LONGESO 44
Shina Yiwanyino Yeswe Yakuvwisa Zambi Kuwaha?
Yehova kanazange hanga tuwahilile. Kashika ha mashimbu amwe mutuhasa kulinga yimwe yiteleka. Shina yiwanyino yeswe yakuvwisa Yehova kuwaha? Kuchi mutuhasa kusolola zango lietu kuli Yehova ha chikuma chino?
1. Mumu liaka yiwanyino yinji kuyishi kuvwisa Yehova kuwaha?
Muhasa kukomoka ha kunyingika ngwe, yiwanyino yinji kuyishi kulita ni malongeso a mu Mbimbiliya mumu yakukatuka mu uwayilo wa mahuza. Yiwanyino yacho, muyihasa kukwata ha yipanda-panda hanji ha longeso lia kwamba ngwo, alma kuyishi kufwa. Yiwanyino yimwe, ngwe ya matangwa amwe a kunanga, yinatale ha woma uze atu akuvwila maspiritu api. (Izaia 65:11) Yehova kakutoweza tuvumbi twenyi ngwenyi: “Lihandununenu no, . . . Kanda nukwata ku chuma cha luchisa.”—2 A-Korindu 6:17. a
2. Kuchi Yehova akwivwa hakutwala ku matangwa a kunanga waze akuhalisa atu?
Yehova kakututoweza hanga tuhone kufwa mu muheto wa ‘kufuliela muli atu.’ (Tanga Jeremia 17:5.) Matangwa amwe a kunanga kakuhalisa akwa-kuyula hanji maswalale. Akwo, kakuhalisa yilayi ya chifuchi hanji matangwa a lipanda. (1 Yoano 5:21) Eka nawa, kakuhalisa maululikiso hanji yizavu ya akwa-mafwefwe. Kuchi Yehova mevwa nyi mutuhalisa atu hanji maululikiso, chipi-chipi waze akuhakwila yuma yize yakulimika ni upale wenyi?
3. Yuma yika muyihasa kusolola ngwo, chiwanyino chimwe chili chipi?
Mbimbiliya yakukanjisa “kuzengewa, akwa chimbangwinya, [ni] yingongo ja walwa.” (1 Petulu 4:3 MW 1991) Ha yiwanyino yimwe atu keshi kusuula, kashika kakulinga yuma ya luchisa. Nyi tunazange kupwa masepa ja Yehova, twatamba kwehuka yuma yino ya luchisa.
NYINGIKA NAWA
Nyingika chize muhasa kuvwisa Yehova kuwaha muze mukwata yiyulo hakutwala ku yiwanyino ni matangwa a kunanga.
4. Ehuka yiwanyino yize kuyishi kuhalisa Yehova
Tanga A-Efwesu 5:10, mba nushimutwine yihula yino:
-
Chuma chika twatamba kusa shindakenyo muze mutukwata chiyulo nyi mutupwa ha chiwanyino cha tangwa lia kunanga nyi ka?
-
Yiwanyino yika yize atu akulinga chinji kuze watwama?
-
Ku nyonga lie, shina yiwanyino yacho yakuvwisa Yehova kuwaha?
Chakutalilaho, shina hiunalihulu kama yize Yehova akunyonga hakutwala ku matangwa a kusemuka? Mbimbiliya kuyishi kutongola niumwe kavumbi ka Yehova yoze walingile chiwanyino cha tangwa lienyi lia kusemuka. Alioze yakusolola yiwanyino yaali ya atu waze te keshi kuwayila Yehova. Tanga Uputukilo 40:20-22 ni Mateu 14:6-10, mba nushimutwine yihula yino:
-
Yuma yika yalifwa yize wamona ha yiwanyino yino yaali?
-
Ku nyonga lie, kulita ni yisoneko yino, kuchi Yehova akwivwa hakutwala ku matangwa a kusemuka?
Chipwe chocho hanji muhasa kulihula ngwe: ‘Shina Yehova mapihilila lume nyi nalinga hanji naya ha chiwanyino chize Mbimbiliya kuyishi kusolola zwalala?’ Tanga Kutuhuka 32:1-8, hanyima tala CHINEMA, mba nushimutwine yihula yinahateho.
-
Mumu liaka twatamba kusa shindakenyo ha yuma yize Yehova akuzanga?
-
Kuchi mutuhasa kuchilinga?
Chize mutuhasa kunyingika nyi chiwanyino chimwe chakuvwisa Zambi kuwaha nyi ka
-
Shina chiwanyino chacho chinakatuka ha malongeso waze keshi kulita ni Mbimbiliya? Nyi unazange kunyingika, hengwola hanga umone chize chiwanyino chacho chaputukile.
