1, 2. Yika twatamba kulinga mba tununge mu zango lia Zambi?

YETU eswe tunazange kukola ni kupwa ni mwono upema. Kashika twakulia kanawa ni kufumba mujimba ni kuufunga. Chipwe ngwe hi chashiko, alioze twakununga ni kulinga yuma yacho mumu yakutukwasa hanga tutwame kawape ni kukola. Alioze, twatamba nawa kukola mu jila yikwo.

² Chipwe ngwe hitwanyingika Yehova, nihindu twatamba kununga ni kukolesa usepa wetu ni iye. Muze Yundase akolwezele akwa-Kristu ngwenyi, “Lifungenu mu zango lia Zambi,” iye yaalweza chize te atamba kuchilinga. Yaalweza ngwenyi: “Jikijilenu ha ufulielo wenu usandu wahiana.” (Yundase 20, 21) Mba kuchi mutuhasa kukolesa ufulielo wetu?

3-5. (a) Yika Satana anazange hanga tunyonge hakutwala ku shimbi ja Yehova? (b) Kuchi wakunyonga hakutwala ku shimbi ja Yehova?

³ Chili chilemu kupwa ni shindakenyo ngwe, mutapu uze Yehova akulingilamo yuma uli upema chinji. Satana kanazange unyonge ngwe, chili chikalu kwononokena shimbi ja Zambi, nawa ngwe, muwahilila chinji nyi yena  mwene mukwata chiyulo cha chipi ni chipema. Chize mu munda wa Endene, Satana kakupiangula atu hanga atayize nyonga liacho. (Uputukilo 3:1-6) Chipwe musono, kakusa tachi jinji hanga atu afuliele ha nyonga liacho.

⁴ Shina yize Satana akwamba yili yamwenemwene? Shina twakutokesa yimwe ha kwononokena shimbi ja Yehova? Ka. Tala chilweza chino, nyonga ngwe unende mu wande upema. Mba mumona chimwe chipanga chisuku, chakujika kanawa hanga atu ahone kuchitangunuka ni kuya sali likwo. Hanji mulihula ngwe: “Mumu liaka ajika chipanga chino mu jila?” Alioze ha shimbu lize liene, muwivwa ndumba kanatete sali likwo lia chipanga. Haliapwila yika munyonga hakutwala ku chipanga chacho? Mumona ngwe nyi te kukushi chipanga chacho, kachi ndumba kakulia. Liji lia Zambi linambe ngwo: “Keyelenu, lenu; mumu mukwa kole yenu Ndiapu, ngwe ndumba wa kuhanjika ni lundunjila kakwendangana nikufupa yoze mahasa kuumbula.”—1 Petulu 5:8.

⁵ Yehova kanazange kutwaha mwono upema. Kazangile hanga Satana atwonge. Kashika akutwaha shimbi jize jakutufunga ni kutwaha uwahililo. (A-Efwesu 6:11) Tiangu kasonekene ngwenyi: “Yoze matala kanawa mu shimbi yingunu ya utuswilo, mba manyongononamo, . . . yono kumakawaha mu yuma yeswe malinga.”—Tiangu 1:25.

6. Mumu liaka mutuhasa kupwa ni shindakenyo ngwetu mutapu uze Yehova akulingilamo yuma uli upema chinji?

⁶ Muze mutukaula usongwelo wa Yehova, mutupwa ni mwono upema mba usepa wetu ni iye muukola. Chakutalilaho, Yehova kakutukolweza hanga tulembe kuli iye, nawa kulemba chakututakamisa. (Mateu 6:5-8; 1 A-Tesalonika 5:17) Twakuwahilila muze twakukaula usongwelo  wenyi wa kuya ku kukunguluka hanga tumuwayile ni kulitakamisa umwe ni mukwo, ni muze twakuya ni kwambujola ni kulongesa atu. (Mateu 28:19, 20; A-Ngalashia 6:2; A-Hepreu 10:24, 25) Muze twakunyonga ha chize yuma yino yakukolesa ufulielo wetu, twakupwa ni shindakenyo ngwetu, mutapu uze Yehova akulingilamo yuma uli upema chinji.

