Achinyonga ha chino: Alexe kanalipikala. Kakufuliela kuli Zambi mashimbu eswe ni mu longeso lia kwamba ngwo yuma kayitangile. Alioze longeshi wenyi wa biologia mamba ngwenyi, yuma yalitangile yene, kulita ni kuhengwola chize cientista alingile. Alexe kazangile hanga asoloke ngwe chihepuke. Maliamba mwene ngwenyi, ‘Nyi cientista kakulongesa ngwo yuma yalitangile yene, yami iya mba ngwahamike?’

Nyi yena uli Alexe, shina te mutayiza ngwe yuma yalitangile yene, mumu ngwo mikanda ya ku shikola che yakulongesa?

Atu anji hashi heswe kanji-kanji kakutayiza wika yuma yacho chakuhona kunyingika mumu liaka anayitayiza.

• Atu amwe kakutayiza ngwo yuma kayitangile mumu ye akwalongesa mu yingeleja yo.

• Atu amwe kakutayiza ngwo yuma yalilingile yene mumu ye alongesele ku shikola.

Mbimbiliya yinambe ngwo: “Mumu zuwo lieswe lili ni yoze walitungile; alioze yoze watungile yuma yeswe iye Zambi.” (A-Hepreu 3:4) Chili chashi kutayiza wano maliji nyi ngwami?

KAKWAMBA NGWO: Yuma yeswe yili hashi ni mu malilu yalingiwile ha mukunda wa kupulika cha mihenyo.

KAKWAMBA NGWO: Atu kakatukile kuli tushitu.

KAKWAMBA NGWO: Longeso liakwamba ngwo yuma yalilingile yene lili liamwenemwene.

“Nyi unende mu mushitu mba muwana limwe zuwo lipema chinji, shina muwamba ngwe: ‘Achi kukomoka! Mitondo yinakalipakula yene ni kulilulieka yene ni kupwa zuwo lino.’ Kwamba pundu, ka! Kuchi kuhasa kunyonga chocho. Mba mumu liaka mututayiza ngwe yuma mu malilu ni hashi yalilingile yene?”—Julia.

“Achinyonga nyi umwe mutu makulweza ngwenyi, ku usonekeno wa mikanda kwapulika yimwe yikwata ya ulombo nawa ngwo ulombo wapihisa yikalakala ni fulumba, alioze ulombo wacho walumuka mukanda upema. Shina mutayiza ha yino?”—Genyi.

Mbimbiliya yakutukolweza hanga tupwe ni “kunyonga cha mana.” (A-Roma 12:1) Chino chinalumbunuka ngwo ufulielo we kuli Zambi kuwatambile kupwa wika wa

• MANYONGA (Natwama mukachi ka akwa yingeleja)

• KUKAULA AKWENU (Yisemi jami e akungushinjila hanga ngufuliele Zambi—te chichi kuhasa kulituna)

• KUKUSHINJILA (Yisemi jami e akungushinjila hanga ngufuliele Zambi—te chichi kuhasa kulituna)

Alioze, watamba kuwana chitela cha ufulielo we.

“Muze nakupwa mu shikola, ni kwivwa longeshi kanalumbununa chize mujimba wetu wakukalakala, chishi kuyambashana nawa ngwami Zambi keshiko. Yihanda yeswe ya mujimba yikwete mulimo wayo, chipwe yihanda yikehe-yikehe, nawa mulimo wacho wakulingiwa chakuhona yetu kuchinyingika. Chochene mujimba wa mutu wakukomwesa chinji!”—Teresa.

“Muze nakumona zuwo lia yipatulo ya kwilu, hanji ulungu unene, chipwe mashinyi, nakulihula ngwami, ‘Iya wakulinga yino yuma?’ Ndo umwe mutu wa mana mwe mahasa kulinga mashinyi, mumu kakwasa yuma yinji mba ende. Kashika, nyi mashinyi kali akutunga kuli umwe mutu, chekwamba ni yetu atu katutangile.”​—Ricardo.

“Muze napwile ni kulilongesa chinji ciencia, naputukile kukakajana longeso lia kwamba ngwo yuma yalilingile yene. . . . Kuli yami ndo ngupwe ni ufulielo unji mba ngutayize longeso liakwamba ngwo yuma yalilingile yene kuhiana kufuliela kuli Sakatanga.”​—Antonio.

Chipwe ngwe cientista kahengwola chinji, ayo ndo atombe ulumbunwiso ukwo uze atu eswe mahasa kutayiza hakutwala ku longeso liakwamba ngwo, yuma yalilingile yene. Nyi ma cientista kechi kulitayiza ha longeso liacho—amu ayo kali akwa-mana—shina upi unalingi nyi muhamika ha longeso liacho?