-
Shina chiwanyino chacho chakuhalisa atu, chizavu cha mafwefwe hanji yilayi ya chifuchi? Etu twakuhalisa Yehova ni kufuliela wika muli Iye ngwetu, makahwisa lamba lieswe hano hashi.
-
Shina ndako ni mianda ya ha chiwanyino chacho yakulimika ni shimbi ja mu Mbimbiliya? Twatamba kupwa alinanga.
5. Kwasa akwenu hanga avumbike yuma yize wakufuliela
Muchihasa kupwa chikalu muze akwenu makushinjila hanga upwe ha chiwanyino chize Yehova keshi kuzanga. Lumbunwina akwenu ufulielo we ni uhomboloji. Nyi unazange kumona chize muhasa kuchilinga, tala CHINEMA.
Tanga Mateu 7:12, mba nushimutwine yihula yino:
-
Kulita ni chisoneko chino, shina watamba kwambila asoko je waze keshi kuwayila Yehova ngwe, kaatambile kulinga chiwanyino cha tangwa lia kunanga?
-
Yika muhasa kulinga hanga usolole ngwe wakuzanga asoko je, chipwe ngwe kushi kulichinga no ha yiwanyino yimwe?
6. Yehova kakuzanga hanga tulieswe tuwahilile
Yehova kanazange hanga tuwahilile hamwe ni asoko ni masepa jetu. Tanga Chilumbununyi 8:15, mba nushimutwine chihula chino:
-
Kuchi versu yino yinasolola ngwo, Yehova kanazange hanga tuwahilile?
Yehova kanazange hanga tuvumbi twenyi alivwise kuwaha muze ali hamuwika. Tala CHINEMA hanga umone chize chino chakusoloka ha kukunguluka chetu cha mambonge.
Tanga A-Ngalashia 6:10, mba nushimutwine yihula yino:
-
Shina twatamba kushimbwila chiwanyino cha tangwa lia kunanga mba ‘tulinge yipema’ kuli akwetu?
-
Kuhana chika chakukuvwisa kuwaha: Muze akukushinjila hanga uhane mumu lia tangwa lia kunanga nyi muze wakuhana ku zango lie?
-
Yela ja Yehova anji ha mashimbu amwe kakululiekela ana jo yuma hanji kwaaha yawana. Nyi ngwe uli ni ana, yuma yika yipema yize muhasa kwalingila?
ATU AMWE KAKWAMBA NGWO: “Hi chilemu ko kunyingika chize tangwa limwe lia kunanga liaputukile. Chuma chilemu chili kupwa hamuwika ni asoko ni masepa.”
-
Kuchi muhasa kukumbulula?
YIZE WALILONGESA
Yehova kanazange hanga tupalikise mashimbu ni asoko ni masepa jetu. Alioze kanazange nawa hanga twehuke yiwanyino yize keshi kuzanga.
Kuhitulula
-
Yihula yika twatamba kulihula hanga tunyingike nyi chiwanyino chimwe chakuvwisa Yehova kuwaha nyi ka?
-
Kuchi mutuhasa kukwasa asoko ni masepa jetu hanga anyingike chiyulo chetu hakutwala ku matangwa amwe a kunanga?
-
Yika yakukwaha shindakenyo ngwe, Yehova kanazange hanga tuwahilile?
HENGWOLA NAWA
Tala matangwa amwe a kunanga waze akwa-Kristu atamba kwehuka.
“Mumu Liaka Yela ja Yehova Akwehuka Matangwa Amwe a Kunanga?” (Lusango wa ha internet)
Tala yikuma yiwana yize twakutayijila ngwetu, yiwanyino ya matangwa a kusemuka yakuvwisa Yehova kupiha.
“Mumu liaka Yela ja Yehova Keshi Kulinga Yiwanyino ya Matangwa a Kusemuka?” (Lusango wa ha internet)
Tala yize umwe mukweze alingile muze akwo waze akulilongesa no ku shikola amuhepwishile mumu lia ufulielo wenyi.
Tununu a tununu twa akwa-Kristu, kakwehuka kulinga yiwanyino ya matangwa a kunanga. Kuchi o akwivwa ha chiyulo chacho?
“O Kawanyine Chuma Chahiana Ulemu” (Kaposhi wa Kutalila 1 wa Dezembro, 2012)
a Tala Maliji Akusongo 5 hanga unyingike yize watamba kulinga muze akwenu maheha ha tangwa limwe lia kunanga.
