LONGESO 38
Sakwilila ha Chawana cha Mwono
Kuli yuma yinji yize mutuhasa kulinga ni kuwahilila mumu tuli ni mwono. Chipwe ngwe mutupalika mu umwe ukalu, nihindu kwakupwa yuma yikwo yize yakutuvwisa kuwaha. Kuchi mutuhasa kusolola ngwetu twakusakwilila ha chawana cha mwono? Mumu liaka twatamba kuchilinga?
1. Mumu liaka twatamba kulemesa mwono?
Twatamba kulemesa mwono mumu uli chawana cha Tata wetu wa zango, Yehova. Iye mwe “fuji lia mwono” yoze watangile mwono weswe. (Samu 36:9) “Iye mwene kakuhana kuli eswe mwono, ni mwiku, ni yuma yeswe.” (Yilinga 17:25, 28) Yehova kakutwaha yuma yeswe yize twakufupiwa hanga tununge ni mwono. Chahiana ulemu, Yehova kakutukwasa mu jila yize twakuwahilila ku mwono.—Tanga Yilinga 14:17.
2. Kuchi mutuhasa kusolola kuli Yehova ngwetu twakulemesa mwono?
Yehova kakulihulumba hali yena chize ha tangwa lize chisemi che apwile kafumba mba usemuke. Umwe kavumbi ka Yehova avuluka ngwo, Ndawichi yasoneka ngwenyi: “Meso je amwene mujimba wami shimbu kanda uliwumba.” (Samu 139:16) Yehova kakulemesa chinji mwono we. (Tanga Mateu 10:29-31.) Kashika, Yehova kakwivwa chinyengo chinji muze mutu umwe akushiha mukwo hanji kulishiha mwene. a (Kutuhuka 20:13) Chikwo nawa, Yehova kakwivwa chinyengo nyi mutu masa mwono wenyi mu ponde hanji kwecha kufunga mwono wa akwo. Muze twakufunga mwono wetu ni wa akwetu, twakusolola ngwetu twakulemesa chawana cha mwono.
NYINGIKA NAWA
Tala majila amwe waze akusolola chize muhasa kusolola ngwe wakulemesa chawana cha mwono.
3. Funga mwono we
Akwa-Kristu kakuzachisa mwono wo weswe hanga alingile Yehova. Chili ngwe kanahana mijimba yo ngwe chawana kuli Zambi. Tanga A-Roma 12:1, 2, mba nushimutwine yihula yino:
-
Yika yatamba kukulingisa mba ufunge mwono we?
-
Majila aka waze muhasa kuchilingilamo?
4. Muze unalingi chimwe chuma, lifunge hanga niumwe achine kulemana hanji kufwa
Mbimbiliya yakutukolweza hanga twehuke yuma yize muyihasa kutusa mu ponde. Tala CHINEMA hanga unyingike yize muhasa kulinga mba ulifunge.
Tanga Yishima 22:3, mba nushimutwine chize muhasa kulifunga ni kufunga akwenu . . .
-
ku zuwo.
-
ku chihela che cha mulimo.
-
muze nunase konda.
-
muze unendesa mashinyi hanji chuma chikwo cha kwendela.
5. Lemesa mwono wa mwana yoze uchili mu jimo
Ndawichi kalumbunwine ngwenyi, Yehova kakulihulumba hali mwana-kemba chipwe muze uchili mu jimo lia naye. Tanga Samu 139:13-17, mba nushimutwine chihula chino:
-
Kumeso ja Yehova, shina mwono wa mwana-kemba wakuputuka muze hasemuka nyi muze uchili mu jimo?
Shimbi jize Yehova ahanyine kuli A-Izalele, japwile ni kufunga yisemi ni ana shimbu kanda achisemuka. Tanga Kutuhuka 21:22, 23, mba nushimutwine yihula yino:
-
Kuchi Yehova apwile ni kwivwa nyi mutu chakuhona kunyingika mashihisa mwana yoze kanda achisemuka?
-
Kuchi iye apwile ni kwivwa nyi mutu malinga chuma cha mutapu au ku zango lienyi mwene? b
-
Ku nyonga lie, shina nyonga lia Yehova ha yikuma yino yaali linalite?
Chipwe pwo yoze wakulemesa mwono, mahasa kunyonga ngwe kuchiza ufumba chili chuma chipema. Tanga Izaia 41:10, mba nushimutwine yihula yino:
-
Nyi pwo mamushinjila hanga achize ufumba, kuli iya atamba kwita ukwaso? Mumu liaka?
ATU AMWE KAKWAMBA NGWO: “Pwo kali ni ulite wa kusakula nyi machiza ufumba nyi ka—mumu mujimba ni wenyi.”
-
Yika yakukwaha shindakenyo ngwe, Yehova kakulemesa mwono wa chisemi ni wa mwana chipwe ngwe kanda achisemuka?
YIZE WALILONGESA
Mbimbiliya yakutulongesa kuzanga, kulemesa ni kufunga chawana cha mwono chize Yehova hanatwehe. Chino chinatale nawa ha mwono wetu ni wa akwetu.
Kuhitulula
-
Mumu liaka mwono wa atu uli ulemu kumeso ja Yehova?
-
Kuchi Yehova akwivwa nyi mutu mashiha mukwo hanji malishiha mwene?
-
Mumu liaka wakulemesa chawana cha mwono?
HENGWOLA NAWA
Kuchi mutuhasa kusakwilila Yehova ha chawana cha mwono?
Wana kumbululo lia chihula chakwamba ngwo: Shina pwo yoze wachijile ufumba makamukonekena?
“Yika Mbimbiliya Yakwamba Hakutwala ku Kuchiza Ufumba?” (Lusango wa ha internet)
Tala chize nyonga lia Zambi hakutwala ku mwono liatamba kukukwasa kusakula yiheho yize kuyichi kusa mwono we mu ponde.
Mba nyi mutu mapwa ni manyonga a kulishiha mwene? Tala chize Mbimbiliya muyihasa kumukwasa.
a Yehova kakulihulumba chinji hali atu waze amakuka mbunge. (Samu 34:18) Iye kananyingika chize twakwivwa ni manyonga waze mahasa kulingisa mutu hanga alishihe. Kashika kakuzanga kutukwasa. Nyi unazange kumona chize ukwaso wenyi muuhasa kukwasa mutu kukumba manyonga a kulishiha, tanga mutwe wakwamba ngwo: “Ngunazange Kufwa—Shina Mbimbiliya Muyihasa Kungukwasa Nyi Nguli ni Manyonga a Kulishiha?” uli ha chikuma “Hengwola Nawa” ha longeso lino.
b Atu waze achijile ufumba katambile kulilamikiza chinji—Yehova mahasa kwakonekena. Nyi unazange kunyingika nawa sango jikwo, tala mutwe wakwamba ngwo, “Yika Mbimbiliya Yakwamba Hakutwala ku Kuchiza Ufumba?” uze uli ha chikuma “Nyingika Nawa” ha longeso lino.
