LONGESO 43
Kuchi Akwa-Kristu Atamba Kumona Walwa?
Hashi heswe, atu kakwete nyonga lialisa hakutwala ku walwa. Atu amwe ha mashimbu amwe kakuzanga kunwa ndambu ya walwa hamwe ni masepa jo. Eka keshi kuzanga kunwa walwa. Akwo kakunwa chinji ni kuzengewa. Mba yika Mbimbiliya yakwamba hakutwala ku walwa?
1. Shina chili chipi kunwa walwa?
Mbimbiliya kuyishi kukanjisa kunwa walwa. Kashika, muze yakuhanjika ha yawana yize Zambi akutwaha, yakwamba nawa ngwo, “vinyu yize ya kuwahisa mbunge ya atu.” (Samu 104:14, 15) Malunga ni mapwo amwe ashishika waze atongola mu Mbimbiliya, kapwile ni kunwa walwa.—1 Timoteu 5:23.
2. Chiyulo chika chize Mbimbiliya yakuhana kuli atu waze akunwa walwa?
Yehova kakukanjisa kunwa walwa unji ni kuzengewa. (A-Ngalashia 5:21) Liji lienyi linambe ngwo: “Kanda utwama hakachi ka akwa-kunwa.” (Yishima 23:20) Kashika, nyi ngwe mutuzanga kunwa walwa—chipwe muze tuli ukawetu—kutwatambile kunwa walwa unji uze muutulingisa hanga tuhanjike hanji tulinge yuma yize kuyalitele, kuhona kunyonga kanawa hanji kulimbwoka. Nyi ngwe kutushi kulinga yuma yipema muze twakunwa walwa, muchipema kulitwamina.
3. Kuchi mutuhasa kuvumbika chiyulo cha akwetu hakutwala ku walwa?
Mutu ni mutu katamba kusakula kunwa walwa hanji ka. Kutwatambile kusopesa mutu yoze masakula kunwa ni kutesa. Chikwo nawa, kutwatambile kushinjila mutu yoze kasolo kunwa walwa. (A-Roma 14:10) Nyi mutumona ngwetu, kunwa walwa muchihasa kupinjisa akwetu, mutuhasa kulitwamina kunwa. (Tanga A-Roma 14:21.) Kutushi ‘kufupa kufumbuka [chetu], alioze twakufupa kufumbuka cha akwetu.’—Tanga 1 A-Korindu 10:23, 24.
NYINGIKA NAWA
Hengwola yisoneko ya mu Mbimbiliya yize muyihasa kukukwasa kukwata chiyulo cha kwecha kunwa walwa ni mashimbu waze watamba kunwa nyi muzanga. Nyingika nawa yize watamba kulinga nyi ngwe wakupinda ni walwa.
4. Kwata chiyulo nyi muzanga kunwa walwa
Kuchi Yesu apwile ni kunyonga hakutwala ku walwa? Nyi unazange kunyingika kumbululo, tala chikomokeso chitangu chize alingile. Tanga Yoano 2:1-11, mba nushimutwine yihula yino:
-
Kulita ni chikomokeso chino, nyonga lika Yesu akwete hakutwala ku walwa ni waze akunwa walwa?
-
Amu Yesu keshi kukanjisa kunwa walwa, mba kuchi akwa-Kristu atamba kumona atu waze akunwa?
Chipwe ngwe akwa-Kristu kali ni utuswilo wa kunwa walwa, chino kuchalumbunukine ngwo katamba kunwa chamunwina. Tanga Yishima 22:3, ni kushimutwina yikuma yino hanga umone nyi watamba kunwa nyi ka:
-
Muze unendesa mashinyi.
-
Muze uli kafumba.
-
Muze ndotolo makukanjisa kunwa walwa.
-
Muze kushi kuhasa kunwa ni kweseka.
-
Muze shimbi yakukanjisa walwa.
-
Muze uli ni mutu yoze keshi kuzanga kunwa walwa mumu kapwile ni kunwa chinji ku mashimbu a kunyima.
Shina ha umbachiso we hanji yiwanyino yikwo yize mulinga hatamba kupwa walwa? Nyi unazange kumona yize muyihasa kukukwasa, tala CHINEMA.
