LONGESO 40
Kuchi Mutuhasa Kupwa Alinanga Kumeso ja Zambi?
Achinyonga hali umwe mama wa zango kanajika-jika mwanenyi hanga aye ku shikola. Iye kali ni shindakenyo ngwenyi, mwanenyi kasana ni mazalo jenyi kanasoloka kanawa. Chizechene ngwe yisemi akuzanga hanga ana jo apwe alinanga, ni Tata yetu Yehova neye kakuzanga hanga tulinange ku mujimba, mu manyonga ni mu kuhanjika chetu. Kulinanga chakuyukisa, chikwo nawa chakuhalisa Yehova.
1. Kuchi mutuhasa kulinanga ku mujimba?
Yehova kakutulweza ngwenyi: “Pwenu asandu.” (1 Petulu 1:16) Twatamba kulinanga mu manyonga ni ku mujimba mba tupwe asandu. Mutuhasa kulinanga ku mujimba ha kusana-sana, kukosa mazalo jetu, mashinyi ni kukomba-komba kanawa ha zuwo lietu. Mutuhasa nawa kukwasa kukomba-komba ha Zuwo lietu lia Wanangana. Kulinanga ku mujimba, chakuhalisa Yehova.—2 A-Korindu 6:3, 4.
2. Ndako jika twatamba kwehuka mba tulinange?
Mbimbiliya yakututoweza hanga ‘tulipemese ku luchisa mweswe wa musunya ni spiritu.’ (2 A-Korindu 7:1) Kashika, twakusa tachi hanga twehuke chuma cheswacho chize muchihasa kupihisa mujimba ni manyonga jetu. Manyonga jetu katamba kupemena kuli Yehova, kashika twakusa tachi hanga twehuke manyonga api. (Samu 104:34) Twakusa nawa tachi hanga tuhanjike yuma yipema.—Tanga A-Kolosu 3:8.
Yuma yikwo yika yize muyihasa kukisa mujimba ni manyonga jetu? Yitumbo yimwe muyihasa kupihisa manyonga jetu. Kashika, twakwehuka yuma ngwe makanya, yitumbo yisasu avuluka ngwo bétele, mafwo a coca ni droga. Kwehuka yuma yino chakutukwasa kupwa kanawa ku mwono. Chikwo nawa, twakusolola ngwetu twakulemesa mwono. (Samu 119:37; A-Efwesu 5:5) Muchihasa kupwa chikalu kwecha ndako jacho, alioze ni ukwaso wa Yehova mutuhasa kuchilinga.—Tanga Izaia 41:13.
NYINGIKA NAWA
Tala chize kulinanga ku mujimba chakuhalisa Yehova, ni chize muhasa kukumba ndako ja luchisa.
3. Kulinanga ku mujimba chakuhalisa Yehova
Muze twakutanga shimbi jize Yehova ahanyine ku vungu lia A-Izalele, twakumona ngwetu Yehova kakuzanga chinji hanga atu jenyi alinange. Tanga Kutuhuka 19:10 ni 30:17-19, mba nushimutwine yihula yino:
-
Kulita ni versu jino kuchi Yehova akunyonga hakutwala ku kulinanga ku mujimba?
-
Yitanga yika yipema yize muyihasa kukukwasa kulinanga ku mujimba?
Kulinanga ku mujimba, chakufupiwa mashimbu ni tachi. Alioze mutuhasa kuchilinga, chipwe ngwe tuli pichi hanji yiswale hanji twatwama ku chihela cheswacho. Tala CHINEMA, mba nushimutwine chihula chinahateho.
-
Kuchi kukosa-kosa yuma yetu muchihasa kufumanyisa mulimo wetu wa kwambujola?
4. Echa ndako jipi
Yehova mahasa kutukwasa kwecha ndako yeswayo yipi
Nyi ngwe wakushipa makanya hanji kunwa droga, muchihasa kupwa chikalu kwecha ndako jacho. Mba yika muyihasa kukukwasa? Tala chize ndako jacho jakukwata ha mwono we. Tanga Mateu 22:37-39, mba nushimutwine chize makanya hanji droga akukwata ha . . .
-
usepa wa mutu ni Yehova.
-
usoko wa mutu ni enyembo jenyi.
Linga katalilo wa chize watamba kukumba ndako jipi. a Tala CHINEMA.
Tanga A-Fwilipu 4:13, mba nushimutwine chihula chino:
-
Kuchi kulemba chinji, kulilongesa Mbimbiliya ni kukunguluka muchihasa kukwasa mutu kukumba ndako yipi?
