1-3. (a) Chawana chika chize Yehova atwaha? (b) Kuchi mutuhasa kuchizachisa mu jila yipi? (c) Kuchi twatamba kuzachisa chawana chacho?

UCHINYONGENU umwe chisemi kahana kinga kuli mwanenyi. Kanawahilila chinji ha kuhana chawana chacho kuli mwanenyi. Mba nyi mwanenyi ha kwendesa kinga yacho mapupa mutu ni kumulemeka, kuchi chisemi mevwa?

² Yehova kali Chihanyi wa “yawana yeswe yingunu.” (Tiangu 1:17) Chawana chimwe chize iye atuhele chili uhashi wetu wa kuhanjika. Chawana cha kuhanjika chakutukwasa kusolola manyonga jetu ni yize twakwivwa. Twakuhasa kwamba yuma yize muyikwasa atu ni kwevwisa kuwaha. Alioze, yize twakuhanjika muyihasa nawa kulemeka akwetu ni kwevwisa yinyengo.

³ Maliji kali ni tachi jinji, nawa Yehova kakutulongesa chize twatamba kuzachisa kanawa chawana chetu chakuhanjika. Iye kanatulweze ngwenyi: “Nilimwe liji lia kupihisa kanda lituhuka mu makanwa jenu, alioze shinaho lize lipema ha kukolesa akwenu, nikulita ni chize chinatela, hanga likahane vumbi kuli waze akwivwa.”  (A-Efwesu 4:29) Tutalenu chize mutuhasa kuzachisa chawana chize Zambi atuhele mu jila yize muyimunehena chiseke ni kukolesa akwetu.

4, 5. Yika mutuhasa kulilongesa mu mukanda wa Yishima hakutwala ku tachi jize maliji akwete?

⁴ Maliji kali ni tachi, kashika twatamba kukeya ha yize mutwamba ni chize mutuyamba. Mukanda wa Yishima 15:4, unambe ngwo: “Limi lia umbovu liapwa ngwe mutondo wa mwono; alioze uhenge walio kuwakumakuna spiritu.” Ngwe chizechene chizulie cha mutondo upema chakuhuhumuna atu, maliji apema no kakukolweza ni kuhuzulula mbunge. Alioze, maliji api kakulemeka akwetu ku mbunge.—Yishima 18:21.

⁵ Mukanda wa Yishima 12:18 unambe ngwo: “Kwali mukwa kuhanjika kalusulusu ngwe kutuwa cha katana.” Maliji akalusulusu kakulemeka chinji ku mbunge ni kushiha usepa upema. Hanji unewuluka tangwa lize umwe mutu akwambile yuma yipi yize yakulemekene ku mbunge. Alioze, mukanda wa Yishima unanungu ni kwamba ngwo: “Limi lia mukwa mana kuliakuwuka.” Maliji a mana kakuwuka mbunge ni kukolesa usepa uze unambe kupiha. (Tanga Yishima 16:24.) Nyi twamona ngwetu, maliji jetu kakulemeka akwetu, twatamba kulikolweza hanga tusakule kanawa yize mutuhanjika.

6. Mumu liaka chili chikalu kusakula kanawa yize mutuhanjika?

⁶ Chitela chikwo cha mumu liaka twatamba kukeya mu yihanjika yetu, chili ngwo, yetu eswe tuli yihenge. ‘Kunyonga cha mbunge ya mutu chapwa chipi.’ Kashika, yize twakuhanjika kanji-kanji yakusolola yize yili mu mbunge yetu. (Uputukilo 8:21; Luka 6:45) Muchihasa  kupwa chikalu kusakula yize mutuhanjika. (Tanga Tiangu 3:2-4.) Alioze, twatamba kusa tachi hanga tupwe ni kuhanjika kanawa ni akwetu.

7, 8. Kuchi yize twakuhanjika muyihasa kukwata ha usepa wetu ni Yehova?

⁷ Twatamba nawa kukeya mu yihanjika yetu, mumu Yehova makatupatwila ha yuma yize twakuhanjika ni chize twakuyihanjika. Mukanda wa Tiangu 1:26, unambe ngwo: “Nyi kachi umwe malishinginyeka kupwa mukwa shindakenyo, shimbu keshi kuhombola limi lienyi, awo kakwonga mbunge yenyi mwene, shindakenyo ya yono mutu yamokomoko.” Liji “yamokomoko” mulihasa kulumbunuka nawa “yangwaza.” (1 A-Korindu 15:17) Kashika, nyi kutwafungile limi lietu, usepa wetu ni Yehova muuhasa kupiha hanji kufwa.—Tiangu 3:8-10.