Tanga A-Roma 13:13 ni 1 A-Korindu 10:31, 32. Muze munutanga hita chisoneko, mba munushimutwina chihula chino:
-
Kuchi kukaula shimbi yino muchihasa kukukwasa kukwata chiyulo chize muchivwisa Yehova kuwaha?
Hita mukwa-Kristu katamba kulikwachila chiyulo mwene hakutwala ku walwa. Chipwe ngwe kakunwa walwa, nihindu mashimbu amwe mahasa kulitunawo
5. Sakula mashimbu waze watamba kunwa
Nyi musakula kunwa walwa, yiuluka chikuma chino: Chipwe ngwe Yehova keshi kukanjisa kunwa walwa, nihindu kakukanjisa kunwa walwa unji. Mumu liaka? Tanga Hozeia 4:11, 18, mba nushimutwine chihula chino:
-
Yuma yika muyihasa kulingiwa nyi mutu kakunwa chinji?
Kuchi mutuhasa kwehuka kunwa walwa unji? Twatamba kunyingika ngwetu tukwete haze twasulila. Tanga Yishima 11:2, mba nushimutwine chihula chino:
-
Mumu liaka chili chipema kutesa unji wa walwa uze muonwa?
6. Yize muyihasa kukwasa mutu kwecha kunwa chinji
Tala yize yakwashile umwe lunga kwecha kunwa walwa. Tala CHINEMA, mba nushimutwine yihula yinahateho.
-
Kulita ni chinema, kuchi walwa wakwachile ha yitanga ya Dmitry?
-
Shina kahashile kwecha walwa susumuku?
-
Kuchi iye ahashile kwecha kunwa walwa?
Tanga 1 A-Korindu 6:10, 11, mba nushimutwine yihula yino:
-
Mulonga uka watwama ha kuzengewa?
-
Yuma yika yinasolola ngwo, mutu yoze wakunwa chinji mahasa kwalumuka?
Tanga Mateu 5:30, mba nushimutwine chihula chino:
-
Muze Yesu ahanyine chilweza cha kuteta kwoko, iye te kanazange kwamba ngwenyi, twatamba kusa tachi mba tumbile ndako yimwe hanga tuvwise Yehova kuwaha. Mba yika muhasa kulinga nyi ngwe unase tachi hanga weche kunwa walwa? a
Tanga 1 A-Korindu 15:33, mba nushimutwine chihula chino:
-
Yika muyihasa kulingiwa nyi walikata ni masepa waze akunwa chinji?
ATU AMWE KAKUHULA NGWO: “Shina chili chipi lume kunwa walwa?”
-
Kuchi muhasa kukumbulula?
YIZE WALILONGESA
Yehova katuhele walwa hanga tulivwise kuwaha. Alioze kakukanjisa kunwa walwa unji ni kuzengewa.
Kuhitulula
-
Yika Mbimbiliya yakwamba hakutwala ku walwa?
-
Ponde yika yatwamaho nyi mutu manwa chinji?
-
Kuchi mutuhasa kuvumbika chiyulo cha akwetu hakutwala ku walwa?
HENGWOLA NAWA
Kuchi akweze mahasa kukwata yiyulo yipema hakutwala ku walwa?
Tala yuma yize watamba kulinga mba uhase kwecha kunwa walwa.
“Sako Walwa ha Chihela Chawo” (Kaposhi wa Kutalila 1 wa Janeiro, 2010)
Shina akwa-Kristu katamba kulipupa-pupa misenge ya walwa?
“Yihula ya Waze Akutanga Mikanda Yetu” (Kaposhi wa Kutalila 15 wa Fevereiro, 2007)
Ha lusango wakwamba ngwo “Napwile Chizengi Munene,” tala chize umwe lunga echele kunwa walwa.
“Mbimbiliya Yakwalumuna Mwono wa Atu” (Kaposhi wa Kutalila 1 wa Maio, 2012)
a Atu waze hanapu yizengi hamwe mahasa kufupiwa ukwaso wa mandotolo mba ahase kwecha kunwa walwa. Mandotolo anji kakwamba ngwo, mutu yoze wapwile ni kupinda ni walwa, katambile nawa kunwa, chipwe yimwe ndambu.
