Shimbi ja Zambi jakukatuka ha yikota ya shimbi. Yikota yacho yili umwenemwene uze tunawana mu Mbimbiliya. Umwenemwene wacho wakutukwasa kunyingika chize Zambi akunyonga nawa akwivwa ha kutwala ku chimwe chikuma. Shimbi jino jakutukwasa nawa kukwata yiyulo yipema ni kulinga yuma yize yinalite. Nawa jakutukwasa muze tunambe kulinga chuma chize mutumona ngwe kukushi shimbi ya Zambi yize yinatale ha chuma chacho.

▸ Kapitulu 1, paragrafu 8

Kwononokena Yehova chinalumbunuka, kulinga ni mbunge yeswe yuma yize matwita. Yehova kanazange tumwononokene ha mukunda wa zango lietu. (1 Yoano 5:3) Nyi twazanga Zambi ni kumufuliela, mutukaula usongwelo wenyi ha yuma yeswe yize mutulinga. Nawa mutumwononokena chipwe ngwe muchipwa chikalu kuchilinga. Kuli yetu, chili chipema chinji kwononokena Yehova, mumu iye kakutulongesa chize mutuhasa kupwa ni uwahililo ku mwono haliapwila nawa kanalakenya kutwaha yiwape yinji kulutwe lia matangwa.—Izaia 48:17.

▸ Kapitulu 1 paragrafu 10

Yehova kahanyine kuli hita mutu uhashi wa kusakula chipi ni chipema. Iye kakatutangile ngwe tuponya. (Shimbi Yamuchiali 30:19; Yoshua 24:15) Yetu mutuhasa kuzachisa uhashi wacho hanga tukwate yiyulo yipema. Alioze nyi twakanyamine, mutuhasa kukwata yiyulo yipi. Uhashi uno unasolola ngwo, hita mutu katamba kusakula nyi mashishika kuli Yehova nyi ka, nawa ni kusolola ngwenyi kakumuzanga.

▸ Kapitulu 1, paragrafu 12

Yehova hanase shimbi hanji usongwelo wa chipi ni chipema uze twatamba kukaula. Usongwelo wacho mutuhasa kuuwana mu Mbimbiliya,  nawa ni kunyingika chize muuhasa kutukwasa kupwa ni mwono upema. (Yishima 6:16-19; 1 A-Korindu 6:9-11) Usongwelo wacho wakutukwasa kunyingika chize Zambi akunyonga ha yuma yipi ni yipema. Nawa muutukwasa kunyingika chize mutuhasa kusolola zango, kukwata yiyulo yipema, ni chize mutupwa yimbovu kuli akwetu. Chipwe ngwe hano hashi atu kananungu ni kulinga yuma yipi, alioze usongwelo wa Yehova hakutwala ku yipi ni yipema kuushi kwalumuka. (Shimbi Yamuchiali 32:4-6; Malakia 3:6) Kukaula usongwelo wa Yehova chakutufunga ku lamba linji lize atu anji akupwa nalio.

▸ Kapitulu 1, paragrafu 17

Mbunge yetu yili shimbi yize yili muchima lietu yakutukwasa kunyingika chipi ni chipema. Yetu eswe Yehova hanatwehe mbunge. (A-Roma 2:14, 15) Mba mbunge yetu yikalakale kanawa, twatamba kuyifumba kulita ni usongwelo wa Yehova wa chipi ni chipema. Nawa mbunge yetu muyihasa kutukwasa kukwata yiyulo yize muyivwisa Zambi kuwaha. (1 Petulu 3:16) Mbunge yetu muyihasa kututoweza muze mutufupa kukwata chiyulo chipi, hanji kutuvwisa yinyengo muze mutulinga chuma chipi. Nawa mbunge yetu mahasa kuyonga, alioze ni ukwaso wa Yehova, muyihasa kupema cheka. Mbunge yipema yakutwaha sambukila mu manyonga, nawa yakukwasa hanga tulise vumbi yetu ene.

▸ Kapitulu 2, paragrafu 3

Kuvwila Zambi woma chinalumbunuka kumuzanga ni kumuvumbika chinjini kwehuka kulinga yuma yize muyimunehena yinyengo. Woma wa Zambi muutukwasa kulinga yuma yipema ni kwehuka yuma yipi. (Samu 111:10) Chikwo nawa, muutukwasa kupanjika kanawa yuma yeswe yize Yehova akutulweza. Nawa wakutukwasa kumanununa yuma yeswe yize twakumulakenya, mumu twakumuvumbika chinji. Kuvwila Zambi woma chinatale nawa ha chize twakunyonga, ni chize twakutwama ni akwetu ni ha yiyulo yeswe yize twakukwata ha tangwa ni tangwa.

