Achinyonga ha chino: Helena kanyingika Miji ha tukweji aali wika, alioze iye kakwivwa ngwe kanamunyingika ha miaka yinji. Ayo kakulisonekena matangwa eswe ni kuhanjika ha mashimbu eswe ha telefone, nawa kakulilweza yize mutu ni mutu akunyonga! Haliapwila Miji kazangile wika kuhanjika, alioze kanazange nawa yuma yeka.

Ha tukweji aali apalika, Miji ni Helena kakulikwata ni kulimbejala. Helena kazangile hanga anunge ni kulinga yuma yacho. Alioze nawa iye kazangile kutokesa usepa wenyi ni Miji. Kukushi niumwe wakumuvwisa kuwaha, ni kumulemesa kuhiana Miji. Chikwo nawa, kakunyonga ngwenyi: ‘Miji ni yami twakulizanga. . .’

Nyi hiwakola nawa unapalika mu yize Helena anapalika, yika te mulinga?

Nyi wehuka yimwe shimbi ya mujimba, ngwe kwecha kulia, lamba mumona. Chimuwika nyi wehuka shimbi ya ku mwono, yino yinambe ngwo: “Nukachine utanji.”​—1 A-Tesalonika 4:3.

Lamba lika lia kwiza ha kwehuka shimbi yacho? Mbimbiliya yinambe ngwo: “Yoze malinga utanji mavulumuna mujimba wenyi mwene.” (1 A-Korindu 6:18) Mumu liaka chino chili umwenemwene?

Akwa-mana kawana ngwo akweze anji waze akulinga utanji kakupwa ni yipikalo yinji ku mwono wo, ngwe ai?

• YINYENGO. Akweze anji waze apwile ni kulinga utanji kakwamba ngwo kakulinyenga chinji.

• KUHONA KULIJIKIJILA. Muze mahwisa kulinga utanji, mutu ni mutu malihula ngwenyi, ‘Iya nawa akulinga nenyi utanji?’

• KUSAUKA. Kwamba pundu, akweze anji a mapwo kakuzanga lunga yoze makaafunga, hi ko yoze maahehela. Alioze akweze anji a malunga kakwivwa ngwo keshi kuzanga nawa mapwo waze atayijile hanga ahehe no.

• Chekwamba: Nyi walinga utanji, mulilelesa yena mwene hakutokesa chuma chilemu. (A-Roma 1:24) Mujimba we uli ulemu chinji, kashika, kuwatambile kuukisa!

Solola ngwe uli ni tachi ja ‘kuchina utanji.’ (1 A-Tesalonika 4:⁠3) Kashika, nyi tangwa limwe mumbata, mba muhasa kulimona ni yoze walimbata nenyi. Nawa mukahasa kuwahilila mu umbachiso we, chakuhona kuzakalala mu mbunge, kulinyenga hanji kumona kapinda yoze akumona atu waze akulinga utanji​—Yishima 7:3.

• Shina mutu yoze wakukuzanga chamwenemwene mahasa kukutwala kukulinga yuma yize muyipihisa mujimba we?

• Shina mutu yoze wakukuzanga chamwenemwene mahasa kukweseka hanga upihise usepa we kuli Zambi nyi​—A-Hepreu 13:4.