1, 2. Yika twatamba kunyingika hakutwala kuli Satana ni andemoniu?

HASHI haha mwono muukapwa upema chinji. Kwasala hakehe hanga tupwe ni mwono uze Zambi azangile hanga tupwe nawo. Alioze, haliapwila tuli hashi haze anayulu kuli Satana ni andemoniu. (2 A-Korindu 4:4) Chipwe ngwe kutushi kwamona, alioze katwamako nawa kali ni ndundo.

² Mu kapitulu yono, mutumona chize mutuhasa kukolesa usepa wetu ni Yehova, ni chize mutuhasa kulifunga ku miheto ya Satana. Yehova kanalakenya kutukwasa. Alioze, twatamba kunyingika yize Satana ni andemoniu akuzachisa hanga atwonge ni kutupiangula.

3. Yika Ndiapu anazange kutulinga?

³ Satana kakwamba ngwenyi, atu keshi kuwayila Yehova hamukunda wa zango, nawa ngwenyi, nyi twapalika mu kapinda mutwecha kumuwayila. (Tanga Yombi 2:4, 5.) Muze Satana ni andemoniu mamona mutu kanafupu kulilongesa hakutwala kuli Yehova, ayo kakweseka kumupiangula. Satana ni andemoniu kakwivwa uli unji muze akumona atu malihana kuli Yehova ni kwapapachisa. Mbimbiliya yinatesa Ndiapu ngwe ‘ndumba  wa kuhanjika ni lundunjila wakwendangana nikufupa yoze mahasa kuumbula.’ (1 Petulu 5:8) Satana kanazange kupihisa usepa wetu ni Yehova.—Samu 7:1, 2; 2 Timoteu 3:12.

4, 5. (a) Yika Satana kechi kuhasa kulinga? (b) Kuchi mutuhasa ‘kulimika ni Ndiapu’?

⁴ Alioze, kutwatambile kwivwa woma wa Satana ni andemoniu. Kuli yuma yize Satana kechi kuhasa kutulinga. Yehova kanalakenya ngwenyi, “mbunga yinene” ya akwa-Kristu amwenemwene kumakaalamwina ha “luyinda munene.” (Usolwelo 7:9, 14) Kashika, Ndiapu kechi  kuhasa kukinda yuma yacho yihone kulingiwa, mumu Yehova kakufunga atu Jenyi.

⁵ Nyi twapwa ni usepa ukolo ni Yehova, Satana kechi kuhasa kuupihisa. Liji lia Zambi linambe ngwo: “Yehova mapwa hamwe ni yenu nyi kachi enu munupwa hamwe nenyi.” (2 Sango ja Mianangana 15:2; tanga 1 A-Korindu 10:13.) Atu anji ashishika a ku mashimbu akunyima ngwe, Abele, Enoke, Noa, Sara ni Mose kalimikine ni Ndiapu ha kukundama kuli Yehova. (A-Hepreu 11:4-40) Ni yetu mutuhasa kupwa ngwe ayo. Liji lia Zambi linatulakenya ngwo: “Limikenu ni Ndiapu mba kumakanuchina.”—Tiangu 4:7.

6. Kuchi Satana akulimika ni yetu?

⁶ Chipwe ngwe Satana kananyingika ngwenyi, Yehova kechi kumwecha hanga atulinge yeswayo anazange, nihindu mahasa kulinga cheswacho hanga apihise usepa wetu ni Yehova. Musono, Ndiapu kakulimika ni yetu mu mitapu yinji yalisa. Kakuta miheto yizeyene atele ku mashimbu akunyima. Miheto yimwe yika yenayo?

