LONGESO 58
Nunga ni Kushishika Kuli Yehova
Kuli akwa-Kristu amwenemwene, kukushi chuma hanji mutu niumwe yoze mahasa kwakinda kuwayila Yehova. Tuli ni shindakenyo ngwetu ni yena che wakwivwa. Yehova kakukulemesa chinji mumu lia ushishiko we. (Tanga 1 Sango ja Mianangana 28:9.) Yuma yika muyihasa kukupinjisa kununga ni kushishika kuli Yehova? Mba yika muyihasa kukukwasa?
1. Kuchi akwetu mahasa kweseka ushishiko wetu kuli Yehova?
Atu amwe mazanga kutukanjisa kulingila Yehova. Mutu muka mahasa kulinga chuma cha mutapu au? Atu amwe waze hanahichika umwenemwene kakuzanga kuhanjika mahuza hakutwala ku ululikiso wa Zambi hanga apihise ufulielo wetu. Atu jacho kakwavuluka ngwo, yitanganyanyi. Chikwo nawa, mangana amwe a mayingeleja kakumwanga sango ja mahuza hakutwala kuli yetu hanga atuvwise woma tweche umwenemwene. Chili ponde yinene kuhanjika ni atu jacho, kutanga mikanda yo, kunjila ha site jo hanji kutala yinema yo. Yesu kambile kuli waze apwile ni kukinda akwo kuwayila Yehova ni ushishiko, ngwenyi: “Ahichikenu: tupuputa kanafupu kusongwela tupuputa, nyi kachi kapuputa masongwela kapuputa, eswe aali kumakalimbukila mu wina.”—Mateu 15:14.
Mba nyi mutu umwe yoze tunanyingika mamba ngwenyi kasolo nawa kupwa Chela cha Yehova? Nyi usoko wetu malinga chuma chacho, mutuhasa kwivwa yikola yinji ku mbunge. Mutu wacho mahasa kutushinjila hanga tutale nyi mutusakula iye nyi Yehova. Twatamba kusa tachi hanga tununge ni kushishika kuli Yehova kuhiana chuma cheswacho. (Mateu 10:37) Kashika twakononokena shimbi ja Yehova hanga tuchine kulikata ni atu jacho.—Tanga 1 A-Korindu 5:11.
2. Kuchi yiyulo yetu muyihasa kusolola nyi twashishika kuli Yehova?
Zango lietu kuli Yehova mulitukwasa kwehuka chuma cheswacho chize muchitunjisa mu uwayilo wa mahuza. Chipwe mulimo wetu, chipwe maululikiso waze twakukwasa hanji chuma cheswacho mutulinga, kuyatambile kutala ha uwayilo wa mahuza. Yehova kanatutoweza ngwenyi: “Atu jami, tuhukenumo [mu Babilonia Yinene].”—Usolwelo 18:2, 4.
NYINGIKA NAWA
Nyingika chize muhasa kwehuka mutu yoze mazanga kukokolola ushishiko we kuli Yehova. Tala nawa chize muhasa kusolola ushishiko we ha kukatuka mu Babilonia Yinene.
3. Kanyama ni alongeshi a mahuza
Yika twatamba kulinga nyi twevwa yuma yipi hakutwala ku ululikiso wa Yehova? Tanga Yishima 14:15, mba nushimutwine chihula chino:
-
Mumu liaka twatamba kukanyama hanga tuchine kutayiza yuma yeswe yize mutwivwa?
Tanga 2 Yoano 10, mba nushimutwine yihula yino:
-
Kuchi twatamba kumona yitanganyanyi?
-
Chipwe ngwe kutwahanjikile meso ni meso ni yitanganyanyi, yuma yika muyihasa kutunjisa mu malongeso jo?
-
Ku nyonga lie, kuchi Yehova mevwa nyi twapwa ni kupanjika sango jipi hakutwala ku ululikiso wenyi?
4. Nunga ni kushishika kuli Yehova chipwe muze umwe ndumbu mavulumuna
Nyi twanyingika ngwetu ndumbu umwe mu chikungulwila kalinga shili yinene, chuma chika twatamba kulinga? Tala shimbi yimwe yize Yehova ahanyine ku vungu lia A-Izalele. Tanga Ulevi 5:1.
Ngwe chize versu yasolola, nyi twanyingika ngwetu ndumbu umwe kalinga shili, twatamba kulweza makulwana a mu chikungulwila yuma yeswe yize tunanyingika. Shimbu kanda uhanjika ni makulwana, muchipema chinji kukolweza mutu mwene hanga aye ni kwambulula shili yenyi. Nyi ngwe katayijile kuchilinga, ushishiko wetu kuli Yehova muutukwasa hanga tuye ni kuhanjika ni makulwana yuma yize tunanyingika. Kuchi kulinga chino, chakusolola ushishiko wetu kuli . . .
-
Yehova Zambi?
-
mutu yoze walinga shili?
-
mandumbu eswe mu chikungulwila?
Nyi umwe ndumbu kanapinji, mukwase!
5. Tuhuka mu Babilonia Yinene
Tanga Luka 4:8 ni Usolwelo 18:4, 5, mba nushimutwine yihula yino:
-
Shina jina liami lichili liakusoneka mu mukanda wa yimwe yingeleja?
-
Shina nguli mu umwe ululikiso uze wakulinjisa mu yuma ya uwayilo wa mahuza?
-
Shina mulimo uze nakulinga wakukwasa uwayilo wa mahuza?
-
Shina kuli chuma chimwe ku mwono wami chize natamba kwalumuna hanga ngulihandunune ni uwayilo wa mahuza?
-
Nyi nakumbulula ngwami ewa ku chimwe cha ku yihula yino, yuma yika natamba kwalumuna?
Kukwata yiyulo yize yakukukwasa kupwa ni mbunge yitoma chakusolola ngwo, washishika kuli Yehova.
Yika mulinga nyi makwita hanga ukwase yuma ya yingeleja?
ATU AMWE KAKWAMBA NGWO: “Natamba kunyingika yize yitanganyanyi akwamba hakutwala kuli Yela ja Yehova hanga ngukalile umwenemwene.”
-
Shina ali lili nyonga lipema? Mumu liaka wamba chocho?
YIZE WALILONGESA
Nyi tunazange kushishika kuli Yehova, twatamba kulihandununa ni waze keshi kushishika kuli iye. Twatamba nawa kulihandununa ku uwayilo wa mahuza.
Kuhitulula
-
Mumu liaka kutwatambile kutala, kutanga hanji kwivwa sango ja yitanganyanyi?
-
Kuchi twatamba kumona atu waze kasolo nawa kupwa Yela ja Yehova?
-
Kuchi mutuhasa kusolola ngwetu tunononokena utowezo wa kutuhuka mu uwayilo wa mahuza?
HENGWOLA NAWA
Nyingika yize watamba kulinga muze atu mamwanga sango ja mahuza hakutwala kuli Yela ja Yehova.
“Shina Sango Jino Jamwenemwene?” (Kaposhi wa Kutalila wa Agosto, 2018)
Kuchi muhasa kunyingika ngwe, ululikiso hanji mulimo umwe, wakukwasa Babilonia Yinene?
Yika akwa-kole amwe alingile hanga atepulule ufulielo wetu?
Ha lusango wakwamba ngwo, “Napwile ni Kufupa Zambi Chize mu Wanuke Wami,” tala chize umwe ngana wa yingeleja ya Xintoísta echele yingeleja yenyi ya mahuza.
“Mbimbiliya Yakwalumuna Mwono wa Atu” (Kaposhi wa Kutalila 1 wa Julho, 2011)
