APENDICE C
Chize Muhasa Kusongwela Malongeso a Mbimbiliya ha Kuzachisa Mukanda Wahilila ku Mwono ku Miaka Yeswe!
Mandumbu jetu kalembele chinji ni kuhengwola kanawa yikuma yize te masa mu mukanda Wahilila ku Mwono ku Miaka Yeswe! Muze musongwela malongeso a Mbimbiliya, kaula majila waze ali mushi mba uyuke ni malongeso waze ali ha mukanda wacho.
Shimbu kanda uputuka longeso lia Mbimbiliya
-
1. Lilulieke kanawa. Muze unalilulieka, nyonga ha yize longi ye anafupiwa, ha yuma yize anapalika ku mwono ni ha yuma yize iye akufuliela. Lianga kunyonga ha yikuma yize mafupiwa ukwaso mba yimulumbunuke kanawa ni chize mahasa kuyikaula ku mwono wenyi. Tala chize muhasa kuzachisa chikuma “Hengwola Nawa” hanga ukwase longi ye. Kashika nyi muchifupiwa, muhasa kuzachisa chikuma chacho muze unasongwela longeso lia Mbimbiliya.
Muze unasongwela longeso lia Mbimbiliya
-
2. Nyi longi ye matayiza, munuhasa kuputuka longeso ni kulemba ni kuhwisa nawa ni kulemba.
-
3. Kanyama hanga uchine kuhanjika chinji. Lihulikile ha malongeso waze ali ha mukanda, ni kwecha longi ye hanga ahanjike yize yili mu mbunge.
-
4. Nyi mununjila ha chikuma chaha mu mukanda, tanga maliji atangu a chikuma chacho ni kushindakenya ndambu ha yikuma yilemu ya mutwe wacho.
-
5. Muze munuhwisa hita longeso, zachisa chikuma kuhitulula hanga ukwase longi ye kwiwuluka umwenemwene uze alilongesa.
-
6. Ha hita longeso lize mulilongesa ni longi, watamba kulinga yuma yino:
-
Kutanga paragrafu.
-
Kutanga yisoneko yeswe yize yili ni chilayi ngwo, “Tanga.”
-
Kutanga yisoneko yikwo yize yili mu paragrafu nyi muchifupiwa.
-
Kutala yinema yeswe yize yili ni chilayi ngwo, “Tala Chinema” (Nyi uli nacho).
-
Kuhula longi ye yihula yeswe yize yili ha longeso.
-
Kukolweza longi ye hanga alihulikile ha chikuma “Nyingika Nawa,” ni kumwita hanga ahanjike ndambu ha chikuma chacho.
-
Kuzachisa kamushete “Yize mulinga” hanga ukwase longi ye kutesa yuma yimwe ya ku ufulielo yize muyimukwasa kusenya kulutwe. Muhasa kumukolweza azachise yuma yize anamwichi kulinga hanga atese yuma yikwo yize malinga, hanji kulinga yuma yeswe yaali.
-
Eta kuli longi ye hanga atange yikuma hanji kutala yinema yize yili ha chikuma “Hengwola Nawa” muze malulieka longeso lienyi.
-
Eseka kuhwisa longeso lieswe ha hita tangwa munulilongesa.
-
Hanyima lia kulilongesa
-
7. Nunga ni kunyonga hali longi ye. Lemba kuli Yehova ni kumwita awahise tachi jeswe jize alongi je anase hanga asenye kulutwe. Chikwo nawa, mwite hanga akwehe mana mba unyingike chize muhasa kwakwasa.