7. Mumu liaka Satana analimika ni atu ja Yehova?

⁷ Postolo Yoano kasonekene ngwenyi: “Hashi heswe lukombo kuhakupomba mu chiyulo cha mwe chingulungulu.” (1 Yoano 5:19) Satana mwe unayulu hano hashi hapi, nawa kanazange hanga ayule atu ja Yehova. (Mika 4:1; Yoano 15:19; Usolwelo 12:12, 17) Ndiapu kananyingika ngwenyi, kali ni mashimbu akehe wika, kashika analimika chinji ni yetu hanga tweche kushishika kuli Zambi. Ha mashimbu amwe Ndiapu kakuta miheto yize tunanyingika, alioze ha mashimbu akwo kakuta miheto yize kutwanyingikine.

8. Yika hita mukwa-Kristu atamba kunyingika?

 ⁸ Twakutanga mu A-Efwesu 6:12 ngwo: “Twakulimika ni . . . maspiritu a ungulungulu muma mwa malilu.” Hita mukwa-Kristu kakwasa jita ni Ndiapu ni andemoniu jenyi. Twatamba kunyingika ngwetu, waze eswe akulihana kuli Yehova, kali mu jita yacho. Postolo Paulu yatoweza akwa-Kristu a mu Efwesu katatu keswe ngwenyi, “manenu ngu.”—A-Efwesu 6:11,13, 14.

9. Yika Satana ni andemoniu akufupa kutulinga?

⁹ Satana ni andemoniu jenyi kakweseka kutupiangula mu mitapu yinji. Nyi kutwafwile mu umwe muheto wa Satana, chino kuchalumbunukine ngwo, kutuchi kuhasa kufwa mu muheto ukwo. Ndiapu kakufupa yize twakuzanga hanga ahase kusakula miheto yize matutela. Alioze, iye katambile kutupiangula, mumu Mbimbiliya yakutulongesa hakutwala ku miheto yacho. (2 A-Korindu 2:11; tala Maliji Akusongo 31.) Muheto umwe uli yuma ya andemoniu.

10. (a) Yika yuma ya undemoniu yinalumbunuka? (b) Kuchi Yehova akumona yuma ya undemoniu?

¹⁰ Yuma ya undemoniu yinalumbunuka kulinga yuma ya tufutafuta yize yakukundamisa mutu kuli andemoniu, ngwe, kutaha, kupanda wanga, kulinga yipepela ni kuhanjika ni afu. Mbimbiliya yinatulweze ngwo, kulinga yuma ya undemoniu chili ‘uzelwokeso,’ nawa ngwo kutushi kuhasa kuwayila Yehova aku nawa tunalingi yuma ya undemoniu. (Shimbi Yamuchiali 18:10-12; Usolwelo 21:8) Kashika, akwa-Kristu katamba kwehuka yuma yeswe yize yinatale ha undemoniu.—A-Roma 12:9.

11. Yika muyihasa kulingiwa nyi mutufupa kunyingika yuma ya tufutafuta?

 ¹¹ Satana kananyingika ngwenyi, nyi twakufupa kunyingika yuma ya tufutafuta, muchipwa chashi kuli iye kutupiangula ni yuma ya undemoniu. Cheswacho chuma cha undemoniu muchipihisa usepa wetu ni Yehova.

12. Kuchi Satana akufupa kupiangula manyonga jetu?

¹² Satana kakufupa kupinjisa manyonga ja atu. Kakulumbanganyisa atu hanga anyonge “chipi ngwo, chipema, ni chipema ngwo, chipi.” (Izaia 5:20) Ndiapu kakuzanga hanga atu anyonge ngwo, yiyulo ya mu Mbimbiliya kuyishi ni ulemu, nawa ngwo, mutuwahilila nyi mutwehuka shimbi ja Zambi.

