CHIZE MUHASA KUPUTUKA LUSANGO
LONGESO 3
Pwako Chimbovu
Shimbi: “Zango likwete . . . Utu.”—1 Kori. 13:4.
Yika Yesu Alingile?
1. Tala CHINEMA, hanji kutanga Yoano 9:1-7. Mba nushimutwine yihula yino:
-
Yika Yesu alingile chitangu—shina iye kaliangile kuuka lunga wacho nyi kaliangile kumwambulwila sango jipema?—Tala Yoano 9:35-38.
-
Kuli yena, mumu liaka lunga wacho apanjikile kanawa sango jipema jize Yesu amwambulwilile?
Yika Mutuhasa Kulilongesa Hali Yesu?
2. Atu mazanga chinji kupanjika sango jize mutwambulwila nyi mamona ngwo tunalihulumba hali ayo.
Imbulula Yesu
3. Lise mu chihela cha mutu yoze unahanjika nenyi. Eseka kunyonga ha chize mutu anevwu.
-
Lihule ngwe: ‘Yuma yika yize yinamupikala? Yika yize muyihasa kumukwata ku mbunge ni kumukwasa?’ Kulihula yihula yino, muchikukwasa kusolola utu, kuhanjika mu jila yashi ni kusolola yitanga yipema.
-
Solola ngwe unalihulumba ha yize mutu anapalika ha kumupanjika kanawa. Nyi iye makulweza chize anevwu hakutwala ku chimwe chuma hanji makulweza yipikalo yize anapalika, kanda walumuna lusango.
4. Pwako chimbovu ni kusolola vumbi. Jila yize muhanjikilamo, muyisolola pundu nyi unevwila mutu wacho keke ni kuzanga kumukwasa. Kanyama hakutwala ku yize muwamba ni chize muyamba. Chikwo nawa, ehuka kuhanjika yuma yize muyilemeka atu ku mbunge.
5. Lihane hanga ukwase: Fupa shimbu lialita hanga ukwase mutu ha yize anafupiwa. Muze twakusolola umbovu ha kuhanjika ni akwetu, chino chakwakwasa hanga no azange kuhanjika ni yetu.