▸ Kapitulu 2, paragrafu 9

Kulikonyeka chili chinyengo chize mutu akwivwa muze halinga chuma chipi. Atu waze akuzanga Zambi kakwivwa chinyengo chinji muze akunyingika ngwo, kalinga chuma chize Yehova keshi kuzanga. Nyi twalinga chuma chipi, twatamba kulemba kuli Yehova hanga atukonekene kupalikila mu chitapo cha ukuule wa Yesu. (Mateu 26:28; 1 Yoano 2:1, 2) Muze mutulikonyeka ni mbunge yeswe ni kwecha kulinga yuma yipi, mutuhasa kupwa ni shindakenyo ngwetu Yehova matukonekena. Kutwatambile kulipikala nawa ni yuma yipi yize twalingile ku mashimbu a kunyima. (Samu 103:10-14; 1 Yoano 1:9; 3:19-22) Twatamba kulikolweza hanga tulilongese ha uhenge wetu ni kwehuka manyonga api, nawa ni kukaula usongwelo wa Yehova.

▸ Kapitulu 2, paragrafu 18

Nyi mutu malinga shili yinene, nawa kasolo kulikonyeka hanga akaule usongwelo wa Yehova, kakumusosolola mu chikungulwila. Nawa nyi umwe mutu hamusosolola mu chikungulwila, twatambile kuhanjika nenyi chipwe kutwama nenyi. (1 A-Korindu 5:11; 2 Yoano 9-11) Kusosolola mutu chakufunga jina lia Yehova ni chikungulwila. (1 A-Korindu 5:6) Kusosolola nawa chakufumba mutu yoze walinganga shili hanga alikonyeke hanga hase kuhiluka kuli Yehova.—Luka 15:17.

▸ Kapitulu 3, paragrafu 19

Yehova kakutuzanga, nawa kanazange kutukwasa. Kashika iye akutwaha usongwelo ni yiyulo kupalikila mu Mbimbiliya ni muli atu waze akuzanga Zambi. Tuli yihenge, kashika twakufupa ukwaso. (Jeremia 17:9) Nyi twapanjika atu waze Yehova akuzachisa hanga atusongwele, mutusolola ngwetu, twakuvumbika Yehova nawa ngwo, tunazange kumwononokena.—A-Hepreu 13:7.

▸ Kapitulu 4, paragrafu 2

Amu tuli yihenge chakupwa chashi kupwa ni ndako ya chipululu ni kulizata. Alioze Yehova kanashimbwila hanga tupwe akwa-kulikehesa. Kanji-kanji, twakunyingika ulumbunwiso wa kulikehesa muze twakunyonga ha chize Yehova ali munene kuhiana yetu. (Yombi 38:1-4) Chikwo nawa, kulikehesa chili kulilongesa kunyonga chinji hali akwetu kuhiana hali yetu ene ni kwalingila yuma yipema. Kulizata chakulingisa atu kunyonga ngwe ayo kali alemu chinji kuhiana akwo. Alioze, mukwa-kulikehesa kakwete nyonga lialita hakutwala kuli iye mwene, nawa kananyingika ulelu wenyi ni yitanga yenyi yipema. Nyi mahengesa iye kakutayiza uhenge wenyi, kakwita ukonekeno, nawa kakutayiza yize akwo akwamba ni yiyulo yo. Mutu yoze walikehesa kakufuliela muli Yehova ni kukaula usongwelo wenyi.—1 Petulu 5:5.

▸ Kapitulu 4, paragrafu 4

Utumino uli wata hanji ulite uze mutu akupwa nawo wa kukwata yiyulo ni kutumina akwo. Yehova mwe uli ni chiyulo chilemu mu malilu ni hashi. Iye mwe watangile yuma yeswe, kashika Iye mwe ukwete wika ndundo jinji. Aye kakuzachisa utumino wenyi hanga akwase atu. Yehova kahanyine yiteli kuli amwe atu hanga atufunge. Ngwe chakutalilaho, Yehova kanazange hanga tuzeyele yisemi, makulwana a mu chikungulwila, ni manguvulu. (A-Roma 13:1-5; 1 Timoteu 5:17) Alioze, muze shimbi ja manguvulu mujilimika ni shimbi ja Zambi, etu twakwononokena Zambi. (Yilinga 5:29) Muze twakwononokena atu waze Yehova akusakula hanga atuyule, twakusolola ngwetu, twakusa vumbi yiyulo ya Yehova.

▸ Kapitulu 4, paragrafu 7

Makulwana a mu chikungulwila, kali mandumbu ajama mu ufulielo, Yehova kakwazachisa hanga afunge chikungulwila. (Shimbi Yamuchiali 1:13; Yilinga 20:28) Makulwana jacho kakutukwasa hanga tukolese usepa wetu ni Yehova nawa hanga tununge ni kumuwayila ni sambukila hamwe ni ululikiso. (1 A-Korindu 14:33, 40) Mba makulwana aatongole ni ukwaso  wa spiritu yisandu, ayo katamba kupwa ni yitanga yize tunawana mu Mbimbiliya. (1 Timoteu 3:1-7; Titu 1:5-9; 1 Petulu 5:2, 3) Twatamba kujikijila ni kukwasa ululikiso wa Zambi, mba tuhasa kuzeyela makulwana a mu chikungulwila.—Samu 138:6; A-Hepreu 13:17.