⁸ Chino chinasolola pundu ngwo, tuli ni yikuma yilemu twatamba kukeyela ha yize mutuhanjika ni chize mutuyihanjika. Tunafupiwa kunyingika yuma yize  twatamba kwehuka, mba tuzachise chawana chetu cha kuhanjika kulita ni chize Yehova anazange.

9, 10. (a) Maliji a mutapu uka waze atu akuhanjika chinji musono? (b) Mumu liaka twatamba kwehuka maliji asonyi?

⁹ Musono, atu kakuhanjika chinji maliji a sonyi hanji a luchisa. Atu anji kakunyonga ngwo, katamba kuhanjika yuma ya matuka hanga ahane tachi ha yize anambe. Akwa-kusehesa atu, kanji-kanji, kakwamba maliji api hanji a sonyi hanga asehese atu. Alioze, postolo Paulu kambile ngwenyi: “Mbilenu yino yuma yeswe: utenu, ni ufwatulo, ni uhuka, ni kushililika, ni kuhanjika cha sonyi mu makanwa jenu.” (A-Kolosu 3:8) Iye yamba nawa ngwenyi, “miselo ya uhepuke” “kanda ayivuluka hakachi” ka akwa-Kristu amwenemwene.—A-Efwesu 5:3, 4.

¹⁰ Maliji a sonyi kakuvwisa kupiha Yehova ni waze akumuzanga. Maliji jacho kali aluchisa. Mu Mbimbiliya, “luchisa” kali “yitanga ya musunya.” (A-Ngalashia 5:19-21) “Luchisa” kanalumbunuka shili ya mutapu weswe, nawa yitanga ya luchisa muyihasa kutwala ku shili yikwo. Nyi mutu mapwa ni ndako yakulinga yuma ya luchisa, ni yuma ya sonyi, ni kulituna kuyecha, mutu wacho katamba kumusosolola mu chikungulwila.—2 A-Korindu 12:21; A-Efwesu 4:19; tala Maliji Akusongo 23.

11, 12. (a) Yika muyihasa kutwala mutu ku kwamba yuma ya mahuza? (b) Mumu liaka twatamba kwehuka kuhanjika yuma ya mahuza?

¹¹ Twatamba kwehuka nawa kuhanjika yuma ya mahuza hakutwala kuli akwetu. Hi chipiko kufupa kunyingika yize yinalingiwa ku mwono wa akwetu, ni kulweza sango jacho kuli asoko ni masepa jetu. Chipwe ku sekulu yitangu, Akwa-Kristu te kakufupa kunyingika chize  mandumbu jo ali ni yize te malinga hanga aakwase. (A-Efwesu 6:21, 22; A-Kolosu 4:8, 9) Alioze, kuhanjika chinji hali mutu, muchihasa kutwala ku kuhanjika mahuza hanji kuyenga mutu wacho. Nyi twanunga ni kuhanjika ha lusango wacho, mutuhasa kwamba yuma ya mahuza hanji yize kuyatutalile. Nyi kutwakeyele, yuma yize mutuhanjika muyihasa kupwa ya saki hanji ya mahuza. A-Fwariseu kapihishile lufuma wa Yesu muze ahanjikile yuma ya mahuza yize kakalingile. (Mateu 9:32-34; 12:22-24) Kuhanjika yuma ya mahuza chakupihisa lufuma wa mutu, chakuneha yinyengo ni kupihisa usepa upema.—Yishima 26:20.

¹² Yehova kanazange tuzachisa maliji jetu hanga tukwase ni kutakamisa akwetu, hi kupihisa ko usepa wetu ni akwetu. Yehova kakuvwila kole yoze wakuneha “vunda hakachi ka usoko.” (Yishima 6:16-19) Satana Ndiapu, kali chilamikiji mutangu yoze wahanjikile mahuza hakutwala kuli Zambi. (Usolwelo 12:9, 10) Ha matangwa wano, hichapwa chakwo atu kuhanjika yuma ya saki hakutwala kuli akwo. Alioze chino kuchatambile kulingiwa mu chikungulwila cha akwa-Kristu. (A-Ngalashia 5:19-21) Kashika, twatamba kukeya ha yize mutwamba ni kunyonga shimbu kanda tuchihanjika. Shimbu kanda uchihanjika yimwe yuma hakutwala kuli umwe mutu, lihule ngwe: ‘Shina yuma ngunambe kuhanjika yili lume yamwenemwene? Yili yipema? Muyikwasa? Shina munguhasa kwamba yuma yacho nyi mwene hwali? Kuchi te mungwivwa nyi mutu mahanjika yuma yacho hakutwala kuli yami?’—Tanga 1 A-Tesalonika 4:11.

