LONGESO 23
Upapachiso—Chuma Chize Chahiana Ulemu!
Yesu kalongesele ngwenyi, akwa-Kristu eswe katamba kwapapachisa. (Tanga Mateu 28:19, 20.) Upapachiso yika unalumbunuka? Yika mutu atamba kulinga mba amupapachise?
1. Upapachiso yika unalumbunuka?
Liji “upapachiso” linakatuka mu limi lia Ngregu lize linalumbunuka “kushimbama” mu meya. Muze Yesu amupapachishile, kanjilile mweswe mu lwiji Yordau, hazehene ‘yatutuka mu meya.’ (Marku 1:9, 10) Chizechene nawa, akwa-Kristu amwenemwene muze akwapapachisa no kakwanjisa mu meya.
2. Upapachiso yika wakusolola?
Muze mutu akumupapachisa kakusolola ngwenyi kalihana kuli Yehova. Kuchi mutu akulihana kuli Yehova? Shimbu mutu kanda achimupapachisa, kakulianga kulemba kuli Yehova ni kumulakenya ngwenyi, mamulingila ku mwono wenyi weswe. Iye kakulakenya ngwenyi mawayila wika Yehova ni kupwisa upale wenyi chuma chilemu ku mwono wenyi. Kakusakula “kulituna iye mwene, . . . akaule” malongeso ni chilweza cha Yesu. (Mateu 16:24) Kulihana ni upapachiso chakukwasa mutu kupwa ni usepa upema ni Yehova ni mandumbu jenyi.
3. Yika mutu atamba kulinga shimbu kanda achimupapachisa?
Shimbu kanda achikupapachisa, chili chilemu kulilongesa hakutwala kuli Yehova ni kufuliela muli iye. (Tanga A-Hepreu 11:6.) Muze chinyingi ni ufulielo we muukola, zango lie hali Yehova nelio mulikola. Chikwo nawa, muzanga kwambujola hakutwala kuli Yehova ni kutwama kulita ni shimbi jenyi. (2 Timoteu 4:2; 1 Yoano 5:3) Muze mutu maputuka kwenda “ngwe chinatela Mwene mu upemeno weswe,” iye mahasa kukwata chiyulo cha kulihana kuli Yehova ni kumupapachisa.—A-Kolosu 1:9, 10. a
NYINGIKA NAWA
Tala yize mutuhasa kulilongesa ha upapachiso wa Yesu ni chize mutu mahasa kulilulieka hanga neye amupapachise.
4. Mutuhasa kulilongesa yuma yinji ha upapachiso wa Yesu
Tanga Mateu 3:13-17 hanga unyingike yuma yeswe mu yimako-yimako hakutwala ku upapachiso wa Yesu, mba nushimutwine yihula yino:
-
Shina Yesu kamupapachishile shimbu te uchili kanuke?
-
Kuchi upapachiso wenyi wapwile? Shina kamunjishile mweswe mu meya?
Yesu kaputukile kulinga mulimo uze Zambi amuhele hano hashi muze amupapachishile. Tanga Luka 3:21-23 ni Yoano 6:38, mba nushimutwine chihula chino:
-
Muze Yesu amupapachishile, mulimo uka asele kulutwe lia yuma yeswe ku mwono wenyi?
5. Upapachiso uli chuma chize muhasa kulinga
Nyonga lia kulihana ni kukupapachisa mulihasa kukuvwisa woma. Alioze sako tachi hanga ukole ku ufulielo ndo haze mumwena ngwe hiwalilulieka hanga ukwate chiyulo chino chilemu. Nyi unazange kumona chize atu amwe achilingile, tala CHINEMA.
Tanga Yoano 17:3 ni Tiangu 1:5, mba nushimutwine chihula chino:
-
Yika muyihasa kukwasa mutu kulilulieka hanga amupapachise?
-
Twakulihana kuli Yehova ha kulemba kuli iye ni kumulakenya ngwetu mutumulingila ku mwono wetu weswe
-
Muze akutupapachisa, twakusolola ku mbunga ngwetu twalihana kuli Yehova
6. Upapachiso wakukwasa mutu kupwa mu usoko wa Yehova
Muze akutupapachisa, twakupwa mu usoko wa Yehova uze walinunga wa hashi heswe. Chipwe ngwe tuli a ku minyachi yalisa, nihindu tulieswe twakukaula ni kufuliela shimbi jimuwika. Tanga Samu 25:14 ni 1 Petulu 2:17, mba nushimutwine chihula chino:
-
Kuchi upapachiso wakukwata ha usepa wa mutu ni Yehova hamwe ni mandumbu jenyi?
ATU AMWE KAKWAMBA NGWO: “Ami kanda nguchijama ni kungupapachisa.”
-
Nyi chenacho wakunyonga, kutala mununga ni kulilulieka hanga kulutwe akakupapachise?
YIZE WALILONGESA
Yesu kalongesele ngwenyi, akwa-Kristu eswe katamba kwapapachisa. Mutu katamba kufuliela chinji muli Yehova, kutwama kulita ni shimbi jenyi ni kulihana kuli Iye mba amupapachise.
Kuhitulula
-
Upapachiso yika unalumbunuka? Mumu liaka upapachiso uli ulemu?
-
Kulihana ni upapachiso yika yakusolola?
-
Yuma yika mutu atamba kulinga shimbu kanda achilihana kuli Yehova ni kumupapachisa?
HENGWOLA NAWA
Nyingika yize upapachiso unalumbunuka ni yize kuwalumbunukine.
Hitulula yikuma yize muyikukwasa kukola ku ufulielo ni kukupapachisa.
“Zango ni Kusakwila Yehova Yakukwasa Mutu Hanga Amupapachise” (Kaposhi wa Kutalila wa Março 2020)
Tala chize umwe lunga akwachile chiyulo chalita cha kumupapachisa.
Nyingika mumu liaka upapachiso uli chuma chahiana ulemu ni chize muhasa kulilulieka hanga akupapachise.
“Shina katamba kungupapachisa?” (Makumbululo a Yihula Yize Akweze Akuhula, Volume 2, Kapitulu 37)
a Nyi ngwe mutu kaliangile kumupapachisa mu yimwe yingeleja, katamba kumupapachisa cheka. Mumu liaka? Mumu mu mayingeleja keshi kulongesamo umwenemwene wa mu Mbimbiliya.—Tala Yilinga 19:1-5 ni Longeso 13.
