Yehova kanazange hanga tuhanjike “umwenemwene.” (Masamu 15:2) Achi chili chilemu chinji mu ulo we mba nuhase kulijikijila umwe ni mukwo. Nawa umwenemwene we wakukolesa ulo.

Musono, atu anji mu malo keshi ni umwenemwene. Kashika ni mufupa kufunga ulo we, watamba kulinga yuma yaali.

YIZE MBIMBILIYA YINAMBE: “Nukasele shindakenyo ha yuma yahiana kupema.” (A-Fwilipu 1:10) Ulo we che chuma chilemu chinji mu mwono we. Watamba kuulemesa.

Yehova kanazange utale wika hali yoze walimbata nenyi ni ‘kuwahilila’ nenyi hamuwika. (Chilumbununyi 9:9) Iye kanambe ngwenyi kanda ulengulula yoze walimbata nenyi, alioze, nwatamba kulinga yize muyineha uwahililo hakachi kenu. (1 A-Korindu 10:24) Yoze walitamba nenyi katamba kwivwa ngwenyi, kali mulemu kuli yena, nawa wamuzanga.

YIZE MUHASA KULINGA:

• Pwako ni shimbu liakupwa hamuwika ni yoze walimbata nenyi, ni kumupanjika muze mahanjika

• Nyonga ngwe “etu” hi “yami” ko

YIZE MBIMBILIYA YINAMBE: “Mweswawo matala pwo mukumuvwila usolo, halinga nenyi utanji kulu mu mbunge yenyi.” (Mateu 5:28) Nyi mutu manyonga chikolo ha utanji, iye keshi ni ululi kuli yoze alimbata nenyi.

Yehova ngwenyi watamba ‘kufunga mbunge ye.’ (Yishima 4:23; Jeremia 17:9) Kashika, watamba kufunga meso je mba ulinge chocho. (Mateu 5:29, 30) Kaula chilwezo cha kalamba Yombi yoze walingile usendo ni meso jenyi hanga ahone kutala pwo mweka ni usolo. (Yombi 31:1) Kanda upwa ni kutala pornografia. Nawa kanda uvwila usolo mutu yoze kuwalimbachile nenyi.

YIZE MUHASA KULINGA:

• Solola kuli atu eswe ngwe hiunalikase ni yoze walimbata nenyi

• Lemesa manyonga ja yoze walimbata nenyi, ni kwecha usepa weswe uze muuhasa kumunehena chinyengo