▸ Kapitulu 4, paragrafu 8

Yehova hanahane kuli yisemi chiteli chakufunga usoko. Alioze Mbimbiliya yinasolola ngwo, lunga kali mutwe wa usoko. Nyi mu usoko mushi tata, mama mahasa kupwa mutwe wa usoko. Yoze uli mutwe wa usoko katamba kukwasa usoko wenyi ha kwaha kulia, mazalo ni zuwo. Chikwo nawa, mutwe wa usoko katamba kukwasa akwa jiko lienyi hanga awayile Yehova. Chakutalilaho, iye katamba kukolweza akwa jiko lienyi hanga aye ku kukungulula mashimbu eswe, aye ni kwambujola nawa ni kulilongesa no Mbimbiliya hamuwika. Iye nawa mwe uli ni chiteli cha kukwata yiyulo mu usoko. Mutwe wa usoko katamba kwimbulula Yesu hakupwa chimbovu nawa mutu mwashi, katambile kupwa mukalu hanji chiswi. Nyi malinga chino, mu usoko wenyi mumupwa zango linji, matwama kanawa, nawa usepa wo ni Yehova muukola.

▸ Kapitulu 4, paragrafu 12

Chizavu cha Tusongo, chili chizavu cha atu waze ali ni kutalatala cha kutwama mu malilu, waze Zambi akuzachisa hanga asongwele atu jenyi. Ku sekulu yitangu, Yehova kazachishile chizavu cha tusongo hanga chisongwele chikungulwila chitangu cha akwa-Kristu mu mulimo wo wa kuwayila Yehova ni wa kwambujola. (Yilinga 15:2) Musono, chizavu cha mandumbu waze kukalakala ngwe Chizavu cha Tusongo, kakusongwela, kakulongesa, ni kufunga atu ja Zambi. Muze mandumbu wano akukwata yiyulo, ayo kakufuliela ha usogwelo wa Liji lia Zambi ni spiritu yenyi yisandu. Yesu kavulukile chizavu chino cha mandumbu akuwayisa ngwo, “ndungo wamwenemwene, wa kukanyama.”—Mateu 24:45-47.

▸ Kapitulu 4, paragrafu 15

Ha mashimbu amwe ndumbu wa pwo mahasa kumwita hanga alinge umwe mulimo uze te atamba kulinga kuli ndumbu wa lunga. Nyi iye malinga mulimo wacho, iye masolola ngwo kakuvumbika ululikiso wa Yehova ha kufuka ku mutwe. Alioze, iye katambile kufuka ku mutwe ha yuma yeswe yize malinga. Chakutalilaho, nyi umwe ndumbu wa pwo kanasongwela longeso lia Mbimbiliya nawa mukwo-lunga hanji ndumbu wa lunga yoze hanamupapachisa hwali, iye katamba kufuka ku mutwe.—1 A-Korindu 11:11-15.

▸ Kapitulu 4, paragrafu 17

Kwehuka yuma ya mafwefwe, chinalumbunuka kulituna kulinjisa mu yuma ya mafwefwe. (Yoano 17:16) Atu a Yehova kakukwasa Wanangana wenyi. Yetu twakwehuka yuma ya mafwefwe a hano hashi, ngwe chize alingile Yesu.

Yehova kanatwambe ngwenyi, twatamba “kuzeyela kuli mianangana, ni akwa kuyula.” (Titu 3:1, 2; A-Roma 13:1-7) Alioze shimbi ya Zambi yinambe nawa ngwo, chili chipi kushiha atu. Kashika akwa-Kristu kakulituna kuya ni kwasa jita. Nyi umwe mukwa-Kristu mazanga kulinga umwe mulimo uze unatale ha yuma ya mafwefwe, iye katamba kupukuna ha chino, kulita ni mbunge yenyi.

Yetu twakuwayila wika Yehova mumu iye mwe watutangile. Kashika tushi kuwayila pandela hanji kwimba mwaso wa chifuchi. (Izaia 43:11; Daniele 3:1-30; 1 A-Korindu 10:14) Chikwo nawa, atu a Yehova kakusakula ene hanga ahone kuya ni kuvotala hanji kusakula manguvulu. Mumu yetu hitunasakula kupwa sali lia unguvulu wa Zambi.—Mateu 22:21; Yoano 15:19; 18:36.

▸ Kapitulu 5, paragrafu 2

Spiritu ya akwa-hashi yakukolweza atu hanga anyonge ngwe chize Satana akunyonga. Manyonga wano kakusoloka chinji kuli atu waze keshi kuzanga  Yehova nawa keshi kumwimbulula chipwe kukaula shimbi jenyi. (1 Yoano 5:19) Manyonga ni yitanga yacho ye akuvuluka ngwo, spiritu ya hano hashi. (A-Efwesu 2:2) Atu a Yehova kakusa tachi jinji hanga spiritu yacho yichine kwapiangula. (A-Efwesu 6:10-18) Twakuzanga chize Yehova akulinga yuma, nawa twakulikolweza hanga tunyonge ngwe chize iye akunyonga.

