Uchinyonga ha chino: Karen halinga minutu kumi ku chiwanyino, mba mevwa liji lia mutu yoze anyingika kunyima lienyi ngwo.

Karen mamona sepa lienyi Jessica kanambe kwazulula yimwe milangi. Milangi yacho yinasoloka ngwe ya walwa. Mba Jessica mahana kuli Karen mulangi umuwika ni kwamba ngwenyi: “Watamba kulivwisa chiseke mumu hiwakola, ngwami?”

Karen kanambe kulituna, alioze kasolo kuhasa, mumu Jessica kali sepa lienyi. Chikwo nawa, kazangile sepa lienyi amone ngwe iye kali mutu mupi. Nawa, Jessica kali mwana pwo mupema. Nyi iye kananu, chekwamba kunwa hichipiko. Karen manyonga mu mbunge yenyi ngwenyi: “Au uli walwa. Chinalise ni kunwa makanya.’

Nyi yena te uli Karen, kachi te kuchi mulinga?

Ha shimbu liacho, kukwata chiyulo chipema ndo unanyingika kanawa mbunge ye. Chino chinalumbununa kulinyingika chize wapwa ni yize wakuzanga mu mbunge ye. Chino muchikukwasa kupwa ni tachi ja kulifunga yena mwene uhone kwecha akwenu apwe ni kukusongwela mu mwono we.​—1 A-Korindu 9:26, 27.

Kuchi muhasa kupwa ni tachi jacho? Kukumbulula yihula yinasulaho che muchikukwasa.

Kunyingika uhashi we ni ndako jipema watwama najo muchikutakamisa.

CHILWEZA CHA MU MBIMBILIYA: Postolo Paulu yasoneka ngwenyi: “Chipwe nguli chikukumi ha kuhanjika, ha yinyingi chasalile kunyima.” (2 A-Korindu 11:6) Hakunyingika chinji Yisoneko, Paulu kahashile kumana mbe ni muze te akwo anamusosomba. Iye kakechele yuma yipi apwile ni kumwamba yimuhongese.​—2 A-Korindu 10:10; 11:5.

LINYINGIKE YENA MWENE: Soneka mushi amu, yuma yize wakuhasa kulinga kanawa.

Haliapwila soneka ndako yipema chinji yize ulinayo. (Chakutalilaho, wakuzanga chinji akwenu? wakuhana? washishika? wakufunga shimbu?)

Kuli yuma yinji yipi yize muyihasa kukupinjisa, ni kwalumuna ndako je nyi yena wecha hanga yuma yacho yikusongwele.

CHILWEZA CHA MU MBIMBILIYA: Paulu kanyingikine yize yapwile ni kumupinjisa. Iye yasoneka ngwenyi: “Mumu nakuwaha ni shimbi ya Zambi nikulita ni mutu wa muchima: alioze ngunamono shimbi yeka mu mujimba wami, yakwasa jita ni shimbi ya kunyonga chami, yakunguneha ku ufunge ku shimbi ya shili yize yili mu mujimba wami.”​—A-Roma 7:22, 23.

LINYINGIKE YENA MWENE: Ulelu uka uli nawo uze unazange kunyingika hanga uuhwise?

Shina muchilita kunjila mu amwe mashinyi ni kumulweza mukwa-kwendesa ngwe aputuke kujinga-jinga ndo muze mashinyi mahwa maji nyi? ka, kulinga chino muchipwa ujingale—nawa muyifwika ndando yinji!

Longeso lika twandaho? Yize unazange kulinga muyikukwasa uhone kulijinga-jinga ku mwono we. Mumu uli ni yize mulinga ni chize nawa muhasa kuyilinga.

CHILWEZA CHA MU MBIMBILIYA: Paulu kasonekene ngwenyi: “Kashika yami chocho nakuzomboka, hi ngwe mu unjilinjili ko.” (1 A-Korindu 9:26) Paulu te keshi kutwama wika chizechene, alioze yafupa kulinga yize yapwile ni kufupiwa ku mwono wenyi.​—A-Fwilipu 3:12-14.

LINYINGIKE YENA MWENE: Soneka mushi yuma yitatu yize unazange kulinga mwaka muwizaho.

Nyi kuushi ni yize wakufuliela mukakajana. Mulialumwona ngwe nongwena, hanga ulichinge ni akwenu—chino muchisolola ngwo kuushi ni yize yena wakufuliela.

Alioze, nyi yitanga ye yinakatuka ha yize wakufuliela, mufunga ufulielo we—kuuchi kulinga yize akwenu akulinga.

CHILWEZA CHA MU MBIMBILIYA: Kota muze te uchili kanuke, profeta Daniele “yasa mbunge yenyi” ngwenyi katamba kwononokena shimbi ja Zambi, chipwe ngwe te kali kusuku ni yisemi jenyi. (Daniele 1:8) Ha kulinga chino, iye yasolola ushishiko wamwenemwene. Daniele katwamine kulita ni yize atesele mu mbunge yenyi.

LINYINGIKE YENA MWENE: Yika yena wakufuliela? Chakutalilaho: Shina wakufuliela Zambi? Nyi wakumufuliela, mumu liaka? Yika yakukwaha ushindakenyo ngwe Zambi kwali?

Shina wakutayiza ngwe shimbi ja Zambi mujikukwasa ku mwono we? Nyi che wakutayiza, mumu liaka?

Kusulaho, kuli unazange hanga akutese—ku lifwo lize linahehuka ni fuji, nyi ku mutondo uze wajikiza kuushi kulimbuka ni fuji ya chijimbi? Kolesa ufulielo we, mba upwe ngwe mutondo wajikiza. Yino muyikukwasa kukumbulula chihula chino chinambe ngwo, Yami Iya