5. Sako tachi hanga ukumbe manyonga ni ndako jipi
Tanga A-Kolosu 3:5, mba nushimutwine yihula yino:
-
Kuchi tunanyingika ngwetu, kutala yizulie ya sonyi, kulipinya-pinya ku upwo hanji ku ulunga ni sexting yapwa yuma ya luchisa kumeso ja Zambi?
-
Ku nyonga lie, shina Yehova kali mukalu ha kutwita hanga tulinange mu manyonga? Mumu liaka?
Nyingika chize muhasa kukumba manyonga api. Tala CHINEMA.
Yesu kazachishile chimwe chilweza hanga asolole ngwenyi, twatamba kusa tachi mba tuhase kununga ni kulinanga mu manyonga. Tanga Mateu 5:29, 30, mba nushimutwine chihula chino:
-
Yesu kakambile ngwenyi, twatamba kulilemeka. Alioze te kanazange kwamba ngwenyi, twatamba kulinga chimwe chuma hanga twehuke yuma yipi. Chuma chika chize mutu atamba kulinga hanga ehuke manyonga api? b
Nyi ngwe chinakukalila kwecha yimwe ndako, nyingika ngwe Yehova kakukulemesa ha tachi jize wakusa. Tanga Samu 103:13, 14, mba nushimutwine chihula chino:
-
Nyi ngwe chinakukalila kwecha yimwe ndako, kuchi chisoneko chino muchihasa kukukwasa kunyongonona?
Nyi mulimbuka, kanda uhonga!
Muchihasa kupwa chashi kunyonga ngwe: ‘Amu hinahengesa kulu, kwahwa chichi kweseka nawa.’ Alioze achinyonga hachino: Nyi mukwa-kuzomboka malimbuka, chino kuchalumbunukine ngwo kechi kukumba, katamba kukatuka ni kununga ni kuzomboka. Chizechene nawa, nyi wafunyina chimwe chuma chipi, kuchalumbunukine ngwo kuchi kuhasa kukumba ndako ye yipi. Chikwo nawa, kanda uvulama tachi jize wakusa ha chikuma chacho. Kulimbuka hi mulonga unene ko, mumu chakutukwasa kupwa ni tachi ja kununga ni kunyongonona. Kashika kanda uhonga! Ni ukwaso wa Yehova, muhasa kwecha ndako yipi.
ATU AMWE KAKWAMBA NGWO: “Ami hingunejilila ndako yino, chichi kuhasa kuyecha.”
-
Chisoneko chika chize muhasa kuzachisa hanga ulweze mutu ngwe, ni ukwaso wa Yehova, mahasa kwecha yimwe ndako?
YIZE WALILONGESA
Muze twakulinanga ku mujimba, mu manyonga ni ku yitanga, twakuvwisa Yehova kuwaha.
Kuhitulula
-
Mumu liaka chili chilemu kulinanga?
-
Kuchi muhasa kulinanga ku mujimba?
-
Kuchi muhasa kulinanga mu manyonga ni ku yitanga?
HENGWOLA NAWA
Yuma yika watamba kulinga hanga ulinange chipwe ngwe uli chiswale?
Nyingika yuma yize watamba kulinga mba uhase kwecha kushipa makanya.
“Chize Muhasa Kwecha Kunwa Makanya” (Laulenu!, wa Maio 2010)
Tala lamba lize mutu mahasa kupwa nalio ha kutala yizulie ya sonyi.
“Shina Yizulie ya Sonyi Yili Yipema Nyi Yipi?” (Kaposhi wa Kutalila 1 wa Agosto, 2013)
Tala chize umwe lunga ahashile kukumba ndako ya kutala yizulie ya sonyi.
“Nalimbukile Yisuho Yinji, Kulutwe Mba Yingukumba” (Kaposhi wa Kutalila No. 4 2016)
a Tala chikuma chakwamba ngwo, “Chize Muhasa Kwecha Kunwa Makanya” ha chikuma “Hengwola Nawa” ha longeso lino. Mutwe wacho unalumbununa yuma yize mutu atamba kulinga mba ahase kukumba ndako yacho.
b Nyi unazange kukumba ndako ya kulipinya-pinya ku upwo hanji ku ulunga, tala chikuma chakwamba ngwo, “Kuchi munguhasa kukumba ndako yipi ya kulipinya-pinya?” ha mukanda Makumbululo a Yihula Yize Akweze Akuhula, Volume 1, Kapitulu 25.