▸ Kapitulu 5, paragrafu 7

Utanguke unalumbunuka kulimika ni umwenemwene wa mu Mbimbiliya. Yitanganyanyi kakulimika ni Yehova, ni Yesu, mwe Mwanangana wa mu Wanangana wa Zambi, nawa kakweseka kupiangula atu hanga alichinge ha utanguke wo. (A-Roma 1:25) Ayo kanazange kuyambashanyisa manyonga ja atu waze akuwayila Yehova. Atu amwe a mu chikungulwila chitangu cha akwa-Kristu kapwile yitanganyanyi, chipwe musono kwali. (2 A-Tesalonika 2:3) Atu waze ashishika kuli Yehova katambile kulikata ni yitanganyanyi. Twatambile kwecha atupiangule kuli akwetu hanga tutange, hanji kupanjika yize yitanganyanyi akwamba. Yetu twashishika kuli Yehova nawa tunazange kuwayila wika iye.

▸ Kapitulu 5, paragrafu 9

Kulita ni shimbi ya Mose, muze vungu lia Izalele liapwile ni kwita kuli Yehova hanga aakonekene, ayo te kakutwala yitapo ya tushitu, maji, ni masangu mu tembele. Yitapo yacho te yakwiwulwisa A-Izalele ngwo, Yehova te mahasa kukonekena shili yo, ni ya hita mutu. Kulutwe lia matangwa, muze Yesu te hahana mwono wenyi hanga Zambi akonekene shili yetu, atu te keshi kufupiwa nawa kuhana yitapo yacho. Yesu kahanyine chitapo chingunu “kamuwika kunahu.”—A-Hepreu 10:1, 4, 10.

▸ Kapitulu 7, paragrafu 6

Kulita ni Shimbi ja Mose, atu te mahasa kushiha tushitu hanga alie. Nawa ayo te kakuzachisa tushitu hanga ahane ngwe yitapo. (Ulevi 1:5, 6)  Chipwe chocho, Yehova te keshi kwecha hanga atu amwese tushitu lamba. (Yishima 12:10) Chikwo nawa, kwapwile Shimbi yize te yakufunga mwono wa tushitu. Shimbi yacho te yakwamba ngwo, A-Izalele katamba kufunga kanawa yimuna yo hanji tushitu.—Shimbi Yamuchiali 22:6, 7.

▸ Kapitulu 7, paragrafu 6

Tuma tukehe-tukehe twatwama mu manyinga. Manyinga kali ni yuma yiwana yilemu: ngwe, glóbulos vermelhos, glóbulos brancos, plaquetas ni plasma. Mu yuma yino yiwana mwe mwatwama tuma tukehe-tukehe, avuluka ngwo, frações de sangue. *

Akwa-Kristu kakulituna kutambula manyinga, chipwe hita chuma cha yuma yiwana ya mu manyinga. Shina ayo katamba kutambula tuma tukehe-tukehe twatwama mu manyinga? Mbimbiliya kuyishi kuhanjika pundu ha chikuma chino. Kashika, hita mukwa-Kristu katamba kusakula mwene kulita ni mbunge yenyi yakufumba ni shimbi ja Mbimbiliya, nyi matayiza nyi ka.

Akwa-Kristu amwe kakulituna kutambula tuma tukehe-tukehe twatwama mu manyinga, mumu kakunyonga ngwo, Shimbi yize Zambi ahanyine kuli A-Izalele yambile ngwo, manyinga eswe a kashitu katamba kwazujila “hashi.”—Shimbi Yamuchiali 12:22-24.

Alioze eka kali ni manyonga alisa. Ayo keshi kumona upi niumwe wa kutayiza tuma tukehe-tukehe twatwama mu manyinga. Kakunyonga ngwo, tuma twacho hi mwono ko nawa.

Muze mukwata chiyulo hakutwala ku tuma tukehe-tukehe twatwama mu manyinga, nyonga ha yihula yino:

• Shina nguli ni shindakenyo ngwami, nyi nalituna tuma tukehe-tukehe twatwama mu manyinga chinalumbunuka ngwo, chichi kutambula yitumbo yize muyikinda manyinga kufwambuka chinji muze anangupasula?

•   Kuchi munguhasa kulumbununa kuli ndotolo yize ngunalitunyina hanji ngunatayijila tuma tukehe-tukehe twatwama mu manyinga?

Uukiso. Amu tuli akwa-Kristu, kutushi kuhana manyinga chipwe kutuchizawo aatulike ha jimwe poso muze kanda achitupasula hanga akatusewo cheka nawa. Alioze, kuli uukiso ukwo nawa uze akuzachisa manyinga a mutu mwene. Ha uukiso wacho, hita mukwa-Kristu katamba kusakula mwene chize anazange hanga azachise manyinga jenyi ha mashimbu waze anamupasula, hanji muze anamupimi. Ha mashimbu jacho, mahasa kuzachisa manyinga a mutu ni kwatulika ha amwe mashimbu.—Mba unyingike nawa sango jikwo, tala Kaposhi wa Kutalila, wa 15 Outubro wa 2000, mafwo 30-31.

