Yesu iye Mutwe wa chikungulwila cha akwa-Kristu. (A-Efwesu 5:23) Musono, kukatuka mu malilu, Yesu kanasongwela tumbaji twenyi hano hashi kupalikila muli ‘ndungo wamwenemwene, wakanyama.’ (Tanga Mateu 24:45.) Yesu Kristu katongwele “ndungo” ni kumwaha wata wa kukwata yimwe yiyulo. Chipwe chocho, ndungo wacho kakwononokena Kristu ni kulisa mandumbu jenyi. Ndungo wamwenemwene iya? Kuchi ndungo wacho akutufunga?

1. ‘Ndungo wamwenemwene wakanyama’ iya?

Chize ku kunyima ndo musono, Yehova ha mashimbu amwe kakuzachisa lunga umuwika hanji chizavu cha malunga hanga asongwele atu jenyi. (Malakia 2:7; A-Hepreu 1:1) Muze Yesu afwile, apostolo ni makulwana a mu chikungulwila mu Yerusaleme yaputuka kusongwela yuma. (Yilinga 15:2) Musono, chimwe chizavu chikehe cha makulwana a mu chikungulwila avuluka ngwo, Chizavu cha Tusongo cha Yela ja Yehova—chakuhana kulia cha ku ufulielo ni kusongwela mulimo wa kwambujola. Chizavu chacho che chapwa ‘ndungo wamwenemwene wakanyama yoze [Yesu] hanamwehe chiyulo.’ (Mateu 24:45) Mandumbu eswe a mu Chizavu cha Tusongo kali akwa-Kristu akuwayisa ni spiritu waze ali ni kutalatala cha kupwa hamwe ni Yesu mu Wanangana wenyi mu malilu.

2. Kulia chika ndungo wamwenemwene akuhana?

Yesu kambile ngwenyi, ndungo wamwenemwene ‘te mahana kulia kuli [akwa-Kristu ni akwo] ha mwaka wacho.’ (Mateu 24:45) Chizechene ngwe kulia chize twakulia chakutukwasa kupwa kanawa ku mujimba, kulia cha ku ufulielo hanji ngwetu—usongwelo wa mu Liji lia Zambi—wakutwaha tachi hanga tununge ni kushishika kuli Yehova ni kulinga mulimo uze Yesu atuhele kulinga. (1 Timoteu 4:6) Twakutambula kulia chacho ha kukunguluka, kukunguluka cha mbonge, cha mambonge, mikanda yize yakukatuka mu Mbimbiliya, ni yinema yize yakutukwasa kunyingika upale wa Zambi ni kukolesa usepa wetu ni iye.

 NYINGIKA NAWA

3. Atu ja Yehova kapwa akululieka kanawa

Kupalikila mu ukwaso wa Yesu, Chizavu cha Tusongo chakusongwela mulimo wa Yela ja Yehova. Achi chapwile ni kulingiwa nawa kuli akwa-Kristu atangu. Tala CHINEMA.

Tanga 1 A-Korindu 14:33, 40, mba nushimutwine chihula chino:

• Kuchi chisoneko chino chinasolola ngwo, Yehova kanazange hanga Yela jenyi apwe akululieka?

4. Ndungo wamwenemwene kakusongwela mulimo wa kwambujola

Mulimo wa kwambujola wapwile chuma chilemu kuli akwa-Kristu atangu. Tanga Yilinga 8:14, 25, mba nushimutwine yihula yino:

• Iya wapwile ni kusongwela mulimo wa kwambujola ku sekulu yitangu?

• Kuchi Petulu ni Yoano atambwile usongwelo kuli apostolo-ni-akwo?

Mulimo wa kwambujola uli mulimo ulemu chinji uze akusongwela kuli Chizavu cha Tusongo. Tala CHINEMA.

 Yesu kashindakenyene ngwenyi mulimo wa kwambujola uli ulemu. Tanga Marku 13:10, mba nushimutwine yihula yino:

• Mumu liaka mulimo wa kwambujola uli ulemu chinji kuli Chizavu cha Tusongo?

• Mumu liaka tunafupiwa ‘ndungo wamwenemwene wakanyama’ hanga asongwele mulimo wa kwambujola hashi heswe?

5. Ndungo wamwenemwene kakuhana usongwelo

Chizavu cha Tusongo chakuhana usongwelo kuli akwa-Kristu hashi heswe. Kuchi akukwata yiyulo ya usongwelo uze mahana? Tala chize mandumbu a mu Chizavu cha Tusongo a ku sekulu yitangu apwile ni kuchilinga. Tanga Yilinga 15:1, 2, mba nushimutwine yihula yino:

• Yuma yika yanehene kapinda mukachi ka akwa-Kristu ku sekulu yitangu?

• Kuli iya Paulu, Mbarnabe ni atu akwo, ayile ni kufupa ukwaso hanga ahwise kapinda wo?

Tanga Yilinga 15:12-18, 23-29, mba nushimutwine chihula chino:

• Shimbu te kanda achikwata chiyulo, yika Chizavu cha Tusongo chalingile hanga anyingike usongwelo wa Yehova?—Tala versu 12, 15, ni 28.

Tanga Yilinga 15:30, 31 ni 16:4, 5, mba nushimutwine yihula yino:

• Kuchi akwa-Kristu atambwile usongwelo wa Chizavu cha Tusongo?

• Kuchi Yehova aawahishile ha kwononoka cho?

Tanga 2 Timoteu 3:16 ni Tiangu 1:5, mba nushimutwine chihula chino:

• Kuli iya Chizavu cha Tusongo chakufupa usongwelo shimbu kanda achikwata chiyulo?

 YIZE WALILONGESA

Chizavu cha Tusongo che chili ‘ndungo wamwenemwene wakanyama’ yoze Kristu atongwele. Ndungo wacho kakuhana usongwelo ni kulia cha ku ufulielo kuli akwa-Kristu hano hashi.

Kuhitulula

• Iya watongwele ‘ndungo wamwenemwene wakanyama’?

• Kuchi ndungo wamwenemwene akutufunga?

• Shina wakutayiza ngwe Chizavu cha Tusongo che chili ‘ndungo wamwenemwene wakanyama’?