KUPWISA ATU TUMBAJI
LONGESO 10
Sako Tachi Hanga Ukwase Atu Apwe Tumbaji
Shimbi: “Mumu lia zango lietu hali yenu, twawahililile chinji hi ha kunwambulwila ko sango jipema ja Zambi, alioze ni kuhana nawa mwono wetu hali yenu, mumu twanuzanga chinji.”—1 Tesa. 2:8.
Yika Yesu Alingile?
1. Tala CHINEMA, hanji kutanga Yoano 3:1, 2. Mba nushimutwine yihula yino:
-
Kuli yena, mumu liaka Nikondemu ayile ni kumeneka Yesu ha ufuku?—Tala Yoano 12:42, 43.
-
Kuchi Yesu asolwele ngwenyi kazangile kukwasa atu hanga apwe tumbaji ha kuhanjika ni Nikondemu ha ufuku?
Yika Mutuhasa Kulilongesa Hali Yesu?
2. Yetu twakusolola ngwetu twakuzanga atu ha kusa tachi hanga twakwase apwe tumbaji.
Imbulula Yesu
3. Lilongesenu ha ola ni ku chihela kuze longi we wa Mbimbiliya masakula. Iye hanji masakula tangwa limwe ha poso ni mashimbu waze mazanga kulilongesa. Shina iye malivwa kanawa kulilongesela ku chihela kuze akukalakalila, ku zuwo lienyi, hanji ku chihela kuze kwakupwa mbunga yinji? Nyi muchilita, muhasa kwalumuna katalilo we hanga uhase kulilongesa nenyi ha ola ni ku chihela kuze iye malivwa kanawa.
4. Lilongesenu mashimbu eswe. Nyi mulinga wenyi hanji mukatukaho ha matangwa amwe, kanda umanyisa longeso lia Mbimbiliya. Shimbu uchilinge, nyonga ha yihula yino:
-
Shina muhasa kusongwela longeso liacho ku telefone hanji kupalikila mu video-conferência?
-
Shina muhasa kwita kuli mukwa-kwambujola mukwo hanga asongwele longeso liacho?
5. Lemba hanga upwe ni nyonga lialita. Lemba kuli Yehova ni kumwita hanga akukwase ununge ni kulilongesa ni alongi je chipwe ngwe ayo keshi kulilongesa mashimbu eswe, hanji masolola ngwe kanashimbula chinji kukaula yize analilongesa ku mwono wo. (Fwili. 2:13) Longi we kali ni yitanga yinji yipema; kashika lemba kuli Yehova ni kumwita hanga akukwase kulihulikila ha yitanga yacho.
TALA NAWA
Yishi. 3:27; Yili. 20:35; 2 Kori. 12:15