Chakutalilaho, kuli umwe uukiso uze akuvuluka ngwo, hemodiluição. Mu uukiso wacho, mutu yoze mapasula kakumuchiza chitangu manyinga mu mujimba ni kusalakanyisamo meya. Muze anachimupasula hanji mahwisa kumupasula, mba hi mahilwisa cheka manyinga jacho mu mujimba.

Uukiso ukwo uli wa kufunga manyinga ja mutu muze anamupasula  (recuperação intraoperatória de células). Mu uukiso wacho, manyinga waze mutu akutuhuka muze anamupasula, kakwakunga ni kwakosa mba ahilwise cheka mu mujimba muze anamupasula, hanji muze mahwisa kumupasula.

Hita ndotolo mahasa kulinga uukiso wacho mu jila yalisa. Kashika, mukwa-Kristu katamba kuhanjika ni ndotolo yenyi hanga anyingike yize malinga ni manyinga jenyi, shimbu kanda achitayiza hanga amupasule, amupime hanji kutambula uukiso weswawo.

Shimbu kanda uchikwata chiyulo hakutwala ku uukiso uze mazachisa manyinga je, nyonga ha yihula yino:

• Nyi manguchiza manyinga hanga aatulike ha amwe mashimbu, hanji kwakwika ahone kwenda mu mujimba, shina mbunge yami muyitayiza ngwo, manyinga jacho nihindu kali ni ami, nyi katamba kwazujila “hashi”?—Shimbi Yamuchiali 12:23, 24.

• Shina mbunge yami yakufumba ni Mbimbiliya muyingulema nyi manguchiza manyinga mu mujimba hanga aalulieke mba angusewo cheka?

• Shina ngunanyingika ngwami, nyi chatayijile uukiso weswe uze mazachisa manyinga jami, ngunalitunu nawa kupima cha manyinga ni uukiso wa hemodiálise hanji wakuzachisa makina (coração-pulmão) waze akukalakala ngwe mbunge ni yihunguhungu muze anapasula mutu?

Shimbu kanda tukwata chiyulo hakutwala ku tuma tukehe-tukehe twatwama  mu manyinga ni uukiso uze mazachisa manyinga jetu, twatamba kulemba hanga twite usongwelo wa Yehova ni kuhengwola sango jize jinahanjika ha chikuma chacho. (Tiangu 1:5, 6) Nyi twalinga chino, mba mutuzachisa mbunge yetu yakufumba ni Mbimbiliya hanga tukwate chiyulo. Kutwatambile kuhula akwetu yize ayo te malinga nyi te kali mu chihela chetu, nawa niumwe katambile kutushinjila kukwata chiyulo.—A-Roma 14:12; A-Ngalashia 6:5.

▸ Kapitulu 7, paragrafu 11

Kulinanga ku yitanga chinalumbunuka kupwa ni ndako hamwe ni mianda yipema ku meso ja Zambi. Che kwamba, twatamba kunyonga, ni kulinga yuma yize yalinanga. Yehova kanatulweze hanga twehuke mutapu weswe wa utanji hanji ukoi. (Yishima 1:10; 3:1) Twatamba kusa tachi hanga tununge ni kulinanga ku meso ja Yehova, chipwe ngwe kanatweseka hanga tulinge yuma yipi. Twatamba kulemba kuli Zambi mashimbu eswe hanga atukwase kupwa ni manyonga apema nawa hanga tupwe ni tachi ja kulituna yeseko ya kulinga yuma ya luchisa.—1 A-Korindu 6:9, 10, 18; A-Efwesu 5:5.

▸ Kapitulu 8, paragrafu 11

Yitanga ya sonyi muyihasa kulumbunuka kuhanjika hanji kulinga yuma yize yakulimika ni shimbi ja Zambi nawa yakusolola yitanga ya sonyi. Mutu yoze wakulinga yuma yino kakusolola ngwo, keshi kuvumbika shimbi ja Zambi. Nyi mutu malinga yuma ya luchisa, kakumusopesa kulita ni Mbimbiliya. Luchisa kanalumbunuka mutapu weswe wa shili. Kulita ni yuma ya luchisa yize alinga, mahasa kumusopesa mu chikungulwila.—A-Ngalashia 5:19-21; A-Efwesu 4:19; mba unyingike nawa sango jikwo, tala “Yihula Ya Waze Akutanga Mikanda Yetu” mu Kaposhi wa Kutalila wa 15 Julho, 2006.

