LONGESO 41
Yika Mbimbiliya Yakwamba Hakutwala ku Kulisumbakenya?
Atu anji kakwivwa sonyi ja kuhanjika hakutwala ku kulisumbakenya. Chipwe chocho, muze Mbimbiliya yakuhanjika ha kulisumbakenya, yakusolola yuma yeswe zwalala, alioze ni vumbi. Yuma yize Mbimbiliya yakwamba yakutuyukisa. Chino chinalite mumu mwenya-Mbimbiliya kali Yehova Sakatanga wetu. Kashika, iye kananyingika kanawa yize twakufupiwa. Kakutulweza yize twatamba kulinga mba tumuvwise kuwaha ni yuma yize muyitukwasa kuwahilila ku mwono ku miaka yeswe.
1. Yika Yehova akunyonga hakutwala ku kulisumbakenya?
Kulisumbakenya chili chawana chipema cha Yehova. Iye kanazange hanga kulisumbakenya chipwe wika hakachi ka lunga ni pwo waze alimbata kulita ni shimbi. Chawana chino chakukwasa atu hanga apwe ni ana, ni kulisolwela zango umwe ni mukwo. Kashika Mbimbiliya yakwamba ngwo: “Wahilila ni mukwenu-pwo wa ukweze we.” (Yishima 5:18, 19) Yehova kakushimbwila pwo ni lunga ashishike kuli umwe ni mukwo hanga ahone kulinga utanji nilimwe tangwa.—Tanga A-Hepreu 13:4.
2. Utanji yika unalumbunuka?
Mbimbiliya yakutulweza ngwo, “yitanji . . . kechi kahinga Wanangana wa Zambi.” (1 A-Korindu 6:9, 10) Akwa-kusoneka Mbimbiliya mu limi lia Ngregu kazachishile liji porneía hanga alumbunune utanji. Liji liacho linatale ha (1) kulisumbakenya a hakachi ka atu waze kalimbachile kulita ni shimbi, (2) utumwa, (3) kulisumbakenya ni kashitu. Muze ‘twakuchina utanji,’ twakuyuka chinji ni kuvwisa Yehova kuwaha.—1 A-Tesalonika 4:3.
NYINGIKA NAWA
Tala chize muhasa kwehuka utanji ni yize muhasa kuyuka ha kupwa mutu walinanga.
3. China utanji
Umwe lunga washishika avuluka ngwo Yosefwe, kachinyine utanji. Tanga Uputukilo 39:1-12, mba nushimutwine yihula yino:
-
Yika yakwashile Yosefwe mba achine utanji?—Tala versu 9.
-
Ku nyonga lie, shina Yosefwe kakwachile chiyulo chalita? Mumu liaka?
Kuchi akweze musono mahasa kwimbulula Yosefwe ha kuchina utanji? Tala CHINEMA.
Yehova kanazange hanga tulieswe twehuke utanji. Tanga 1 A-Korindu 6:18, mba nushimutwine yihula yino:
-
Yuma yika yize muyihasa kulingisa mutu hanga alinge utanji?
-
Kuchi muhasa kuchina utanji?
4. Muhasa kukumba cheseko
Yuma yika muyihasa kutukwika kukumba cheseko cha kulinga utanji? Tala CHINEMA, mba nushimutwine chihula chinahateho.
-
Kulita ni chinema, yika ndumbu alingile muze amwene ngwenyi manyonga ni yitanga yenyi te muyimutwala ahone kushishika kuli mukwo pwo?
Chipwe akwa-Kristu ashishika mashimbu amwe kakupinda ni manyonga api. Kuchi muhasa kwehuka kunyonga ha yuma ya utanji? Tanga A-Fwilipu 4:8, mba nushimutwine yihula yino:
-
Yuma yika yipema yize twatamba kunyonga?
-
Kuchi kutanga Mbimbiliya ni kulihulikila mu mulimo wa Yehova muchihasa kutukwasa kukumba cheseko cha kulinga shili?
5. Shimbi ja Yehova jakutuyukisa
Yehova kananyingika yize twakufupiwa. Iye kakutulweza chize mutuhasa kulinanga mu manyonga ni yize mutuhasa kuyuka ha kuchilinga. Tanga Yishima 7:7-27 hanji tala CHINEMA, mba nushimutwine yihula yinahateho.
-
Kulita ni chinema, kuchi mukweze alinjishile mu cheseko?—Tala Yishima 7:8, 9.
-
Kulita ni mukanda wa Yishima 7:23, 26, utanji wakuneha yipikalo yinji. Yika mutwehuka nyi twapwa atu alinanga mu manyonga?
-
Kuchi kulinanga mu manyonga muchihasa kutukwasa kuwahilila ku mwono ku miaka yeswe?
Atu amwe kakunyonga ngwo, yuma yize Mbimbiliya yakwamba hakutwala ku utumwa kuyishi kusolola zango. Alioze, Yehova Zambi ya zango, kanazange atu eswe awahilile ku mwono ku miaka yeswe. Kashika twatamba kwononokena shimbi jenyi mba chino chilingiwe. Tanga 1 A-Korindu 6:9-11, mba nushimutwine chihula chino:
-
Shina ku nyonga lia Zambi, akwa-utumwa e wika akwete manyonga api hakutwala ku kulisumbakenya?
Nyi tunazange kuvwisa Zambi kuwaha, tulieswe twatamba kwalumuna yimwe ku mwono wetu. Shina tachi jize mutusa mujikunduluka? Tanga Samu 19:8, 11, mba nushimutwine yihula yino:
-
Shina shimbi ja Yehova hakutwala ku chikuma chino, jili jipema? Mumu liaka wakumbulula ngwe, ewa? Hanji ngwe, ka?
Yehova kakwashile atu anji kwononokena shimbi jenyi. Kashika ni yena makukwasa
ATU AMWE KAKWAMBA NGWO: “Atu eswawo mahasa kulisumbakenya, chuma chilemu kulizanga wika.”
-
Mba ena kuchi wakunyonga?
YIZE WALILONGESA
Kulisumbakenya chili chawana cha Yehova kuli pwo ni lunga hanga awahilile.
Kuhitulula
-
Utanji yika unalumbunuka?
-
Yuma yika muyihasa kutukwasa kwehuka utanji?
-
Kuchi twakuyuka muze twakukaula shimbi ja Yehova?
HENGWOLA NAWA
Nyingika mumu liaka Zambi akuzanga hanga pwo ni lunga waze anazange kutwama chimuwika, atamba kulimbata kulita ni shimbi.
Nyingika mumu liaka Mbimbiliya yakulongesa ngwo, chipwe ngwe utumwa uli upi, nihindu kutwatambile kuvwila kole atu waze akusolola yitanga yacho.
Tala chize shimbi ja Zambi hakutwala ku kulisumbakenya jakutufunga.
“Shina Kulisumbakenya Mukanwa Chili Lume Kulisumbakenya?” (Lusango wa ha internet)
Ha lusango wakwamba ngwo, “Ayo Kanguvumbikile,” tala yize yakwashile umwe lunga te mukwa-utumwa kwalumuna mwono wenyi hanga evwise Zambi kuwaha.
“Mbimbiliya Yakwalumuna Mwono wa Atu” (Kaposhi wa Kutalila 1 wa Abril, 2011)
a Kulisumbakenya chize Yehova keshi kuzanga, chinatale nawa ha kulisumbakenya mu kanwa, mu uhambukilo, kupinya-pinya ku upwo hanji ku ulunga wa mutu mukwo ni yuma yikwo.
