kandevwa chikuma, chapwa uhepuke.” (Yishima 18:13) Kanda ulipupula kutenuka.—Yishima 19:11.

YIZE MUHASA KULINGA:

• Kanda upatula maliji ja ane muze mahanjika, chipwe kwaatenukina, ha yize anambe

• Iwuluka muze ni yena wapwile kanuke ni yuma yize te wakunyonga ngwe yilemu

YIZE MBIMBILIYA YINAMBE: “Mwanami, panjika ku kufumba cha tatenu, kanda ulituna longeso lia noko.” (Yishima 1:8) Yehova hanahana yisemi chiyulo cha kufumba ana. Nwatamba kufumba ana jenu hanga anuvumbike ni kunwononokena. (A-Efwesu 6:1-3) Ana mahasa kumona nyi yisemi jo kalinunga “hamuwika mu kunyonga chimuwika.” (1 A-Korindu 1: 10) Nyi munulihamika ha yikuma yimwe, kanda nuchilingila kulutwe lia ana jenu, kuchina mahona kunuvumbika.

YIZE MUHASA KULINGA:

• Shimutwinenu ni kulivwashana ha chize munufumba ana jenu

• Nyi uli ni nyonga lialisa hakutwala ku kufumba ana jenu, eseka kunyingika nyonga lia yoze walimbata nenyi

YIZE MBIMBILIYA YINAMBE: “Fumba mwana mu jila yize chamutamba kuya.” (Yishima 22:6) Kufumba kanawa ana jenu kuchishi kwiza sususmuku. Nwatamba kulivwashana mwakulongesela ana jenu, ni kwaafumba. (Masamu 127:4; Yishima 29:17) Kufumba hi kulamba wika ko, alioze chinalumbunuka nawa kwakwasa ana hanga anyingike chitela cha fumbo liacho. (Yishima 28:7) Nwatamba nawa, kwaalongesa azange Liji lia Yehova ni kunyingika shimbi jatwamamo. (Masamu 1:2) Chino muchaakwasa kupwa ni mbunge yipema.—A-Hepreu 5:14.

YIZE MUHASA KULINGA:

• Pwako ni ushindakenyo ngwo ana je kananyingika ngwo Zambi kali mutu yoze ayo mahasa kujikijila

• Akwase hanga anyingike chize chatamba kwehuka yitanga yipi, yize mahasa kuwana mu internet. Alongese chize ayo mahasa kuchina yitanji