13, 14. (a) Kuchi maliji api mahasa kukwata hali akwetu? (b) Matuka yika, nawa mumu liaka akwa-Kristu katambile kutukana?

¹³ Ha mashimbu amwe, yetu eswe twakuhanjika yuma  yize te kutwazangile kwamba. Alioze, kutwazangile kupwa ni ndako yakukumika akwetu hanji kwamba yuma yipi. Maliji api katambile kutuhuka mu kanwa lietu. Paulu kambile ngwenyi: “Mbilenu usasu weswe, ni ufwatulo, ni utenu, ni zungo, ni kutukana, hamwe ni uhuka weswe.” (A-Efwesu 4:31) Mbimbiliya jikwo jinalumbununa liji “kutukana” ngwo, “maliji api,” “matuka” ni “kwihia.” Maliji a matuka kakulelesa atu ni kwevwisa ngwe keshi ni ulemu. Twanuke kukwivwa kupiha kawashi, kashika twatamba kukeya ha yize mutwamba kuli ayo hanga tuchine kwavwisa kupiha.—A-Kolosu 3:21.

¹⁴ Mbimbiliya yakukanjisa nawa kutukana. Kutukana chili kuhanjika maliji api hanga tulemeke akwetu ku mbunge. Muchipiha nyi mutu matuka yoze alimbata nenyi hanji ana jenyi. Kwamba pundu, mutu yoze keshi kwecha ndako yacho, katamba kumusosolola mu chikungulwila. (1 A-Korindu 5:11-13; 6:9, 10) Ngwe chize twamona, nyi twahanjika yuma ya sonyi, ya mahuza ni kutukana, mutupihisa usepa wetu ni Yehova ni akwetu.

15. Kuhanjika cha mutapu uka chakukolesa usepa?

¹⁵ Kuchi mutuhasa kuzachisa chawana chetu cha kuhanjika ngwe chize Yehova anazange? Chipwe ngwe Mbimbiliya kuyishi kutulweza yize twatamba kuhanjika, ni yize kutwatambile, alioze yakutulweza hanga tuhanjike maliji ‘apema a kukolesa’ akwetu. (A-Efwesu 4:29) Maliji akukolesa akwetu kali apema, a umbovu nawa amwenemwene. Yehova kanazange tuzachise maliji jetu hanga tukolese ni kukwasa akwetu. Chino muchihasa kupwa chikalu, mumu chili chashi kuhanjika maliji api, a sonyi  kuhiana maliji akukolesa. (Titu 2:8) Tushimutwinenu ha chize mutuhasa akukolesa akwetu ni maliji jetu.

16, 17. (a) Mumu liaka twatamba kuchichimieka akwetu? (b) Iya mutuhasa kuchichimieka?

¹⁶ Yehova ni Yesu kakuchichimieka akwo. Ni yetu tunazange kwembulula. (Mateu 3:17; 25:19-23; Yoano 1:47) Twatamba kukolweza mutu ni kumusolwela ngwetu, twakumuzanga, mba tuhase kumuchichimieka kanawa. Mukanda wa Yishima 15:23, unambe ngwo: “Liji lia ha ola ya kulita, kuwahalio.” Nyi mutu kanatuchichimieka ni mbunge yeswe ha yuma yize twalinga, twakuwahilila chinji, nawa chakututakamisa.—Tanga Mateu 7:12; tala Maliji Akusongo 27.

¹⁷ Nyi wapwa ni ndako ya kulihulikila ha yuma yipema yize akwenu akulinga, muchipwa chashi kwachichimieka. Iya muhasa kuchichimieka? Muhasa kuchichimieka umwe ndumbu yoze wakululieka kanawa pande jenyi, yoze wakuhana makumbululo apema ku kukunguluka, hanji umwe mukweze wakukalila ufulielo wenyi ku shikola, hanji umwe ndumbu kashinakaji yoze wakuya chinji mu munda. Nyi waachichimieka ayo mawahilila chinji. Chikwo nawa, chili chilemu lunga kulweza mukwo pwo ngwenyi, kakumuzanga, nawa kakuwahilila ha yuma yipema yize akulinga. (Yishima 31:10, 28) Chizechene ngwe chitemo chakufupiwa mwalwa ni meya, ni atu no kakuwahilila chinji muze maachichimieka. Chino chili nawa chilemu chinji kuli ana. Kashika, fupa jila ya kuchichimiekenamo akwenu ha yitanga yo yipema ni kwakolweza. Kuchichimieka mutu muchihasa kumutakamisa ni kumwaha hamu, ni kumukolweza hanga ase tachi alinge yuma yize yinalite.

