LONGESO 30
Afu Makahinduka!
Kufwa chakuneha lamba ni yinyengo. Kashika Mbimbiliya yakuvuluka kufwa ngwo, mukwa-kole. (1 A-Korindu 15:26) Ha Longeso 27 unakalilongesaho ngwe, Yehova makahwisa kufwa. Mba yika muyikalingiwa kuli waze hanafu? Ha longeso lino mulilongesaho hakutwala ku chilakenyo chikwo chipema cha Yehova—iye makahindwisa tununu a tununu twa atu hanga akatwame ku miaka ya mutolo. Shina chino muchikalingiwa lume? Shina atu waze makahindwisa, makatwama mu malilu nyi hano hashi?
1. Yika Yehova analakenya kulinga hali asoko jetu waze hanafu?
Yehova kanalakenya kuhindwisa atu waze hanafu. Umwe lunga washishika avuluka ngwo Yombi, kapwile ni shindakenyo ngwenyi chipwe ngwe mafwa Yehova kechi kamuvulama. Iye yamba kuli Zambi ngwenyi: “Musanyika mba mungukumbulula [mu fuka].”—Tanga Yombi 14:13-15.
2. Kuchi tunanyingika ngwetu, afu makahinduka?
Muze Yesu apwile hano hashi, Zambi kamuhele ndundo ja kuhindwisa afu. Yesu kahindwishile umwe mwana-pwo wa miaka 12, ni mwana wa umwe tuliwa. (Marku 5:41, 42; Luka 7:12-15) Kulutwe, sepa lienyi Lazaru yafwa. Chipwe ngwe kwapalikile matangwa awana hanyima lia kumufunda, Yesu yamuhindwisa. Muze Yesu alembele kuli Zambi, yakololoka ni liji linene ngwenyi: “Lazaru tuhukamo.” Hachino “mufu yatuhuka” ni mwono! (Yoano 11:43, 44) Achinyonga ha chiseke chize asoko ni masepa ja Lazaru evwile!
3. Kutalatala chika tulinacho hali asoko jetu waze hanafu?
Mbimbiliya yinalakenya ngwo: “Kumukukapwa uhindukilo.” (Yilinga 24:15) Atu waze Yesu ahindwishile ku kufwa kakayile mu malilu. (Yoano 3:13) Atu jacho kanungine hano hashi ni uwahililo. Chizechene nawa, kwasala hakehe Yesu mahindwisa tununu a tununu twa atu hanga atwame mu paraisu hano hashi ndo ku miaka ya mutolo. Iye kambile ngwenyi, “waze eswe ali mu mafuka”—waze ali mu manyonga ja Zambi chipwe ngwe yetu hitunaavulama, makahinduka.—Yoano 5:28, 29.
NYINGIKA NAWA
Hengwola mu Mbimbiliya hanga unyingike mumu liaka tuli ni shindakenyo ngwetu, Yesu kakwete ndundo ja kuhindwisa atu waze hanafu. Nyingika chize uhindukilo muuhasa kukutakamisa ni kukwaha kutalatala.
4. Yesu kasolwele ngwenyi mahasa kuhindwisa afu
Nyingika nawa yize Yesu alingile hali sepa lienyi Lazaru. Tanga Yoano 11:14, 38-44, mba nushimutwine yihula yino:
-
Kuchi tunanyingika ngwetu chamwenemwene lume Lazaru kafwile?—Tala versu 39..
-
Nyi chamwenemwene lume Lazaru kayile mu malilu, kachi Yesu kamuhilwishile nawa hano hashi?
5. Atu anji makahinduka!
Tanga Samu 37:29, mba nushimutwine chihula chino:
-
Kulihi makatwama atu waze makahinduka?
Yesu makahindwisa atu waze akuwayila Yehova ni atu akwo nawa. Tanga Yilinga 24:15, mba nushimutwine chihula chino:
-
Iya yoze unazange hanga ukamone cheka?
Achinyonga hachino: Yesu mahasa kuhindwisa mutu mu ufwe, ngwe chizechene umwe chisemi akuhindwisa mwanenyi mu tulo
6. Uhindukilo muuhasa kukutakamisa ni kukwaha kutalatala
Lusango wa mwana wa Yaru kakutakamisa ni kukolweza atu anji waze anamono lamba. Tanga lusango wacho ha mukanda wa Luka 8:40-42, 49-56.
Shimbu te Yesu kanda achihindwisa mwana wa Yaru, yalweza chisemi cha mwana wacho ngwenyi: “Kanda wivwa woma; fuliela lume.” (Tala versu 50.) Kuchi kutalatala cha uhindukilo muchihasa kukukwasa muze . . .
-
mutu yoze wazanga chinji mafwa?
-
mwono we uli mu ponde?
Tala CHINEMA, mba nushimutwine chihula chinahateho.
-
Kuchi kutalatala cha uhindukilo chatakamishine yisemi ja Phelicity?
ATU AMWE KAKWAMBA NGWO: “Chili chikalu kutayiza ngwo, atu waze hanafu makahinduka.”
-
Mba ena kuchi wakunyonga?
-
Chisoneko chika chize muhasa kuzachisa hanga ulweze umwe mutu ngwe, afu makahinduka?
YIZE WALILONGESA
Mbimbiliya yinalakenya ngwo, tununu a tununu twa atu waze hanafu kumakahinduka. Yehova kanazange hanga afu apwe nawa ni mwono, kashika ahanyine ndundo kuli Yesu hanga akaahindwise.
Kuhitulula
-
Kuchi Yehova ni Yesu akwivwa ha chikuma cha kuhindwisa atu waze hanafu?
-
Shina tununu twa atu waze makahindwisa, makatwama mu malilu nyi hano hashi? Mumu liaka wakumbulula chocho?
-
Yuma yika yakukwaha shindakenyo ngwe, mukalimona cheka ni atu waze hanafu?
HENGWOLA NAWA
Nyingika yuma yize muhasa kulinga nyi wafwisa umwe mutu.
Shina shimbi ja Mbimbiliya mujihasa lume kukwasa mutu yoze wafwisa?
Yika twanuke mahasa kulinga nyi mafwisa mutu yoze azanga chinji?
Shina kuli atu waze makahindwisa hanga akatwame mu malilu? Aya waze kechi kahindwisa?