7, 8. Yika muyitukwasa hanga twehuke kulipikala chinji hakutwala ku yize muyikalingiwa kulutwe lia matangwa?

⁷ Mutuhasa kulipikala chinji ha kunyonga ngwetu, kulutwe lia matangwa mutupalika mu yeseko yinji ku ufulielo. Nyi wanyonga chocho, iwuluka maliji a Yehova anambe ngwo: “Yami Yehova nguli Zambi yenu, yoze wakunulongesa hanga nukalumbunuke, yoze wakunusongwela mu jila yize chanutamba kuya. Mala! Nyi kachi nwevwile shimbi jami! kachi uhwimino wenu wapwa  ngwe lwiji, kachi ululi wenu wapwa ngwe mikanya ya kalunga-lwiji.”—Izaia 48:17, 18.

⁸ Nyi twononokena Yehova, uhwimino wetu muupwa ngwe lwiji yoze keshi kuma, ni ululi wetu nawa muupwa ngwe mikanya ya kalunga-lwiji yize yakwiza mashimbu eswe kusesa lia kalunga-lwiji. Chipwe ngwe mukulingiwa yimwe ku mwono wetu, mutuhasa kushishika. Mbimbiliya yinalakenya ngwo: “Mbila chiteli che hali Yehova, iye makakukolesa. Kechi kutayiza akwa ululi kukokoloka nilimwe tangwa.”—Samu 55:22.

9, 10. Yika chinalumbunuka kujama mu ufulielo?

⁹ Muze mukolesa usepa we ni Yehova, mujama mu ufulielo. (A-Hepreu 6:1) Kujama mu ufulielo yika chinalumbunuka?

¹⁰ Yetu kutushi kujama wika mu ufulielo mumu ngwo hitwakola. Alioze mba tukole ku ufulielo, Yehova katamba kupwa sepa lietu, nawa twatamba kumona yuma ngwe chize iye akuyimona. (Yoano 4:23) Paulu kasonekene ngwenyi: “Mumu waze akulita ni musunya kakunyonga yuma ya musunya. Waze akulita ni Spiritu kakunyonga yuma ya Spiritu.” (A-Roma 8:5) Mutu yoze wajama mu ufulielo keshi kulihulikila ha yuma ya musunya hanji ha upite. Shimbu alinge chino, kakulihulikila ha mulimo wa Yehova ni kukwata yiyulo yipema ku mwono wenyi. (Yishima 27:11; tanga Tiangu 1:2, 3.) Mutu yoze wajama mu ufulielo keshi kulinga yuma yipi, chipwe ngwe mamushinjila kuli akwo. Kanyingika yuma yipema ni kulikolweza hanga ayilinge.

11, 12. (a) Yika Paulu ambile hakutwala ku ‘kusa chinyingi’? (b) Kuchi kukola mu ufulielo chinalite ni mukwa-kuheha?

¹¹ Twatamba kusa tachi mba tukole ku ufulielo. Postolo  Paulu kasonekene ngwenyi: “Kulia cha tachi kuchapwa kulia cha waze hakola, waze mumu ha mukunda wa kulijilila, mana ali no a kulifumba, akase chinyingi hakachi ka chipema ni chipi.” (A-Hepreu 5:14) Liji “kulifumba” mulihasa kutwiulwisa akwa-kufumba mujimba.

¹² Muze twakumona mukwa-kuheha kanahehe kanawa, twakunyingika ngwetu, kakusa tachi jinji hanga afumbe mujimba wenyi. Iye kakasemukine ni uhashi wacho. Muze mwana kemba akusemuka, keshi kunyingika chize mazachisa moko ni molu jenyi. Alioze, ha kupalika cha mashimbu, kakulilongesa chize makwata yuma ni kwenda. Kashika, nyi mafumba mujimba wenyi, neye mahasa kupwa mukwa-kuheha mupema. Chizechene nawa, ni yetu twatamba kusa mashimbu ni kununga kulifumba, mba tupwe akwa-Kristu ajama mu ufulielo.

