LONGESO 26
Mumu Liaka Kwakulingiwa Yuma Yipi ni Lamba?
Muze kwakulingiwa yuma yipi, kanji-kanji atu kakulihula ngwo: “Mumu liaka chino chalingiwa?” Chili kuyuka chinene kunyingika kumbululo lia Mbimbiliya hakutwala ku chikuma chino!
1. Yika Satana alingile mba yuma yipi yiputuke kulingiwa hano hashi?
Satana Ndiapu kehukile Zambi. Satana kazangile kuyula akwo, chocho yapiangula Alama ni Eva hanga apwe sali lienyi. Satana kalingile chino ha kwonga Eva. (Uputukilo 3:1-5) Iye yalingisa Eva hanga anyonge ngwe, Yehova kanakaaswekela chimwe chuma chipema. Satana yasolola ngwe atu mawahilila nyi mecha kwononokena Zambi. Satana kahanjikile mahuza atangu muze alwezele Eva ngwenyi kechi kufwa. Kashika Mbimbiliya yakuvuluka Satana ngwo, “mukwa mahuza ni mwe tato ya mahuza.”—Yoano 8:44.
2. Yika Alama ni Eva asakwile kulinga?
Yehova kahanyine yuma yinji kuli Alama ni Eva. Iye kaalwezele ngwenyi, ku mitondo yeswe ya mu munda wa Endene mahasa kulia, kuchizako mutondo umuwika. (Uputukilo 2:15-17) Alioze o yasakula kulia ku mutondo wacho. Eva ‘yahelako muhuko, yalia’ mba Alama “neye yalia.” (Uputukilo 3:6) O eswe yehuka Yehova. Amu Alama ni Eva apwile angunu, o katambile kulinga yuma yalita. Alioze muze ehukile Zambi, kavulumwine kuli iye ni kulituna chiyulo chenyi. Chiyulo chize akwachile chaanehenene lamba linji.—Uputukilo 3:16-19.
3. Kuchi chiyulo cha Alama ni Eva chakwachile hali yetu?
Muze Alama ni Eva avulumwine, yapwa yihenge. Hachino, ana jo eswe yahinga uhenge wacho. Kashika Mbimbiliya yakuhanjika hali Alama ngwo: “Chizechene ngwe kuli mutu umuwika shili yanjilile hano hashi, ni ku shili kufwa chanjilile; chocho kufwa chahetele kuli atu eswe.”—A-Roma 5:12.
Kuli yuma yinji yize yakutukokela lamba. Mashimbu amwe twakumona lamba mumu lia chimwe chiyulo chipi chize twakwata. Ha mashimbu eka twakumona lamba mumu lia yiyulo yipi yize akwetu akukwata. Ha mashimbu akwo nawa twakumona lamba mumu lia kupwa ha chihela chipi ni ola yipi.—Tanga Chilumbununyi 9:11.
NYINGIKA NAWA
Nyingika mumu liaka tuli ni shindakenyo ngwetu, lamba lize twakumona hi Zambi ko wakutukokelalio. Nyingika nawa chize iye akwivwa muze akutumona tunapalika mu lamba.
4. Yoze wakutukokela lamba
Atu anji kakunyonga ngwe Zambi mwe unayulu hashi. Shina au uli umwenemwene? Tala CHINEMA.
Tanga Tiangu 1:13 ni 1 Yoano 5:19, mba nushimutwine chihula chino:
-
Shina lamba lize twakumona Zambi mwe wakutukokelalio?
5. Yuma yize yakulingiwa chize haze Satana aputukile kuyula
Tanga Uputukilo 3:1-6, mba nushimutwine yihula yino:
-
Mahuza aka Satana ahanjikile?—Tala versu 4, 5.
-
Kuchi Satana alingishile hanga Alama ni Eva anyonge ngwe Yehova kanakaaswekela chimwe chuma chipema?
-
Kulita ni maliji a Satana, shina atu kanafupiwa ukwaso wa Yehova mba awahilile?
Tanga Chilumbununyi 8:9, mba nushimutwine chihula chino:
-
Ha shimbu lieswali Yehova keshi ni kuyula hashi, yuma yika yakulingiwaho?
-
Alama ni Eva kapwile atu angunu waze te atwama mu Paraisu. Alioze yapanjika kuli Satana ni kwehuka Yehova
-
Muze Alama ni Eva ehukile Zambi, shili, lamba ni kufwa yiyinjila hashi
-
Yehova makahwisa shili, lamba ni kufwa. Atu makapwa nawa angunu ni kutwama mu Paraisu
6. Yehova kakulihulumba ha lamba lietu
Shina Yehova kakulihulumba ha lamba lize twakumona? Tala yize Mwanangana Ndawichi ni postolo Petulu asonekene. Tanga Samu 31:7 ni 1 Petulu 5:7, mba nushimutwine chihula chino:
-
Kuchi wakwivwa ha kunyingika ngwe Yehova kakumona ni kulihulumba ha lamba lietu?
7. Zambi makahwisa lamba lieswe
Tanga Izaia 65:17 ni Usolwelo 21:3, 4, mba nushimutwine chihula chino:
-
Mumu liaka chili chipema kunyingika ngwo, Yehova makahwisa yuma yeswe yipi yize yakumwesa atu lamba?
Unachinyingika nyi?
Muze Satana ahanjikile mahuza atangu, iye kalamikijine Yehova. Hanji ngwetu kapihishile lufuma wa jina lia Yehova ni kulingisa atu hanga anyonge ngwo Yehova keshi nguvulu mupema. Muze Yehova makahwisa yuma yeswe yipi, makapemesa jina lienyi. Mu maliji akwo, Yehova makasolola ngwenyi unguvulu wenyi we wika walita. Kufumanyisa jina lia Yehova chili chuma chilemu chinji mu malilu ni hashi.—Mateu 6:9, 10.
ATU AMWE KAKWAMBA NGWO: “Lamba lize twakumona, Zambi mwe wakutumwesalio.”
-
Yika muhasa kwamba?
YIZE WALILONGESA
Satana Ndiapu, Alama ni Eva e akokele lamba lieswe lize twakumona hano hashi. Yehova kakulihulumba ha lamba lietu, kashika kwasala hakehe mahwisa lamba lieswe hano hashi.
Kuhitulula
-
Mahuza aka Satana ahanjikile kuli Eva?
-
Kuchi uhulia wa Alama ni Eva unakwate hali yetu musono?
-
Kuchi tunanyingika ngwetu, Yehova kakulihulumba ha lamba lietu?
HENGWOLA NAWA
Nyingika ulumbunwiso wa mu Mbimbiliya hakutwala ku shili.
Nyingika nawa hakutwala ku chikuma chize Satana Ndiapu ahanjikile mu munda wa Endene.
“Mumu Liaka Zambi Akwecha Kupwe Lamba?” (Kaposhi wa Kutalila 1 wa Janeiro, 2014)
Tala kumbululo lia utakamiso lia chimwe chihula chikalu chinji.
“Mumu liaka Zambi Kakanjishile Holocausto?” (Lusango wa ha internet)
Tala yuma yize umwe lunga alilongesele hakutwala ku lamba lize apwile ni kumona.
