LONGESO 01

Kuchi Mbimbiliya Muyihasa Kukukwasa?

KWAZULULA

Tulieswe twakulihula hakutwala ku mwono, lamba, kufwa ni yuma ya kulutwe lia matangwa. Twakufupa nawa ukwaso wa chize mutuhasa kuhwisa kapinda, kuzuka mbongo ni kupwa ni uwahililo mu usoko. Atu anji keshi kuwana wika makumbululo a yihula yo, alioze kakuzuka nawa yiyulo yipema ya chize atamba kutwama kanawa ku mwono wo matangwa eswe. Ku nyonga lie, shina Mbimbiliya muyihasa kukwasa mutu mweswawo yoze unanyingika?

1. Yihula yika yize Mbimbiliya yakukumbulula?

Mbimbiliya yakukumbulula yihula yino yilemu: Kuchi mwono waputukile? Mumu liaka atutangile? Mumu liaka atu apema akumona lamba? Yika yakulingiwa kuli mutu nyi hafwa? Mumu liaka kwakulingiwa jita se atu eswe kakufupa sambukila? Yuma yika muyikalingiwa hano hashi? Mbimbiliya yinatukolweza hanga tufupe makumbululo a yihula yino. Tununu a tununu ja atu kakuwahilila ni makumbululo waze akuwana.

2. Kuchi Mbimbiliya muyihasa kutukwasa kuwahilila ku mwono wetu?

Mbimbiliya yakutwaha yiyulo yipema. Chakutalilaho, yakulongesa chize asoko mahasa kupwa ni uwahililo wamwenemwene. Yakutukwasa nawa kunyingika yize twatamba kulinga muze tunasakalala ni chize mutuhasa kulilongesa kuzanga mulimo wetu. Munyingika yize Mbimbiliya yakulongesa hakutwala ku yikuma ayi ni yuma yikwo nawa muze mutununga ni kulilongesa. Ni yena mwene mutayiza ngwe “Yisoneko yeswe [yuma yeswe yili mu Mbimbiliya] . . . kuyafumbuka.”—2 Timoteu 3:16.

Mukanda uno kuwasalakanyine Mbimbiliya. Alioze muukukwassa hanga uhengwole yena mwene yize Mbimbiliya yakulongesa. Kashika, tanga yisoneko yeswe yize yili ha mukanda uno ni kuyitesa ni yize unalilongesa.

NYINGIKA NAWA

Tala chize Mbimbiliya yakukwasa atu, chize muwahilila ha kuyitanga, ni mumu liaka chili chilemu kutambula ukwaso hanga unyingike yize Mbimbiliya yakulongesa.

3. Mbimbiliya muyihasa kutusongwela

Mbimbiliya yapwa ngwe ndeya. Muyihasa kutukwasa kukwata yiyulo yipema ni kutukwasa nawa kunyingika yize muyikalingiwa kulutwe lia matangwa.

Tanga Samu 119:105, mba nushimutwine yihula yino:

Yika mukwa-kusoneka maliji wano te akunyonga hakutwala ku Mbimbiliya?
Yika wakunyonga hakutwala ku Mbimbiliya?

4. Mbimbiliya muyihasa kukumbulula yihula yino

Umwe pwo kanakawana mu Mbimbiliya makumbululo a yihula yilemu yize te yakumupinjisa ha miaka yinji. Tala CHINEMA, mba nushimutwine yihula yinahateho.

CHINEMA: Kanda Tuhonga Kutalatala!—Doris Eldred (1:48)

Kulita ni chinema, yihula yika pwo twamonaho apwile nayo?
Kuchi kulilongesa Mbimbiliya chamukwashile?

Mbimbiliya yinatukolweza tulieswe hanga tupwe ni kuhula. Tanga Mateu 7:7, mba nushimutwine chihula chino:

Yihula yika yakukupinjisa yize Mbimbiliya muyihasa kukumbulula?

5. Muhasa kuwahilila ha kutanga Mbimbiliya

Atu anji kakuwahilila ha kutanga Mbimbiliya nawa kakuyuka chinji ha kuchilinga. Tala CHINEMA, mba nushimutwine yihula yinahateho.

CHINEMA: Kutanga Mbimbiliya (2:05)

Kulita ni chinema, kuchi akweze anji akwivwa ha kutanga Mbimbiliya?
Mba mumu liaka nyonga lio lialumuka hakutwala ku kutanga Mbimbiliya?

Mbimbiliya yinambe ngwo muyihasa kutwaha usongwelo uze muututakamisa ni kutwaha kutalatala. Tanga A-Roma 15:4, mba nushimutwine chihula chino:

Shina wakuzanga yilakenyo ya mu Mbimbiliya yize yakutwaha utakamiso ni kutalatala chipema?

6. Akwetu mahasa kutukwasa kunyingika Mbimbiliya

Atu waze akutanga Mbimbiliya ukawo, kakumona ngwo, kushimutwina Mbimbiliya ni akwo chakukwasa chinji. Tanga Yilinga 8:26-31, mba nushimutwine chihula chino:

Kuchi mutuhasa kunyingika kanawa Mbimbiliya?—Tala versu 30 ni 31.

Lunga Ka-Etiopia kafupiwile ukwaso hanga anyingike ulumbunwiso wa Mbimbiliya. Atu anji musono kakumona ngwo, kushimutwina Mbimbiliya ni akwo chakukwasa chinji

ATU AMWE KAKWAMBA NGWO: “Kulilongesa Mbimbiliya chili kukisa mashimbu.”

Yika muhasa kwamba ha chikuma chino? Mumu liaka?

YIZE WALILONGESA

Mbimbiliya yakutwaha yiyulo yipema ya chize twatamba kutwama ku mwono wetu matangwa eswe. Yakukumbulula yihula yilemu ni kutwaha usongwelo uze muututakamisa ni kutwaha kutalatala.