13. Yihula yika muyitukwasa kunyonga yuma ngwe chize Yehova akuyinyonga?

¹³ Mu mukanda uno, twamona chize mutuhasa kunyonga ngwe chize Yehova akunyonga ni kumona yuma ngwe chize akuyimona. Twalilongesa chize mutuhasa kuzanga ni kulemesa shimbi ja Yehova. Muze mutufupa kukwata yiyulo, twatamba kulihula ngwetu: ‘Shimbi jika ja Yehova jize jinatale ha chiyulo chino? Kuchi munguhasa kukaula shimbi jino? Yika Yehova anashimbwila hanga ngulinge?’—Tanga Yishima 3:5, 6; Tiangu 1:5.

14. Yika twatamba kulinga mba tukolese ufulielo wetu?

¹⁴ Tunungenu ni kukolesa ufulielo wetu muli Yehova. Chizechene ngwe kulia chipema chakutatwisa mujimba, kulilongesa hakutwala kuli Yehova muchitukwasa kukolesa ufulielo wetu. Muze twaputukile kulilongesa Mbimbiliya, twalilongesele umwenemwene hakutwala kuli Yehova ni majila jenyi. Alioze ha kupalika cha mashimbu, twatamba kunyingika umwenemwene  ulemu wa mu Mbimbiliya. Yino ye Paulu afupile kwamba muze asonekene ngwenyi: “Kulia cha tachi kuchapwa kulia cha waze hakola.” Nyi twakaula yize twakulilongesa, mutupwa ni mana. Mbimbiliya yinatulweze ngwo: “Che chuma chahiana, mana.”—Yishima 4:5-7; 1 Petulu 2:2.

15. Mumu liaka chili chilemu kuzanga Yehova ni mandumbu jetu?

¹⁵ Mutu mahasa kupwa ni mujimba watatuka, upema, alioze kananyingika ngwenyi, katamba kulia kanawa ni kulifunga, mba mujimba ununge ni kupema. Chizechene nawa, mutu yoze wajama mu ufulielo kananyingika ngwenyi, katamba kulikolweza hanga anunge ni kukolesa usepa wenyi ni Yehova. Paulu kanatwiwulula ngwenyi: “Liesekenu yenwene nyi mu ufulielo nuli, nyi kachi ka. Sololenu chinyingi hali yenwene.” (2 A-Korindu 13:5) Chipwe chocho, tunafupiwa yuma yinji hi wika ko kupwa ni ufulielo ukolo. Zango lietu hali Yehova ni mandumbu jetu liatamba kununga ni kukola. Paulu kambile ngwenyi: “Chipwe mungupwa . . . ni yinyingi yeswe, chipwe mungupwa ni ufulielo weswe, wa kuhasa kututulula milundu, alioze nyi chishi zango, nguli wamokomoko.”—1 A-Korindu 13:1-3.

16. Kuchi Satana akuzanga hanga tunyonge?

¹⁶ Satana kanazange hanga tunyonge ngwetu, kutushi kuhasa kulinga yuma yipema yize muyivwisa Yehova kuwaha. Kanazange tukokoloke mu ufulielo ni kunyonga ngwetu, yipikalo yetu kuyichi kuhwa. Kazangile hanga tufuliele muli mandumbu jetu, chipwe kupwa ni uwahililo. (A-Efwesu 2:2) Satana kananyingika ngwenyi, manyonga api mahasa kupihisa mwono wetu ni usepa wetu ni Zambi. Alioze Yehova  hanatwehe umwe ukwaso hanga tuhasa kukumba manyonga jetu api. Ukwaso wacho uli kutalatala.