13. Yika yinasolola ngwo Satana kakweseka kulumbanganyisa manyonga ja atu?

¹³ Kuyambashana chili umwe muheto uze Satana akuta chinji. Waputukile kulu kuta muheto wacho. Mu munda wa Endene, kesekele kulumbanganyisa manyonga ja Eva muze ahulile ngwenyi: “Kuma, Zambi hanambe ngwenyi, Kanda nukalia ku mitondo yeswe ya mu munda nyi?” (Uputukilo 3:1) Ha matangwa ja Yombi, Satana yahula Yehova kulutwe lia angelo ngwenyi: “Te chawana anavwila woma Zambi?” (Yombi 1:9) Muze Yesu te hamupapachisa, Satana yahamwisa Yesu ha kumwamba ngwenyi: “Nyi uli mwe Mwana Zambi, amba mawe ano alumuke mbolo.”—Mateu 4:3.

14. Yika Satana akulinga hanga atu atayize ngwo yuma ya undemoniu hi yipiko?

¹⁴ Musono, Ndiapu kananungu ni kuyambashanyisa atu. Kakweseka kulumbanganyisa atu hanga anyonge ngwo, yuma ya undemoniu hi yipiko hakuyisolola  ngwe yipema. Chipwe akwa-Kristu amwe kakwapiangula hanga alinge yuma yacho. (2 A-Korindu 11:3) Mba yika mutuhasa kulinga hanga tulifunge? Kuchi mutuhasa kupwa ni shindakenyo ngwetu, Satana keshi kutupiangula ni muheto wenyi? Tutalenu yikuma yaali yize Satana akuzachisa hanga atupiangule: yiheho ni uukiso.

15. Yiheho ya mutapu uka yize muyihasa kutunjisa mu yuma ya undemoniu?

¹⁵ Yinema yinji ya ha TV, yiheho ni site, yakusolola yuma ya undemoniu ni tufutafuta. Atu anji kakumona ngwe kukushi mulonga niumwe nyi matala yuma yacho, nawa keshi kumona upi uze wakwiza ha kulinga yuma ya undemoniu ni tufutafuta. Mutu mahasa kulinjisa mu yuma ya undemoniu kupalikila mu yuma ngwe, tufutafuta, kutaha, mikanda ni yuma yikwo. Ndiapu kakusweka upi wa yuma yacho ni kuyisolola ngwe yipema chinji. Mutu mahasa kunyonga ngwenyi, hi chipiko kutala yinema yize yakusolola yuma ya undemoniu hanji ya tufutafuta, ni kwamba ngwenyi, nakutala wika, alioze chishi kuyilinga. Mumu liaka nyonga liacho lili lipi?—1 A-Korindu 10:12.

16. Mumu liaka twatamba kwehuka yiheho yize yakusolola yuma ya undemoniu?

¹⁶ Satana ni andemoniu keshi kuhasa kunyingika manyonga jetu. Alioze, mahasa kunyingika yize twakuzanga ni chize twakunyonga ha kumona yize twakusakula ku mwono wetu ni yize twakulinga mu usoko, ni yiheho yize twakuzanga. Nyi twasakula yinema, miaso, hanji mikanda yize yinahanjika hakutwala ku kupanda, yipupu, andemoniu, wanga, yipepela, hanji yuma yikwo, Satana  ni andemoniu mahasa kunyingika ngwo tunazange yuma yacho. Kashika mahasa kutupiangula hanga tulinjise mu yuma ya undemoniu.—Tanga A-Ngalashia 6:7.

17. Kuchi Satana akufupa kutupiangula nyi tunayiji?

¹⁷ Satana nawa mahasa kutupiangula nyi tunayiji. Musono, atu anji kakumona lamba ha mukunda wa yikola. Mutu mahasa kufupa uukiso weka ni weka, alioze keshi kuhinduka. (Marku 5:25, 26) Chino muchihasa kuhongesa mutu, nawa mutu wacho mahasa kutayiza uukiso weswawo muusoloka. Alioze, yetu akwa-Kristu,  twatamba kukeya hanga tuhone kutayiza uukiso wakulinga tufutafuta.—Izaia 1:13.

