LONGESO 11

Kuchi Muhasa Kuyuka ha Kutanga Mbimbiliya?

KWAZULULA

Shina hiunanyongo kama kuputuka kulinga umwe mulimo mba yiumona ngwe uli ukalu chinji? Muhasa kuteta mulimo wacho mu milimo yikehe-yikehe mba ukwashiwile. Chino muhasa nawa kuchilinga muze muzanga kutanga Mbimbiliya. Alioze muhasa kulihula ngwe, ‘Halihi munguputukila?’ Ha longeso lino, mutushimutwina yuma yimwe yikehe-yikehe yize muhasa kulinga hanga yikukwase kulivwisa kuwaha muze unatange Mbimbiliya.

1. Mumu liaka twatamba kutanga Mbimbiliya matangwa eswe?

Mutu yoze wakutanga Mbimbiliya hanji ngwetu “shimbi ja Yehova” kakuwahilila ku mwono. (Tanga Samu 1:1-3.) Ku uputukilo, tanga-tanga ha mashimbu akehe hita tangwa. Muze munyingika kanawa Liji lia Zambi, muzanga chinji kutanga Mbimbiliya.

2. Yika muyihasa kutukwasa kuyuka ha kutanga Mbimbiliya?

Twatamba kumana yimwe ndambu ni kunyonga ha yize tunatange mba tuyuke muze tunatange Mbimbiliya. Twatamba kutanga ni ‘kupukuna’ ha yize tunatange. (Yoshua 1:8) Muze unatange lihule ngwe: ‘Yika chino chinangulongesa hali Yehova? Kuchi munguhasa kukaula yuma yino ku mwono wami? Kuchi munguhasa kuzachisa versu yino hanga ngukwase akwetu?’

3. Kuchi muhasa kusa mashimbu hanga utange Mbimbiliya?

Shina wakusa tachi hanga uwane mashimbu a kutanga Mbimbiliya? Anji a kuli yetu che twakulinga, ha kuzachisa kanawa mashimbu jetu. (A-Efwesu 5:16) Muhasa kulinga chino, ha kusakula ola yimwe ha tangwa hanga utange Mbimbiliya hita tangwa. Atu amwe kakuzanga kutanga Mbimbiliya chimenemene. Eka nawa kakuzanga kutanga mwalwa ha mashimbu a kulia. Akwo kakuzanga kutanga ufuku shimbu kanda achiya ni kupomba. Mba ena, mashimbu aka wakuzanga kutanga?

NYINGIKA NAWA

Nyingika chize muhasa kulivwisa kuwaha ha kutanga Mbimbiliya. Tala chize muhasa kulilulieka mba uyuke ha longeso lie lia Mbimbiliya.

Mutuhasa kuzanga kutanga Mbimbiliya ngwe chizechene twakuzanga kulia kulia chipema chalisa

4. Lilongese chize muhasa kulivwisa kuwaha ha kutanga Mbimbiliya

Muchihasa kupwa chikalu kuputuka kutanga Mbimbiliya. Muhasa kuzanga kutanga Mbimbiliya ngwe chizechene wakuzanga kulia kulia chipema chize kanda ulia kama. Tanga 1 Petulu 2:2, mba nushimutwine chihula chino:

Shina kutanga Mbimbiliya matangwa eswe, muchihasa kukukwasa kuyizanga chinji?

Tala CHINEMA umone yize yakwashile atu amwe kuzanga kutanga Mbimbiliya, mba hanyima nushimutwine yihula yinahateho.

CHINEMA: Akweze Waze Akuzanga Liji Lia Zambi (5:33)

Kulita ni chinema, kapinda muka akweze akupalika?
Yika yakwakwasa kulihulikila ha kutanga Mbimbiliya?
Yika alingile mba azange kutanga chinji Mbimbiliya?

Yuma yize muyihasa kukukwasa:

Sakula Mbimbiliya yize yikwete maliji ashi. Nyi muchilita zachisa Tradução do Novo Mundo nyi yili mu limi lienu.
Putuka ni kutanga chihanda cha Mbimbiliya chize wakuzanga chinji. Wana ukwaso ha mushete “Putuka kutanga Mbimbiliya.”
Pwako ni kusoneka yize unatange. Kashika, zachisa mushete unambe ngwo “Kutanga che cha Mbimbiliya.”
Zachisa JW Library^®app. Nyi wapwa ni JW Library mu telefone, muhasa kutanga hanji kupanjika maliji a kukopa a Mbimbiliya ku chihela cheswacho muopwa.
Zachisa apendice yili mu Mbimbiliya Tradução do Novo Mundo. Mu apendice yacho muli mapa, gráfico ni glossário yize muyihasa kukukwasa muze unatange Mbimbiliya.

5. Lulieka longeso lie lia Mbimbiliya

Tanga Samu 119:34, mba nushimutwine chihula chino:

Mumu liaka chili chilemu kulemba shimbu kanda uputuka kutanga hanji kululieka longeso lie lia Mbimbiliya?

Kuchi muhasa kuyuka chinji ha hita longeso lia Mbimbiliya? Muze unalulieka hita longeso ha mukanda uno, eseka kulinga chino:

Tanga maparagrafu ku uputukilo wa hita longeso.
Tanga chisoneko chili helu ni kunyonga chize chisoneko chacho chinalite ni yuma yize unalilongesa.
Funjeka yikuma yilemu yize yinakumbulula chihula cha hita paragrafu. Chino muchikukwasa muze mukalilongesa ni longeshi ye.

Unachinyingika nyi?

Etu Yela ja Yehova twakuzachisa Mbimbiliya jinji jalisa. Alioze, twakuzanga chinji Tradução do Novo Mundo mumu yalita, yili yashi nawa yakuzachisa jina lia Zambi.—Tala Lusango wa ha internet unambe ngwo “Shina Yela ja Yehova Kakwete Mbimbiliya yo?”

ATU AMWE KAKWAMBA NGWO: “Kulilongesa Mbimbiliya chapwa chikalu chinji. Hanji ngwo keshi ni mashimbu ni tachi ja kuchilinga.”

Mba ena kuchi wakunyonga?

YIZE WALILONGESA

Linga katalilo wa kutanga Mbimbiliya. Pwako ni mashimbu a kulemba mba yuma yize unatange yikulumbunuke kanawa. Chikwo nawa, lulieka kanawa malongeso je a Mbimbiliya.