Kupwa ni masepa apema chakutuvwisa kuwaha ha mashimbu apema ni kututakamisa ha mashimbu akalu. Alioze Mbimbiliya yakututoweza ngwo, hi atu eswe ko ali masepa apema. Mba kuchi mutuhasa kusakula masepa apema? Tushimutwinenu yihula yinahateho.

1. Kuchi masepa waze musakula makwata ha mwono we?

Kanji-kanji, twakuzanga kwimbulula yitanga ya atu waze twakupalikisa no mashimbu. Yitanga yacho muyihasa kupwa yipema hanji yipi. Chino muchihasa kulingiwa nyi twapalikisa mashimbu ni masepa jetu waze tuli no hanji waze twakuhanjika no ha internet. Ngwe chize Mbimbiliya yakwamba: “Nyi muwenda ni akwa mana ni yena nawa muopwa ni mana; alioze mweswe malikata ni yihepuke [atu waze keshi kuzanga Yehova] kumakevwa kusasaminya.” (Yishima 13:20) Masepa waze akuzanga ni kuwayila Yehova, mahasa kutukwasa kukundama kuli iye ni kukwata yiyulo yipema. Alioze masepa waze keshi kuzanga Yehova mahasa kutusosolola kuli Iye. Kashika Mbimbiliya yakutukolweza kusakula kanawa masepa jetu! Nyi masepa jetu mapwa waze akuzanga Yehova, mutuhasa kulikwasa umwe ni mukwo. Chino chakutukwasa ‘kulishinjila umwe ni mukwo, ni kulikolesa umwe ni mukwo.’—1 A-Tesalonika 5:11.

2. Kuchi Yehova akwivwa ha masepa waze wakusakula?

Yehova kakusakula masepa jenyi ni mana. Iye “kakulikata ni mukwa ululi.” (Yishima 3:32) Kuchi Yehova mevwa nyi mutusakula masepa waze keshi kumuzanga? Mevwa yinyengo yinji! (Tanga Tiangu 4:4.) Alioze, Yehova mawahilila chinji ni kuzanga kupwa sepa lie nyi mwehuka masepa api ni kulikata ni atu waze akumuzanga.—Samu 15:1-4.

 NYINGIKA NAWA

4. Atu waze alisa ni yetu mahasa kupwa masepa apema

Mbimbiliya yakuhanjika hakutwala kuli Ndawichi ni Jonata malunga a ku Izalele ya shakulu. O kapwile ni miaka yalisa, ni yuma ku mwono wo yapwile yalisa. Chipwe chocho, kapwile ni usepa upema. Tanga 1 Samuele 18:1, mba nushimutwine chihula chino:

• Mumu liaka masepa jetu katambile kupwa wika waze ali ni miaka yimuwika ni yetu?

Tanga A-Roma 1:11, 12, mba nushimutwine chihula chino:

• Kuchi masepa waze akuzanga Yehova akulitakamisa umwe ni mukwo?

Ha chinema chino, tala chize ndumbwetu awanyine masepa ku chihela kuze te keshi ni kushimbwila. Tala CHINEMA, mba nushimutwine yihula yinahateho.

• Kulita ni chinema, mumu liaka yisemi ja Akil te anasakalala hamukunda wa masepa jenyi a ku shikola?

• Mumu liaka ku uputukilo iye azangile kulikata ni masepa jacho?

• Kuchi iye anakahasa kukumba nyonga lia kulivwa ukawenyi?

 5. Chize muhasa kupwa ni masepa apema

 YIZE WALILONGESA

Muze twakusakula masepa jetu ni mana, twakuvwisa Yehova kuwaha ni yetu ene twakuyuka chinji.

Kuhitulula

• Kuchi chikuma cha kusakula masepa jetu chili chilemu kuli Yehova?

• Masepa a mutapu uka twatamba kwehuka?

• Kuchi muhasa kulikata ni atu alisa?