▸ Kapitulu 9, paragrafu 7; Kapitulu 12, paragrafu 10

Yehova katangile kulisumbakenya ngwe jila yipema yize lunga ni pwo waze alimbata mahasa kusolwelamo ngwo kakulizanga. Alioze, muze mutu maputuka kulisokota ku malambu hanji kulipinya-pinya ku upwo hanji ku ulunga hanga alivwise kuwaha, aye kanazachisa mujimba wenyi mu jila yaluchisa. Yitanga yino muyihasa kupihisa usepa wa mutu ni Yehova. Muyihasa kumunehena usolo upi, nawa mutu wacho mahasa kupwa ni manyonga api hakutwala ku kulisumbakenya. (A-Kolosu 3:5) Mutu yoze uli ni ndako yacho nyi mamona ngwenyi chinakaliwa kuyecha, katamba kulikolweza, kanda ahonga. (Samu 86:5; 1 Yoano 3:20) Nyi unapinji ni ndako yacho, lemba kuli Yehova ni mbunge yeswe nawa mwite hanga akukwase. Ehuka kutala yizulie ya sonyi hanji pornografia, yize muyihasa kukunyongesa nawa yuma ya luchisa. Nwa hanjika ni yisemi je akwa-Kristu hanji sepa lie wajama mu ufulielo yoze wakusa vumbi shimbi ja Yehova. (Yishima 1:8, 9; 1 A-Tesalonika 5:14; Titu 2:3-5) Pwako ni shindakenyo ngwe, Yehova kanamono, nawa kakulemesa tachi jize wakusa hanga upwe mutu yoze walinanga.—Samu 51:17; Izaia 1:18.

▸ Kapitulu 9, paragrafu 9

Ndako ya kumbata mapwo aali hanji anji, kakuyivuluka ngwo kuhalika. Yehova kalingile umbachiso hanga upwe wa lunga ni pwo umuwika. Ha mashimbu a Izalele, Zambi te kakwecha malunga hanga ambate mapwo aali hanji anji, alioze upele wenyi te hiwenawoko. Musono, Yehova keshi kutayiza luhali ha kachi ka atu jenyi. Lunga mahasa kupwa wika ni pwo umuwika, nawa pwo mahasa kupwa ni lunga umuwika.—Mateu 19:9; 1 Timoteu 3:2.

▸ Kapitulu 10, paragrafu 12

Yehova kanazange hanga pwo ni lunga atwame hamuwika ku miaka yeswe. (Uputukilo 2:24; Malakia 2:15, 16; Mateu 19:3-6; 1 A-Korindu 7:39) Yehova kakutayiza wika kulilakula nyi umwe malinga upangala. Chino nyi chalingiwa, Yehova kakuhana kuli mutu yoze kavulumwine ulite wa kusakula nyi malilakula ni mukwo nyi ka.—Mateu 19:9.

Ha mashimbu amwe, mukwa-Kristu hanji mafupa kulihandununa ni yoze  alimbata nenyi, chipwe ngwe kalingile utanji. (1 A-Korindu 7:11) Yitela yimwe yize muyihasa kulingisa mukwa-Kristu kulihandununa ni yoze alimbata nenyi, yili yino:

• Muze lunga malituna kukwasa hanji kulisa usoko, ngwe kulitwamina kwaha kulia ni mbongo.—1 Timoteu 5:8.

• Uswi wa kulamba, muze lunga hanji pwo malamba mukwo ni kusa mwono wenyi mu ponde.—A-Ngalashia 5:19-21.

• Nyi lunga hanji pwo meseka kupihisa usepa wa mukwo ni Yehova, ngwe ha kumukinda kuwayila Yehova.—Yilinga 5:29.

▸ Kapitulu 11, paragrafu 19

Yetu eswe twakuzanga hanga akwetu atutakamise ni kutuchichimieka. (Yishima 12:25; 16:24) Mutuhasa kulitakamisa ni kulilembejeka umwe ni mukwo ni maliji apema nawa azango. Maliji wano mahasa kukwasa mandumbu jetu hanga ahase kunyongonona ni kungunga ni kulingila Yehova, chipwe ngwe mapalika mu yipikalo. (Yishima 12:18; A-Fwilipu 2:1-4) Nyi umwe mutu kananyenganyana, twatamba kumupanjika ni mbunge yeswe nawa ni kulisa mu chihela chenyi hanga tunyingike yize anevu. Chino muchihasa kutukwasa hanga tumone yize mutuhasa kwamba hanji kulinga hanga tumukwase. (Tiangu 1:19) Kulikolweza hanga unyingike kanawa mandumbu je, muchikukwasa kunyingika yize anafupiwa. Nyi mulinga chino, muhasa kwaakwasa hanga afupe ukwaso wa Zambi ya kulembejeka cheswe, yoze wakutakamisa nawa wakutwaha uhwimino.—2 A-Korindu 1:3, 4; 1 A-Tesalonika 5:11.

▸ Kapitulu 12, paragrafu 16

Mu Mbimbiliya kumushi shimbi yize yinasolola chize atamba kulinga umbachiso. Shimbi ja manguvulu ni mianda ya mu chifuchi yalisa kulita ni hita chifuchi. (Uputukilo 24:67; Mateu 1:24; 25:10; Luka 14:8) Chuma  chilemu ha umbachiso chili chilakenyo chize waze alimbata akulinga ku meso ja Yehova. Muze akulinga chilakenyo chacho, waze analimbata kakusanyika asoko ni masepa jo. Nawa kakwita kuli umwe mukulwana wa mu chikungulwila hanga aalingile jimwe pande ja mu Mbimbiliya. Ayo e atamba kutesa chize malinga chiwanyino cho cha umbachiso. (Luka 14:28; Yoano 2:1-11) Chipwe ngwe malinga chiwanyino chinene hanji chikehe, ayo katamba kusa shindakenyo ngwo chiwanyino chacho muchihalisa Yehova. (Uputukilo 2:18-24; Mateu 19:5, 6) Shimbi ja mu Mbimbiliya mujihasa kukwasa waze analimbata hanga akwate yiyulo yipema. (1 Yoano 2:16, 17) Nyi ha chiwanyino cho muhapwa walwa usasu, ayo katamba kusa shindakenyo ngwo, yuma muyenda kanawa. (Yishima 20:1; A-Efwesu 5:18) Nyi muhapwa miaso hanji yiheho, ayo katamba kusa shindakenyo ngwo, yino muyilemesa Yehova. Akwa-Kristu waze analimbata katambile wika kulihulikila ha umbachiso wo, alioze katamba kulihulikila nawa ha usepa wo ni Zambi ni hali umwe ni mukwo.—Yishima 18:22; nyi unazange kunyingika nawa sango jikwo, tala ha Kaposhi wa Kutalila wa 15 Outubro, 2006, mafwo 18-31.