18, 19. Mumu liaka twatamba kusa tachi hanga tukolweze mandumbu jetu? Nawa kuchi mutuhasa kuchilinga?

 ¹⁸ Muze twakutakamisa ni kuchichimieka akwetu, twakwimbulula Yehova. Aye kakusa mbunge hali “mukwa kulikehesa” ni hali waze ali ni “spiritu ya kuhia.” (Izaia 57:15) Yehova kanazange hanga tulikolese “umwe ni mukwo” ni “kusangulwisa akwa kulela.” (1 A-Tesalonika 5:11, 14) Muze twakulinga chino, Zambi kakutala ni kulemesa tachi jize twakusa.

¹⁹ Hanji muhasa kumona umwe ndumbu mu chikungulwila yoze unapinji ni yipikalo hanji unanyenganyana. Yika muhasa kwamba hanga umukwase? Hanji kuchi  kuhasa kuhwisa milonga yenyi, alioze muhasa kulinga yimwe yize muyisolola ngwo, wakumuzanga. Ngwe chakutalilaho, muhasa kupalikisa mashimbu hamwe nenyi. Muhasa kumutangila chimwe chisoneko cha Mbimbiliya hanga umukolweze, ni kulemba nenyi hamuwika. (Samu 34:18; Mateu 10:29-31) Muhasa nawa kumulweza ngwe, mandumbu a mu chikungulwila kakumuzanga chinji. (1 A-Korindu 12:12-26; Tiangu 5:14, 15) Watamba kuhanjika ni kusolola ngwo yuma unahanjika yili yamwenemwene.—Tanga Yishima 12:25.

20, 21. Jila yika yipema yize mutuhasa kuhanyinamo yiyulo?

²⁰ Mutuhasa nawa kukwasa akwetu ha kwaha yiyulo  yipema. Yetu eswe tuli yihenge, kashika ha mashimbu amwe twakufupiwa yiyulo. Mukanda wa Yishima 19:20 unambe ngwo: “Panjika ku yiyulo, tambula kufumba, ukapwe ni mana ku songo lia mwono we.” Hi makulwana a mu chikungulwila wika ko mahasa kuhana yiyulo. Yisemi katamba kusongwela ana jo. (A-Efwesu 6:4) Nawa mandumbu a mapwo maahasa kuliyula umwe ni mukwo. (Titu 2:3-5) Amu twakuzanga mandumbu jetu, twatamba kusa shindakenyo ngwetu, yiyulo yize tunahe kuyichi kwevwisa yikola ku mbunge. Yika muyihasa kutukwasa kuhana yiyulo yipema?

²¹ Hanji unewuluka mashimbu waze umwe mutu akuhele chiyulo, chize chapwile chashi kuchitayiza. Mumu liaka watayijile chiyulo chacho? Kota wamwene ngwe mutu wacho kakukusa mbunge, hanji kahanjikile ni umbovu hamwe ni zango. (A-Kolosu 4:6) Nawa kota chiyulo chacho, chakatukile mu Mbimbiliya. (2 Timoteu 3:16) Chipwe mututanga Mbimbiliya hanji ka, alioze yiyulo yetu yatamba kukatuka mu Mbimbiliya. Nawa kutwatambile kushinjila akwetu atayize nyonga lietu, hanji kuzachisa Mbimbiliya kulita ni nyonga lietu. Kwiwuluka chize akuhele chiyulo, muchihasa kukukwasa muze muhana yiyulo kuli akwenu.

22. Kuchi muhasa kuzachisa chawana che cha kuhanjika?

²² Kuhanjika chili chawana cha Zambi. Zango lietu hali iye liatamba kutukwasa hanga tuzachise kanawa chawana chino. Ewuluka ngwe, maliji waze twakuhanjika kuli akwetu kali ni ndundo ja kwakolesa hanji kwalemeka. Kashika, tulikolwezenu hanga tuzachisa kanawa maliji jetu hanga tukolese akwetu ni kwatakamisa.