18. Uukiso uka uze akwa-Kristu atamba kwehuka?

¹⁸ Ku shakulu, mu Izalele atu amwe te kakulinga tufutafuta. Yehova yaalweza ngwenyi: “Muze munuzoza moko jenu, mungunuswekela meso jami; chipwe munulemba lembie-e-e, chichi kunwivwa.” (Izaia 1:15) Achinyonga ha chino—Yehova te kechi kwivwa yilemba yo! Kutwazangile kulinga chuma ni chimwe chize muchipihisa usepa wetu ni Yehova ni kutukinda ahone kutukwasa, chipi-chipi muze tunayiji. (Samu 41:3) Nyi tunanyongo kutambula umwe uukiso, twatamba kunyingika nyi uli ni yuma ya undemoniu hanji ya tufutafuta. (Mateu 6:13) Nyi uukiso wacho muusoloka ngwe uli ni yuma yacho twatamba kuwehuka!—Tala Maliji Akusongo 32.

19. Yika yakulingisa atu hanga evwile Ndiapu woma?

¹⁹ Atu amwe kakunyonga ngwe Ndiapu ni andemoniu katwamineko, alioze eka kananyingika ngwo, katwamako ha mukunda wa yuma yize hiyinalingiwa ku mwono wo. Atu amwe kakwivwa woma unji wa andemoniu ni kupwa ndungo ja yuma ya yipupu. Amwe kakuvwisa akwo woma ha kwatela yishima ya andemoniu ni yuma ya wanga. Kanji-kanji, atu kakukomoka chinji ha sango jacho, ni kujilweza akwo. Sango jino jakutwala atu hanga evwile Ndiapu woma.

20. Kuchi mutuhasa kumwanga mahuza a Satana?

²⁰ Nyonga ha chino, Satana kanazange hanga atu amuvwile woma. (2 A-Tesalonika 2:9, 10) Iye kali mukwa-mahuza nawa kananyingika chize mahasa kupiangula  manyonga ja atu waze akuzanga sango ja yuma ya andemoniu, ni yuma yize hi yamwenemwene ko. Atu jacho mahasa kuhanjika sango ja yuma yize maanyonga ngwo, amonanga hanji evwanga. Nyi atu anji mahanjika chinji ha sango jacho, mujilimwanga. Kashika, nyi twahanjika chinji ha sango jacho, mutukwasa Satana hanga evwise atu woma. Ha chino, kutwatambile kuhanjika hanji kumwanga sango jacho.—Yoano 8:44; 2 Timoteu 2:16.

21. Shimbu tuhanjike sango ja andemoniu, ha yuma yika twatamba kulihulikila?

²¹ Nyi umwe kavumbi ka Yehova te kakulinga yuma ya kupanda ku mashimbu akunyima, katambile kulweza akwo yuma yacho. Atu ja Yehova katambile kwivwa woma wa yize Ndiapu ni andemoniu jenyi mahasa kulinga. Alioze, ayo katamba kulihulikila hali Yesu ni ha ndundo jize Yehova amuhele. (A-Hepreu 12:2) Yesu te keshi kulweza tumbaji twenyi sango ja andemoniu. Iye te kakulihulikila ha sango ja Wanangana ni “yilinga yinene ya Zambi.”—Yilinga 2:11; Luka 8:1; A-Roma 1:11, 12.

22. Yika mununga ni kulinga?

²² Kutwatambile kuvulama ngwetu, chuma chize Satana anazange chili kupihisa usepa wetu ni Yehova. Iye malinga yeswe yize mahasa hanga apihise usepa wetu ni Yehova. Alioze, tunanyingika miheto yeswe ya Ndiapu, nawa mutununga ni kulikolweza hanga twehuka mitapu yeswe ya yuma ya undemoniu. Kutwatambile kuhana “unjililo” kuli Ndiapu hanga akokolole ufulielo wetu. (Tanga A-Efwesu 4:27.) Ewa, nyi twalimika ni Ndiapu, mutwehuka miheto yenyi, mba Yehova matufunga.—A-Efwesu 6:11.