17. Mumu liaka kutalatala chili chilemu?

¹⁷ Ha mukanda 1 A-Tesalonika 5:8, Mbimbiliya yinatese kutalatala chetu ngwe tepa lize liakufunga mutwe wa swalale mu jita, akuvuluka ngwo, tepa lia “kutalatala cha ulamwino.” Kushimbwila yilakenyo ya Yehova, muchihasa kufunga mbunge yetu ni kutukwasa kwehuka manyonga api.

18, 19. Kuchi kutalatala chatakamishine Yesu?

¹⁸ Kutalatala chatakamishine Yesu. Ha ufuku, muze te kanda achifwa, kapalikile mu yipikalo yinji. Sepa lienyi yoze te akulia nenyi yamukunjika kuli akwa-kole. Mukwo yalikala ngwenyi, kamunyingikine. Akwo yamuchina. Atu a ku vungu lienyi yamwalumukina ni kwita hanga amuhate ha mutondo wa lamba. Yika yakwashile Yesu kunyongonona ha mashimbu jacho akalu? Mbimbiliya  yinambe ngwo: “Ha uwahililo uze asele kumeso jenyi, wanyongonwene mu lamba lia [mutondo], nikulelesa je sonyi; hanatwama ku kwoko lia chindume lia ngunja ya Zambi.”—A-Hepreu 12:2.

¹⁹ Yesu te kananyingika ngwenyi, nyi mashishika, mahalisa Tato, ni kusolola ngwo, Satana kali mukwa-mahuza. Kutalatala chahanyine chiseke chinji kuli Yesu. Iye te kananyingika nawa ngwenyi, kwasala hakehe hanga apwe hamuwika ni Tato mu malilu. Kutalatala chenyi chamukwashile kunyongonona. Twatamba kulihulikila ha kutalatala chetu ngwe chize alingile Yesu, mumu che muchitukwasa kunyongonona, chipwe ngwe mutupalika mu kapinda mweswawo.

20. Yika muyihasa kukukwasa hanga wehuke manyonga api?

²⁰ Yehova kananyingika ufulielo we ni kunyongonona che. (Izaia 30:18 tanga Malakia 3:10.) Kanalakenya ngwenyi “kumakwaha cheswe unazange mu mbunge ye.”  (Samu 37:4) Kashika, lihulikile ha kutalatala che. Satana kanazange hanga utokese kutalatala che, ni kunyonga ngwe, yilakenyo ya Yehova kuyichi kamanunuka. Ehuka manyonga api! Nyi unamono ngwe kutalatala che chinakeketela, eta ukwaso wa Yehova. Iwuluka maliji waze ali ha A-Fwilipu 4:6, 7 anambe ngwo: “Kanda nukalipikala ha chuma nichimwe; alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi. Mba sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu muli Kristu Yesu.”

21, 22. (a) Upale wa Yehova hano hashi uka? (b) Yika mununga ni kulinga?

²¹ Chiza mashimbu hanga upukune ha yuma yize Yehova analakenya. Kwasala hakehe hanga atu eswe atwama hano hashi awayile Yehova. (Usolwelo 7:9, 14) Achinyonga chize mwono muukapwa hashi haha. Muukapema chinji! Satana, andemoniu, ni ungulungulu weswe kuyichi kapwako nawa. Kuchi kayiza nawa, chipwe kufwa. Matangwa eswe muuhinduka ni tachi nawa ni uwahililo ha kupwa mu paraisu. Atu eswe makakalakala hamuwika hanga alumune hashi hapwe paraisu. Eswe makapwa ni kulia chipema ni yihela yipema yakutwama. Niumwe makapwa chingalwe hanji chiswi wakwihi, alioze atu eswe makapwa yimbovu kuli umwe ni mukwo. Ha kupalika cha mashimbu, atu eswe hano hashi makawahilila “ku kutusuka cha uhenya wa ana a Zambi.”—A-Roma 8:21.

²² Yehova kanazange apwe Sepa lie mupema. Kashika, sako tachi hanga wononokene Yehova ni kukundama kuli iye hita tangwa. Chochene, yetu eswe twatamba kununga mu zango lia Zambi ku miaka yeswe!—Yundase 21.