LONGESO 19

Shina Yela ja Yehova e Akwa-Kristu Amwenemwene?

KWAZULULA

Etu Yela ja Yehova twakutayiza ngwetu tuli akwa-Kristu amwenemwene. Mumu liaka? Nyingika yuma yize twafuliela, jina lize twambata ni zango lize tukwete hali umwe ni mukwo.

1. Hali yakukatuka yuma yize Yela ja Yehova akufuliela?

Yesu yamba ngwenyi: ‘Liji lia Zambi we umwenemwene.’ (Yoano 17:17) Yela ja Yehova kakufuliela ha Liji lia Zambi ngwe chize Yesu alingile. Tala chize twakuchilinga chize ku mashimbu a kunyima. Ha mwaka 1870, chimwe chizavu chikehe cha alongi a Mbimbiliya yichiputuka kulilongesa kanawa Mbimbiliya hanga anyingike yize yakulongesa. O yaputuka kufuliela ha yize Mbimbiliya yakwamba, chipwe ngwe longeso limwe mulilisa ni yize mayingeleja akulongesa. Hachino, yaputuka kuhanjika ni atu akwo yuma yize te analilongesa. a

2. Mumu liaka twakulivuluka ngwetu tuli Yela ja Yehova?

Yehova kakuvuluka tuvumbi twenyi ngwenyi yela jenyi mumu o kakuhanjika umwenemwene hakutwala kuli iye. (A-Hepreu 11:4–12:1) Chakutalilaho, ku mashimbu akunyima, Zambi yamba kuli tuvumbi twenyi ngwenyi: “Enu nuli yela jami.” (Tanga Izaia 43:10.) Yesu kakumuvuluka ngwo, “Chela wamwenemwene.” (Usolwelo 1:5) Kashika, kukatuka ha mwaka 1931, yitulivuluka ngwetu Yela ja Yehova. Chili kuyuka chinene kuli yetu kumbata jina lino.

3. Kuchi Yela ja Yehova akwimbulula zango lia Yesu?

Yesu kazangile chinji tumbaji twenyi, kuli iye o kapwile ngwe asoko jenyi. (Tanga Marku 3:35.) Chizechene nawa, Yela ja Yehova no kali umwe usoko walinunga wa hashi heswe. Kashika twakulivuluka ngwetu tuli mandumbu. (Fwilimu 1, 2) Twakwononokena nawa shimbi yino: “Zangenu mandumbu.” (1 Petulu 2:17) Yela ja Yehova kakusolola zango liacho mu majila alisa, ngwe kukwasa mandumbu jo a hashi heswe muze anafupiwa ukwaso.

NYINGIKA NAWA

Nyingika nawa lusango wa Yela ja Yehova hanga upwe ni shindakenyo ngwe o kali akwa-Kristu amwenemwene.

Ufulielo wa akwa-Kristu amwenemwene wakukatuka mu Mbimbiliya. Chikwo nawa, kakuhanjika ni akwo hakutwala ku Mbimbiliya

4. Yuma yize twafuliela yakukatuka mu Mbimbiliya

Yehova kaliangile kwamba ngwenyi, umwenemwene wa mu Mbimbiliya muuya ni kutemuka. Tanga Daniele 12:4, mba nushimutwine chihula chino:

Yuma yika te ‘muyiliwezela’ hakachi ka tuvumbi twa Zambi ha kuhengwola Mbimbiliya?

Nyingika chize chimwe chizavu cha alongi a Mbimbiliya hamwe ni Charles Russell, alilongesele Mbimbiliya. Tala CHINEMA, mba nushimutwine chihula chinahateho.

CHINEMA: Chize Awanyine Cheka Umwenemwene wa mu Mbimbiliya (7:45)

Kulita ni chinema, kuchi Charles Russell ni atu akwo apwile ni kulilongesa Mbimbiliya?

Unachinyingika nyi?

Ha mashimbu amwe twakululieka ulumbunwiso umwe wa Mbimbiliya. Mumu liaka? Chizechene ngwe tangwa liakuvumbuka ni kupanguka hakehe-hakehe mba yuma yiputuke kusoloka kanawa, Yehova neye kakuhana ulumbunwiso wa Liji lienyi hakehe-hakehe. (Tanga Yishima 4:18.) Mbimbiliya kuyishi kwalumuka, alioze muze twakuwana ulumbunwiso walita, twakululieka ulumbunwiso uze te twakulilongesa.

5. Twatwama kulita ni jina lize twambata

Mumu liaka tunakasakula jina, Yela ja Yehova? Tala CHINEMA, mba nushimutwine yihula yinahateho.

CHINEMA: Jina Lize Liakutunyingikisa (2:40)

Mumu liaka jina, Yela ja Yehova linalite?

Mumu liaka Yehova asakwile atu hanga apwe yela jenyi? Mumu lia mahuza anji waze atu akuhanjika hali Yehova, Yela ja Yehova kakumunyingikisa ngwe Zambi wamwenemwene. Tala wika malongeso aali a mahuza.

Mayingeleja amwe kakulongesa atu jo ngwo, Zambi kanazange hanga azachise tuponya mu uwayilo wo. Shina au uli umwenemwene? Tanga Ulevi 26:1, mba nushimutwine yihula yino:

Umwenemwene uka wevwa mu chisoneko achi? Kuchi Yehova akwivwa hakutwala ku kuzachisa tuponya?

Mayingeleja amwe kakulongesa ngwo Yesu ni Zambi kali mutu umuwika. Shina au uli umwenemwene? Tanga Yoano 20:17, mba nushimutwine yihula yino:

Umwenemwene uka wevwa mu chisoneko achi? Shina Zambi ni Yesu kali mutu umuwika?
Kuchi wakwivwa ha kunyingika ngwe Yehova kakutuma Yela jenyi hanga ambujole umwenemwene hakutwala kuli iye ni Mwanenyi?

6. Twakulizanga umwe ni mukwo

Mbimbiliya yakutesa akwa-Kristu ngwe mujimba wa mutu. Tanga 1 A-Korindu 12:25, 26, mba nushimutwine yihula yino:

Yika akwa-Kristu amwenemwene atamba kulinga muze mandumbu jo anamono lamba?
Shina wakumona zango hakachi ka Yela ja Yehova?

Muze Yela ja Yehova ku chihela chimwe anamono lamba, mandumbu jo a hashi heswe kakulihana kawashi-washi hanga aakwase. Tala chilweza chimuwika, tala CHINEMA, mba nushimutwine chihula chinahateho.

CHINEMA: Chijimbi Matthew Chize Chinakalingiwa mu Haiti (5:29)

Kuchi tachi jize Yela ja Yehova akusa hanga akwase akwo jakusolola zango lio?

Akwa-Kristu amwenemwene kakusolola zango hali atu waze anamono lamba

ATU AMWE KAKWAMBA NGWO: “Yingeleja ya Yela ja Yehova yili yaha.”

Ha mashimbu aka Yehova aputukile kusanyika tuvumbi twenyi ngwenyi yela?

YIZE WALILONGESA

Yela ja Yehova kali akwa-Kristu amwenemwene. Tuli umwe usoko wa mandumbu a hashi heswe waze akufuliela mu Mbimbiliya ni kwambujola umwenemwene hakutwala kuli Yehova.