▸ Kapitulu 13, paragrafu 18

Tunazange kukwata yiyulo yipema yize yinalite ni shimbi ja mu Liji lia Zambi. Chakutalilaho, umwe ndumbu mahasa kumusanyika kuli mukwo-lunga hanji mukwa-pwo yoze hi Chela cha Yehova ko hanga aye ha chimwe chiwanyino cha tangwa lia kunanga. Nyi yena yika te mulinga? Nyi mbunge ye muyikwecha hanga uye, muhasa kulumbununa kuli yoze walimbata nenyi ngwe, nyi ha chiwanyino chacho muhapwa mianda ya uwayilo wa mahuza, yena kuuchi kulinga mianda yacho. Chikwo nawa, nyi yena musakula kuya ha chiwanyino chacho, nyonga ha chize akwenu mevwa.—1 A-Korindu 8:9; 10:23, 24.

Hanji mwata we wa ku mulimo mazanga kukwaha yawana ha mukunda wa kuhwa cha mwaka. Shina mulitunayo? Hanji ka. Chili kuli yena nyi mutambula nyi ka, kulita ni nyonga lize mwata we alinalio ha chikuma chacho. Shina aye kanamono chawana chacho ngwe chinatale ha yawana ya kuhwa cha mwaka? Nyi hanji kanafupu kukusakwila ha mulimo uze wakulinga? Kunyonga ha chino ni ha yikuma yikwo, muchikukwasa hanga usakule nyi mutayiza chawana chacho nyi ka.

 Ha mashimbu amwe, umwe mutu mahasa kukwaha yawana ha matangwa a kuhwa cha mwaka ni kwamba ngwenyi: “Ngunanyingika ngwami, kuuchi kulinga yiwanyino yino, alioze ngunazange kukwaha chuma achi.” Hanji keshi kwenyi ni nyonga lipi. Alioze muhasa kulihula ngwe: Shina iye kanafupu kweseka ufulielo wami, nyi hanji kanazange kungunjisa mu yiwanyino yino? Muze hiwanyonga ha chino, chili kuli yena nyi mutambula nyi ka. Tunazange kukwata yiyulo yize muyitukwasa kupwa nyi mbunge yitoma, nawa ni kushishika kuli Yehova.—Yilinga 23:1.

▸ Kapitulu 13, paragrafu 22

Ha mashimbu amwe, mutuhasa kulipinjisa ni akwetu, alioze mba kapinda wacho achine kupwa mulonga unene, twatamba kumuhwisa kawashi-washi. (Mateu 5:23-26) Chuma chilemu kuli mukwa-Kristu mweswe, chili kuchichimieka Yehova ni kuneha sambukila mu chikungulwila.—Yoano 13:34, 35; 1 A-Korindu 13:4, 5.

Nyi mandumbu kalivwashinyine hamukunda wa yuma ya mingoso, ayo katamba kweseka kusopa mulonga wacho, chakuhona kuutwala ku chota cha manguvulu. Mu mukanda 1 A-Korindu 6:1-8 postolo Paulu kahanyine chiyulo kuli akwa-Kristu hakutwala ku chikuma cha kutwala akwo ku chota. Kutwala ndumbwetu ku chota muchihasa kupwisa atu ni manyonga api hakutwala kuli Yehova ni chikungulwila chenyi. Mukanda wa Mateu 18:15-17, unasolola yikuma yitatu yize akwa-Kristu atamba kukaula ha kusopa milonga yinatale ha mahuza hanji wiji. (1) Nwatamba kweseka kusopa mulonga wacho yenu ene. (2) Nyi nwahashile, munuhasa kwita ukwaso wa ndumbu umuwika hanji aali waze ajama. (3) Nyi nwamona ngwenu, nihindu mulonga uchi kuhwa, munuhasa kuutwala kuli makulwana a mu chikungulwila anukwase. Mulonga wacho nyi waheta kuli makulwana, ayo mahasa kuzachisa shimbi ja mu Mbimbiliya ahase kukwasa mandumbu jacho hanga alivwashane ni zango lieswe. Alioze nyi umwe wa kuli ayo kazangile kukaula yize Mbimbiliya yinambe, makulwana a mu chikungulwila mahasa kumwaha ukwaso kupalikila mu Mbimbiliya.

