Mukanda Yisoneko Yize Yakusongwela Mwono wa Akwa-Kristu, muuhasa kukukwasa kuwana ma versu ni sango ja mu Mbimbiliya jize mujikukwasa kukumba yipikalo yize unapalika. Muukukwasa nawa kuwana sango jize mutakamisa najo akwenu, ni kukukwasa kukwata yiyulo yize muyihalisa Yehova. Kashika, watamba kufupa chikuma chize unazange ni kwecha hanga yihula ni makumbululo a mu Mbimbiliya akusongwele. (Tala mushete unambe ngwo, “ Chize Muhasa Kuzachisa Mukanda uno.”) Muwana yiyulo yinji, usongwelo ni ulembejeko uze unakatuka mu Liji lia Zambi. Muwana nawa yikuma yize muhasa kulianyina ni akwenu, yize muyihasa kwakwasa ku mwono ni kwatakamisa.

Mukanda uno, kuushi ni yisoneko yeswe yize yinatale ha chimwe chikuma. Nihindu, muukukwasa kuhengwola yize unazange. (Yis 2:1-6) Ukwaso ukwo muhasa kuuwana ha referências marginais ni ha yikuma yikwo ya Mbimbiliya Tradução do Novo Mundo. Muhasa nawa kuhengwola ha Guia de Pesquisa hanji ha Índice de Publicações da Torre de Vigia hanga uwane ulumbunwiso walita wa chimwe chisoneko ni chize muhasa kuchikaula ku mwono we. Fupa kunyingika yikuma yaha yize ndungo wakanyama atuhwisa mba upwe ni ulumbunwiso walita.

Tunashimbwila ngwetu, mukanda uno muunukwasa kuwana malinjekela, chinyingi ni ulumbunwiso wa mu Mbimbiliya. Muze mulilongesa mukanda uno muopwa ni shindakenyo ngwe, “liji lia Zambi likwete mwono ni ndundo.”—Hep 4:12.