Kuli yuma yize muyihasa kutwala mutu ku chota cha nguvulu amwehe mukanda, ngwe wa kulilakula, kusala ni ana, ukwaso wa kulanda mazalo  ni kulia, kumufuta mbongo muze mamuchiza ku mulimo, kutambula mbongo ku banco, hanji kutambula yikumba ya chisemi muze hafwa. Nyi mukwa-Kristu mafupa ukwaso ku chota cha manguvulu hanga asope mulonga mu jila ya zango ni sambukila, iye kechi kwehuka chiyulo cha Paulu.

Alioze nyi umwe ndumbu malinga shili yinene ngwe, kulisumbakenya ni mutu ku tachi, kulisumbakenya ni twanuke, kulamba mutu, kwiya hanji kushiha, mukwa-Kristu yoze matwala ndumbu yono ku chota cha manguvulu kechi kulimika hanji kwehuka chiyulo cha Paulu.

▸ Kapitulu 14, paragrafu 14

Chize mu munda wa Endene, Satana kakweseka kupiangula atu. (Uputukilo 3:1-6; Usolwelo 12:9) Aye kananyingika ngwenyi, nyi mahasa kwalumuna manyonga jetu, muchipwa chashi kutupiangula hanga tulinge yuma yipi. (2 A-Korindu 4:4; Tiangu 1:14, 15) Iye kakuzachisa, yuma ya mafwefwe, uwayilo wa mahuza, mingoso, yiheho, shikola yinene ni yuma yikwo hanga ashinjile atu akaule manyonga jenyi, ni kwaasolola ngwe apema.—Yoano 14:30; 1 Yoano 5:19.

Satana kananyingika ngwenyi, mashimbu jenyi akupiangula atu hasala akahe wika. Kashika analikolweza chinji hanga apiangule atu anji. Iye kanazange chinji kupiangula atu waze akuwayila Yehova. (Usolwelo 12:12) Nyi kutwakeyele, Ndiapu mahasa kupiangula manyonga jetu hakehe-hakehe. (1 A-Korindu 10:12) Chakutalilaho, Yehova kanazange hanga ulo ununge ndo ku miaka yeswe. (Mateu 19:5, 6, 9) Alioze, atu anji musono kakumona ulo ngwe chuma cha ngwaza, nawa ngwo mahasa kuushiha mashimbu eswawo mazanga. Yizulie yinji ya yinema yakukolweza atu kupwa ni manyonga jacho. Kutwatambile kwecha manyonga wano api hakutwala ku ulo atupiangule.

Jila yikwo yize Satana aneseka kutupiangwilamo yili kututwala hanga tupwe ni nyonga lia kulisongwela yetu ene. (2 Timoteu 3:4) Nyi kutwakeyele, mutuhasa kuhona vumbi atu waze Yehova hanasakula hanga atusongwele. Chakutalilaho, umwe ndumbu wa lunga hanji maputuka kulituna usongwelo wa makulwana a mu chikungulwila. (A-Hepreu 12:5) Hanji umwe ndumbu wa pwo maputuka kwehuka kwononokena shimbi ya mutwe wa usoko, yize Yehova asele mu usoko.—1 A-Korindu 11:3.

Yetu twatamba kulikolweza hanga tuchine kwecha hanga Satana apiangule  manyonga jetu. Tunafupu kwimbulula Yehova ni kuhulikila manyonga jetu ku “yuma yize yili mwilu.”—A-Kolosu 3:2; 2 A-Korindu 2:11.

▸ Kapitulu 16, paragrafu 9

Yetu eswe tunazange kupwa ni mwono upema, nawa muze tunayiji twakuzanga kutambula uukiso ungunu. (Izaia 38:21; Marku 5:25, 26; Luka 10:34) Musono, mandotolo ni mbuki anji kakuzanga kuhana uukiso wa mutapu weka ni weka. Muze mutunyonga uukiso uze mututambula, chili chilemu kukaula shimbi ja mu Mbimbiliya. Tunanyingika ngwetu, Wanangana wa Zambi wika we muuhwisa yikola yeswe. Kashika, kutwazangile kulihulikila wika ha uukiso wa yikola yetu ni kulengulula uwayilo wetu kuli Yehova.—Izaia 33:24; 1 Timoteu 4:16.

Twatamba kukeya hanga tuhone kutayiza uukiso uze unasoloka ngwe uli ni yuma ya andemoniu. (Shimbi Yamuchiali 18:10-12; Izaia 1:13) Shimbu kanda tuchitayiza umwe uukiso hanji yitumbo, twatamba kunyingika chize wapwa, nawa nyi uli ni yuma ya andemoniu. (Yishima 14:15) Twatambile kuvulama ngwetu, Satana kanazange kwonga tuvumbi ja Yehova hanga alinge yuma ya andemoniu. Kashika, nyi tunamono ngwe uukiso umwe uli ni yuma ya andemoniu, chili chilemu kuwehuka.—1 Petulu 5:8.

▸ Kapitulu 16, paragrafu 18